جىل باسىنان بەرى قازاقستان جولدارىندا 2 مىڭنان استام ادام قازا تاپتى. بۇل تۋرالى اكادەميك باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىنىڭ ديرەكتورى ولجاس بەكارىسوۆ ايتتى, دەپ حابارلايدى Egemen.kz.
«ۇلتتىق ستاتيستيكا بيۋروسىنىڭ دەرەكتەرىنە سايكەس, 2024 جىلى ەلىمىزدە جازاتايىم وقيعالاردان, ۋلانۋلار مەن جاراقاتتاردان بولاتىن ءولىم-ءجىتىم كورسەتكىشى ءار 100 مىڭ ادامعا شاققاندا 51,8-ءدى قۇرادى. سوڭعى 5 جىل ىشىندە جاراقاتتان بولاتىن ءولىم-ءجىتىم 19%-دان استام ازايدى. ال اقمولا, قوستاناي, سولتۇستىك قازاقستان وبلىستارىندا جانە الماتى قالاسىندا بۇل كورسەتكىش 23%-دان 38%-عا دەيىن تومەندەگەن», دەيدى و.بەكارىسوۆ.
ونىڭ ايتۋىنشا, جاراقاتتان بولعان ءولىم-ءجىتىم ەلدەگى جالپى ءولىم-ءجىتىم قۇرىلىمىندا 8%-دى قۇرايدى.
جازاتايىم وقيعالاردان, ۋلانۋلار مەن جاراقاتتاردان بولعان ءولىم سەبەپتەرىنىڭ قۇرىلىمىندا:
كىسى ءولتىرۋ – 4,3%,
ءوزىن-ءوزى ءولتىرۋ – 11,4%,
جول-كولىك اپاتتارى – 23,5%-دى قۇرايدى.
جاراقاتتان بولعان ءولىم-ءجىتىم بويىنشا سەگىز وبلىس «قىزىل ايماققا» ەنگىزىلگەن. ال 2023 جىلمەن سالىستىرعاندا ۇلىتاۋ, اتىراۋ وبلىستارىندا جانە استانا قالاسىندا بۇل كورسەتكىشتىڭ تومەندەگەنى بايقالادى.
«2024 جىلى بۇل كورسەتكىش ءار 100 مىڭ ادامعا شاققاندا 12,2 بولدى, بۇل 2023 جىلمەن سالىستىرعاندا 8,6%-عا تومەن. دەگەنمەن, قازاقستان جول اپاتتارىنان بولاتىن ءولىم بويىنشا ەىدۇ ەلدەرىنەن ايتارلىقتاي ارتتا قالىپ وتىر. ەڭ تومەن كورسەتكىش جاپونيادا, سونداي-اق ەۋروپا ەلدەرىنىڭ تاجىريبەسى دە نازار اۋدارۋعا تۇرارلىق», دەديى ول.
باس پروكۋراتۋرانىڭ مالىمەتىنشە, 2024 جىلى جول اپاتتارىنىڭ تىركەلۋ سانى 2023 جىلمەن سالىستىرعاندا 98,9%-عا وسكەن.
ولجاس بەكارىسوۆتىڭ تۇسىندىرۋىنشە, ىشكى ىستەر مينيسترلىگىنىڭ اكىمشىلىك پوليتسيا كوميتەتى مۇنى بىلاي تۇسىندىرەدى: 2024 جىلدان باستاپ جول اپاتىنا تۇسكەن ازاماتتار دارىگەرلىك كومەككە جۇگىنسە, دەنساۋلىعىنا زيان كەلمەگەنىنە قاراماستان, بارلىق وقيعا ستاتيستيكاعا ەنگىزىلەدى. بۇرىن تەك مەديتسينا تاراپىنان زيان كەلتىرىلگەنى دالەلدەنگەن وقيعالار عانا ەسەپكە الىناتىن.
بارلىق جكو-نىڭ 55%-ى التى وڭىرگە تيەسىلى: الماتى قالاسى, الماتى وبلىسى, جامبىل وبلىسى, استانا قالاسى, اقتوبە وبلىسى جانە شىمكەنت.
2024 جىلى جول اپاتتارىنان 40 873 ادام زارداپ شەكتى, ونىڭ ىشىندە 2 452 ادام قازا تاپتى.
سونداي-اق سپيكەر جىلدامدىقتىڭ ارتۋى جول اپاتتارىنىڭ سالدارىن اۋىرلاتاتىنىن اتاپ ءوتتى. ورتاشا جىلدامدىقتىڭ ءاربىر 1 كم/ساع-قا ارتۋى جاراقاتپەن اياقتالاتىن جكو ىقتيمالدىعىن 3%-عا, ال ولىممەن اياقتالاتىن اپاتتىڭ قاۋپىن 4–5%-عا ارتتىرادى.
ساعاتىنا 80 كم-دەن جوعارى جىلدامدىقپەن قوزعالعاندا, جاياۋ جۇرگىنشىنىڭ قازا تابۋ ىقتيمالدىعى 90%-دان اسادى. قالالىق جەردە جىلدامدىقتى 60-تان 50 كم/ساع-قا تومەندەتۋ جاياۋ جۇرگىنشى وتپەلەرىندە ءولىم-ءجىتىمدى 30–40%-عا قىسقارتادى.
ددسۇ ستاتيستيكاسى بويىنشا, قاۋىپسىزدىك بەلدىگىن قولدانۋ ءولىم قاۋپىن 40–50%-عا, ال اۋىر جاراقات الۋ قاۋپىن 25%-عا دەيىن تومەندەتەدى.