ەلىمىزدە جوعارى ءبىلىم جۇيەسى قارقىندى دامىپ كەلەدى

قازىرگى تاڭدا ەلىمىزدە 122 جوعارى وقۋ ورنى جۇمىس ىستەيدى. ونىڭ ىشىندە 10 زەرتتەۋ ۋنيۆەرسيتەتى, 23 شەتەلدىك جوعارى وقۋ ورىندارىنىڭ فيليالدارى بار. 2024-2025 وقۋ جىلىندا جوو-لاردا 680 مىڭنان استام ستۋدەنت ءبىلىم الادى. ونىڭ ىشىندە 624 500 ادام – باكالاۆرياتتا, 39 200 – ماگيستراتۋرادا, 7 600 – دوكتورانتۋرادا جانە 8 900 – رەزيدەنتۋرادا وقىپ جاتىر.

بيىل ەلىمىزدەگى شەتەلدىك ستۋدەنتتەر سانى 31,5 مىڭعا جەتتى. العاش رەت ازيا ەلدەرىنەن كەلگەن ستۋدەنتتەر سانى تمد ەلدەرىنەن كەلگەن ستۋدەنتتەر سانىنان اسىپ ءتۇستتى. ازيا ەلدەرىنەن – 17 456 ادام, ال تمد ەلدەرىنەن – 12 816 ادام.

2024 جىلى ەلىمىزدەگى جوعارى وقۋ ورىندارىن 177 586 تۇلەك اياقتادى. ونىڭ ىشىندە 149 160-ى باكالاۆريات, 26 093-ءى ماگيستراتۋرا مەن رەزيدەنتۋرا, ال 2 333-ءى دوكتورانتۋرا بويىنشا ديپلوم الدى. تۇلەكتەردىڭ باسىم بولىگى پەداگوگيكا, بيزنەس, قۇقىق, ينجەنەرلىك عىلىمدار, اقپاراتتىق تەحنولوگيالار جانە مەديتسينا سالالارىندا مامانداندى. ماسەلەن, پەداگوگيكالىق باعىتتا – 48 428, بيزنەس جانە قۇقىق سالاسىندا – 24 666, ينجەنەرلىك عىلىمداردا – 24 320, ءىت سالاسىندا – 13 393, دەنساۋلىق ساقتاۋ سالاسىندا – 10 300 جانە اۋىل شارۋاشىلىعى بويىنشا – 1 776 تۇلەك بىتىرگەن.

كەيىنگى 5 جىلدا مەملەكەت تاراپىنان بولىنەتىن ءبىلىم گرانتتارىنىڭ سانى 1,4 ەسەگە ارتتى. 2024-2025 وقۋ جىلىنا بارلىعى 93 116 گرانت ءبولىندى: ونىڭ 77 084-ءى باكالاۆرياتقا, 13 113-ءى ماگيستراتۋراعا, 2 919-ى دوكتورانتۋراعا ارنالعان. سونىمەن قاتار, بيىل 1 قىركۇيەكتەن باستاپ ستۋدەنتتەردىڭ ستيپەنديا مولشەرى دە ۇلعايادى. ەندى باكالاۆريات ستۋدەنتتەرى اي سايىن 52 372 تەڭگە, ماگيسترانتتار 117 098 تەڭگە, ال دوكتورانتتار 262 500 تەڭگە كولەمىندە شاكىرتاقى الادى. بۇل كورسەتكىشتەر 2020 جىلمەن سالىستىرعاندا باكالاۆرياتتا 2 ەسە, ماگيستراتۋرا مەن دوكتورانتۋرادا 1,75 ەسە وسكەن.

جاتاقحانا ينفراقۇرىلىمىن دامىتۋ جۇمىستارى دا جالعاسىپ جاتىر. 2019 جىلى ەلىمىزدە 82 500 ورىن تاپشىلىعى تىركەلسە, 2024 جىلى بۇل كورسەتكىش 14 873 ورىنعا دەيىن ازايدى. اسىرەسە, ەرەكشە ءبىلىم بەرۋ قاجەتتىلىگى بار ستۋدەنتتەرگە جاتاقحانادان ورىن بەرۋ قىزمەتى اۆتوماتتى, ياعني پرواكتيۆتى فورماتتا ۇسىنىلادى.

الداعى جىلى ەلىمىزدە 217 مىڭعا جۋىق وقۋشى مەكتەپ بىتىرەدى. ونىڭ ىشىندە 183 مىڭ تۇلەك ۇلتتىق بىرىڭعاي تەستىلەۋگە تىركەلگەن. بۇل وتكەن جىلمەن سالىستىرعاندا 30 مىڭ ادامعا كوپ. وسى مالىمەتتەردىڭ ءوزى ەلىمىزدەگى جوعارى ءبىلىم سالاسىنىڭ اۋقىمى كەڭەيىپ, قولجەتىمدىلىگى ارتىپ, حالىقارالىق دەڭگەيدە باسەكەگە قابىلەتتى بولۋعا باعىت الىپ كەلە جاتقانىن كورسەتەدى.