ەلىمىزدە مەملەكەت باسشىسىنىڭ زاڭسىز يەمدەنىلگەن اكتيۆتەردى قايتارۋ جونىندەگى تاپسىرمالارىن ورىنداۋ بويىنشا جۇمىستار جالعاسىپ جاتىر. قايتارىلاتىن قاراجات الەۋمەتتىك جانە ينجەنەرلىك ينفراقۇرىلىمدى دامىتۋعا باعىتتالادى.
ۇكىمەت قاراعاندى وبلىسىندا 51 مەديتسينالىق مەكەمەنىڭ قۇرىلىسى جۇمىستارىن اياقتاۋعا ارناۋلى مەملەكەتتىك قوردان 5,9 ملرد تەڭگە ءبولۋ تۋرالى شەشىم قابىلدادى. نىساندار «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا سالىنىپ جاتىر. ولاردى جىل سوڭىنا دەيىن پايدالانۋعا بەرۋ جوسپارلانىپ وتىر.
شەت, اقتوعاي, اباي, بۇقار جىراۋ, قارقارالى, نۇرا جانە وساكاروۆ اۋداندارىندا جاڭا دارىگەرلىك امبۋلاتوريالار, سونداي-اق فەلدشەرلىك-اكۋشەرلىك جانە مەديتسينالىق پۋنكتتەر سالىنادى. ولاردى جۇزەگە اسىرۋ شالعايداعى ەلدى مەكەندەردىڭ تۇرعىندارى ءۇشىن مەديتسينالىق قىزمەتتەردىڭ قولجەتىمدىلىگىن ارتتىرۋعا باعىتتالعان. مەديتسينالىق قىزمەتكە قولجەتىمدىلىك, الدىن الۋ جۇمىستارى, ەرتە دياگنوستيكا, سونداي-اق توتەنشە جاعدايلاردا العاشقى كومەك كورسەتىلەدى.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 655 نىساننىڭ: مەديتسينالىق جانە فەلدشەرلىك-اكۋشەرلىك پۋنكتتەر, دارىگەرلىك امبۋلاتوريالار قۇرىلىسى جوسپارلانعان. بۇگىنگى تاڭدا 480 نىساننىڭ قۇرىلىسى اياقتالدى. العاشقى مەديتسينالىق-سانيتارلىق كومەك نىساندارىن سالۋعا جانە اۋرۋحانالاردى رەكونسترۋكتسيالاۋعا قاراجات رەسپۋبليكالىق بيۋدجەتتەن بولىنەدى. سونىمەن قاتار ارناۋلى مەملەكەتتىك قوردان دا قارجى قاراستىرىلعان.