بۇگىن – اسكەري-اۋە كۇشتەرى كۇنى

اۋە كۇشتەرىنىڭ نەگىزگى مىندەتى – اۋە كەڭىستىگىن قورعاۋ, ستراتەگيالىق ماڭىزدى نىسانداردى بۇركەمەلەۋ. قۇرلىق اسكەرلەرىنىڭ ارەكەتىنە قولداۋ كورسەتۋ.

قورعانىس مينيسترلىگىنىڭ ءباسپاسوز قىزمەتىنىڭ مالىمدەۋىنشە, بولىمشەلەر زاماناۋي ۇشاقتارمەن جانە تىكۇشاقتارمەن جابدىقتالعان. ولاردىڭ قاتارىندا كوپفۋنكتسيونالدى سۋ-30سم, سۋ-27 جويعىش ۇشاقتارى, L-39 وقۋ-جاۋىنگەرلىك, مي-171ش جانە مي-35م كولىكتىك-جاۋىنگەرلىك جانە سوققى بەرۋشى تىكۇشاقتارى, سونداي-اق Airbus Military شىعارعان ا-400م ۇشاقتارى بار.

اسكەري-اۋە كۇشتەرى ءۇشىن كاسىبي كادرلاردى اقتوبەدەگى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا دايارلايدى. ينستيتۋت تۇلەكتەرى ۇشقىشتار, شتۋرماندار, تەحنيكتەر جانە اسكەري اۆياتسيا قۇرامىنىڭ باسقا دا ماڭىزدى ساناتتارىنىڭ قاتارىن تولىقتىرادى.

وزگەرمەلى گەوساياسي جاعدايدا اۋە كۇشتەرى دامۋىن جالعاستىرىپ جاتىر. وسىعان سايكەس وقۋ باعدارلامالارى قايتا قارالدى. دايىندىقتىڭ جاڭا ادىستەمەلەرى ەنگىزىلىپ, حالىقارالىق جانە تۇرارالىق وقۋ-جاتتىعۋلارعا قاتىسۋ جاندانىپ وتىر. مۇنداي ءىس-شارالار تاجىريبە الماسۋعا, وداقتاستارمەن قارىم-قاتىناستى شىڭداۋعا جانە جاۋىنگەرلىك دايىندىق دەڭگەيىن ارتتىرۋعا مۇمكىندىك بەرەدى.

قازاقستان ۇشقىشتارىنىڭ كاسىبيلىگى مەن ادالدىعىن كورسەتكەن جارقىن ەپيزودتاردىڭ ءبىرى 2024 جىلعى كوكتەمگى سۋ تاسقىنى كەزىندە بولدى. كۇردەلى اۋا رايى جاعدايىندا تىكۇشاقتار مەن ۇشاقتاردىڭ ەكيپاجدارى تۇرعىنداردى سۋ باسقان ەلدى مەكەندەردەن ەۆاكۋاتسيالاۋدى قامتاماسىز ەتتى. ءبىر ايدا 600-گە جۋىق ۇشۋ ورىندالىپ, 3,5 مىڭنان استام ادام قۇتقارىلدى. ەكى مىڭعا جۋىق مامان جانە 280 توننادان استام گۋمانيتارلىق جۇك تاسىمالداندى.

اتالعان جەتىستىكتەردىڭ ارتىندا ۇشۋ جانە ينجەنەرلىك قۇرام, بايلانىسشى, مەتەورولوگ, تەحنيك جانە ازاماتتىق قىزمەتكەرلەر سەكىلدى ۇلكەن ۇجىمنىڭ كۇندەلىكتى جۇمىسى تۇر. ولاردىڭ كاسىبيلىگى  قازاقستاننىڭ سەنىمدى جانە زاماناۋي اۆياتسياسىنىڭ نەگىزى دەۋگە تۇرارلىق.