ۇلىبريتانيادا «ۋيمبلدون» ءتۋرنيرى باستالدى. ىرىكتەۋ سايىستارىنا ەلىمىزدىڭ ءتورت تەننيسشىسى قاتىسقان ەدى. وكىنىشكە قاراي, دميتري پوپكو, ميحايل كۋكۋشكين, تيموفەي سكاتوۆ سىندى تانىمال ويىنشىلار بۇل سىناقتان وتە المادى. جەرلەستەرىمىزدىڭ اراسىنان تەك بەيبىت جۇقاەۆتىڭ جولى بولدى.
ATP رەيتينگىندە 251-ورىندا تۇرعان بەيبىت جۇقاەۆ العاشقى اينالىمدارداعى قوس قارسىلاسىن قاپا قالدىرىپ, فينالدىق سايىسقا شىققاندا ءبىراز قوبالجىعانىمىز راس. ويتكەنى بەيبىت بىلتىر ءدال وسى مەجەدە فرانتسيالىق اليس كانتەنگە ەسە جىبەرگەن ەدى. بۇل جولى جەرلەسىمىز وتە جيناقى ءارى ساۋاتتى وينادى. فينالدا فرانتسيا وكىلى لۋكا ءپاۆلوۆيچتى 3:6, 6:3, 6:2, 7:6 ەسەبىمەن ۇتتى. ءسويتىپ, 24 جاستاعى قازاق ۇلى سپورتتىق مانسابىندا تۇڭعىش رەت «ۇلكەن دۋلىعا» ساناتىنداعى تۋرنيردە كۇش سىناسۋ قۇرمەتىنە يە بولدى. ول نەگىزگى جارىستىڭ ءبىرىنشى كەزەڭىندە يتاليالىق فلاۆيو كوبولليمەن كۇش سىناسادى.
الەمدىك رەيتينگتە توپ-100 تەننيسشىنىڭ قاتارىنا ەنىپ وتىرعان ەلەنا رىباكينا, يۋليا پۋتينتسەۆا, الەكساندر بۋبليك, الەكساندر شەۆچەنكونىڭ قارسىلاستارى انىقتالدى. تۇماندى البيون ەلىندەگى ءتۋرنيردىڭ تۇساۋكەسەر كەزدەسۋىندە بۋبليك يسپانيالىق حايمە مۋنارمەن, رىباكينا ارمەنيالىق ەلينا اۆانەسيانمەن, شەۆچەنكو اقش وكىلى رايلي وپەلكامەن وينايدى. وكىنىشكە قاراي, يۋ.پۋتينتسەۆا ءبىرىنشى اينالىمدا امەريكالىق اماندا انيسيموۆادان ويسىراي ۇتىلىپ قالدى, ەسەپ – 0:6, 0:6.
جوعارىدا ەسىمدەرى اتالعان جەرلەستەرىمىزدەن بولەك, جۇپتىق سايىستا اننا دانيلينا ونەر كورسەتەدى. جاستار اراسىنداعى جارىستا ءامىر ومارحانوۆ, زاڭعار نۇرلان ۇلى, دامير جالعاسباي باق سىنايدى.