مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن «قاجىمۇقان» ءفيلمى يتاليادا وتكەن XXIX حالىقارالىق IPAAF – Apoxiomeno كينوفەستيۆالىندە بيىكتەن كورىندى, دەپ حابارلايدى Egemen.kz.
كارتينا فەستيۆالدىڭ باستى ماراپاتتارىن جەڭىپ الدى. اتاپ ايتساق, «ۇزدىك فيلم», «ەڭ ۇزدىك ەر ادام ءرولى» (ەربول تولەپبەرگەن), «ۇزدىك رەجيسسۋرا» (قاناعات مۇستافين) جانە «ۇزدىك ستسەناري» (قاناعات مۇستافين, جانات قاسابەكوۆ) نوميناتسياسىن يەلەندى.
فيلم رەجيسسەرى قاناعات مۇستافين تاريحي فيلم ستسەناريىنە 2012 جىلى كىرىسكەن. 2020 جىلى ءتۇسىرىلىمىن باستاپ, ون جىلدان استام ۋاقىت زەرتتەۋ جۇرگىزگەن. سونىڭ ناتيجەسىندە تۋىندى وتكەن جىلى ۇلكەن ەكرانعا ۇسىنىلىپ, پروكاتقا شىقتى.
قاجىمۇقان مۇڭايتپاسوۆ – فرانتسۋز كۇرەسىنەن الەم چەمپيونى اتانعان تۇڭعىش قازاق. ول الەمدىك, وڭىرلىك, رەسەيلىك, كەيىن بۇكىلوداقتىق سۋپەر اۋىر سالماقتاعى كلاسسيكالىق كۇرەس چەمپيوناتتارىنىڭ بىرنەشە دۇركىن جەڭىمپازى اتانعان. بالۋان ءوزىنىڭ سپورتتىق مانسابىندا ەلۋگە جۋىق مەدال مەن ماراپاتقا يە بولىپ, ۇلت ماقتانىشىنا اينالدى.
ايتا كەتەيىك, IPAAF-Apoxiomeno فەستيۆالى 30 جىلعا جۋىق ۇيىمداستىرىلىپ كەلەدى. يتاليادا وتەتىن بەدەلدى حالىقارالىق كينوفەستيۆال جىل سايىن كينو, ونەر جانە مادەنيەت سالاسىنداعى ۇزدىك تۋىندىلاردى ماراپاتتايدى. فەستيۆال اسىرەسە الەۋمەتتىك ماڭىزى بار تاقىرىپتاردى قوزعايتىن, كوركەمدىك دەڭگەيى جوعارى جانە مادەني دامۋعا ىقپال ەتەتىن شىعارمالارعا باسا نازار اۋدارادى. ءار جىلدارى بۇل فەستيۆالدە الەمنىڭ تۇكپىر-تۇكپىرىنەن كەلگەن كورنەكتى ونەر قايراتكەرلەرى جەڭىمپاز اتانعان.