مەملەكەت باسشىسىنىڭ تاپسىرماسىنا سايكەس, ەلگە قايتارىلعان زاڭسىز يەمدەلگەن اكتيۆتەر قاراجاتىن حالىقتىڭ ءومىر ءسۇرۋ ساپاسىن ارتتىرۋعا باعىتتاۋ جۇمىستارى جالعاسىپ جاتىر. ۇكىمەتتىڭ شەشىمىمەن ارناۋلى مەملەكەتتىك قوردان سولتۇستىك قازاقستان وبلىسىندا سۋ قۇبىرى ينفراقۇرىلىمىن دامىتۋعا 45 ميلليارد تەڭگەدەن استام قارجى ءبولىندى, دەپ حابارلايدى Egemen.kz.
اتالعان قاراجات وڭىردەگى اۋىل تۇرعىندارىن ساپالى اۋىز سۋمەن قامتۋ ماقساتىندا جۇزەگە اسىرىلاتىن 48 ينفراقۇرىلىمدىق جوباعا باعىتتالادى. ولاردىڭ قاتارىندا سوكولوۆ, بۋلاەۆ جانە پرەسنوۆ توپتىق سۋ قۇبىرلارىن رەكونسترۋكتسيالاۋ, سونداي-اق ايىرتاۋ مەن شال اقىن اۋداندارىنداعى ەلدى مەكەندەردى كوكشەتاۋ توپتىق سۋ قۇبىرىنا قوسۋ ءۇشىن جاڭا سۋ تارتۋ جەلىلەرىن سالۋ جوبالارى بار.
جوبالار تولىق اياقتالعاننان كەيىن سولتۇستىك قازاقستان وبلىسىنىڭ اۋىل تۇرعىندارى 100 پايىز ساپالى اۋىز سۋمەن قامتىلادى دەپ جوسپارلانعان.
ايتا كەتەيىك, قازىرگى تاڭدا ەلىمىزدەگى ەڭ ۇزىن توپتىق سۋ قۇبىرلارى ءدال وسى وڭىردە ورنالاسقان. جالپى ۇزىندىعى 3 مىڭ شاقىرىمنان اساتىن سۋ جۇيەلەرى ارقىلى 175 مىڭنان استام تۇرعىندى بىرىكتىرەتىن 229 اۋىل ساپالى اۋىز سۋمەن قامتاماسىز ەتىلىپ جاتىر. وبلىس ورتالىعى پەتروپاۆل قالاسىنىڭ تۇرعىندارى 100 پايىز, ال اۋىلدىق ەلدى مەكەندەردەگى حالىقتىڭ 97,5 پايىزى ورتالىقتاندىرىلعان سۋمەن جابدىقتاۋ قىزمەتىنە قول جەتكىزگەن.
بۇل باستاما — مەملەكەت باسشىسىنىڭ ادىلەتتى قازاقستان قۇرۋ جولىنداعى ناقتى تاپسىرمالارىنىڭ ناتيجەلى جۇزەگە اسىرىلىپ جاتقانىن كورسەتەتىن ماڭىزدى قادام.