الماتىداعى «دينامو» ستاديونىندا قازاقستان سپورتىنىڭ وركەندەۋىنە ولشەۋسىز ۇلەس قوسقان اقيىق ازاماتتاردى ەسكە الۋ ماقساتىندا مەموريالدىق تاقتا ورناتىلدى. بۇل شاراعا ۇلتتىق وليمپيادالىق كوميتەتىنىڭ (ۇوك) باس حاتشىسى ءالىمجان اقاەۆ, قالا اكىمدىگىنىڭ وكىلدەرى, ءتۇرلى سپورت ۇيىمدارىنىڭ باسشىلارى, ارداگەرلەر جانە باسقا دا قوعام قايراتكەرلەرى قاتىستى, دەپ جازادى Egemen.kz.
جينالعان قاۋىم تيمۋر دوسىمبەتوۆ, ەدۋارد ايريح جانە قازىبەك بايبولوۆ سىندى سەركەلەرگە ارنالعان ەستەلىك تاقتالار ورناتىلعانىنا ءوز ريزاشىلىقتارىن ءبىلدىردى. راسىندا دا, ەسىمدەرى اتالعان ازاماتتاردىڭ قازاق ەلى سپورتىنا سىڭىرگەن ەڭبەكتەرى وراسان زور. ماسەلەن, بەسسايىسشى تيمۋر دوسىمبەتوۆ 1982 جىلى ريمدە وتكەن الەم چەمپيوناتىندا باس جۇلدەنى ولجالادى. سول كوماندانىڭ ساپىندا قانداسىمىزدان بولەك, دۋشانبەلىك اناتولي ستاروستين مەن كراسنودارلىق ەۆگەني ليپەەۆ تە ونەر كورسەتتى. سول كەزدە كسرو قۇراماسى وزدەرىنىڭ باستى قارسىلاستارى – ماجارستان مەن يتاليانى ارتقا تاستاعان ەدى. ۇلكەن سپورتتان قول ۇزگەننەن كەيىن تيمۋر كامال ۇلى قازىرگى بەسسايىستان قازاقستان قۇراماسىنىڭ اعا جاتتىقتىرۋشىسى بولسا, 1990 جىلى جاڭادان قۇرلىعان ۇوق-تىڭ تۇڭعىش پرەزيدەنتى بولىپ سايلاندى.
1964 جىلى رەسەيدەن قازاقستانعا قونىس اۋدارعان ەدۋارد ايريح كەلگەن بەتتە دوپتى حوككەيدەن جەرىگىلىكتى «دينامونىڭ» تىزگىنىن ۇستادى. مايتالمان ماماننىڭ جەتەكشىلىگىمەن الماتىلىقتار كسرو چەمپيونى اتانىپ, كۇمىس پەن قولا مەدالدى ءتورت رەتتەن يەلەندى. 1978 جىلى ايريحتىڭ كومانداسى ەۋروپا چەمپيوندارى كۋبوگىن ولجالادى. سونىمەن قاتار, ول كوگالداعى حوككەيدى دە دامىتۋعا ايرىقشا ۇلكەس قوستى. ەدۋارد فەرديناند ۇلى باپتاعان ۇجىم 1969-1988 جىلدار ارالىعىندا كەڭەس وداعى بىرىنشىلىگىنىڭ 14 دۇركىن جەڭىمپازى جانە ءتورت دۇركىن كۇمىس جۇلدەگەرى اتاندى. ال كسرو قۇراماسى ماسكەۋ وليمپياداسىندا قولا, ەۋروپا چەمپيوناتىندا كۇمىس جانە قۇرلىقارالىق كۋبوكتە باس جۇلدەنى ولجالادى. سوتسياليستىك مەملەكەتتەردىڭ باسىن قوسقان «دوستىق» ويىندارىندا بەس رەت توپ جاردى.
قازىبەك بايبولوۆتىڭ دا ەسىمى جانكۇيەرلەرگە جاقسى تانىس. جاس شىعىندا ول الماتىنىڭ «ديناموسىندا» ويناپ, كسرو چەمپيوناتىندا توعىز رەت جەڭىس تۇعىرىنا كوتەرىلدى. سول جۇلدەلەردىڭ تورتەۋى – كۇمىس جانە بەسەۋى – قولا. باپكەر رەتىندە باعىندىرعان بەلەستەرى ودان دا زور. ەدۋارد ايريحپەن يىق تىرەسىپ ەڭبەك ەتكەن قازىبەك داۋلەتبەك ۇلى دوپتى جانە كوگالداعى حوككەيشىلەرىمىزدىڭ جوعارىدا اتالعان جەتىستىكتەرگە جەتۋىنە سۇبەلى ۇلەس قوستى. ايريح پەن بايبولوۆ تاندەمى تاريبەلەگەن شاكىتتەر وسى سپورت تۇرلەرىندە تولاعاي تابىستارعا قول جەتكىزدى.