تۇماردىڭ جەڭىمپازدارى

بايقاۋعا 11 اتالىم بويىنشا جەتەكشى رەسپۋبليكالىق جانە وڭىرلىك تەلەارنالاردان 300-دەن استام ءوتىنىم كەلىپ ءتۇستى. قىسقا تىزىمگە 44 جۇمىس ەندى.

جەڭىمپازدارعا «تۇمار» مۇسىنشەسىمەن قاتار, وتاندىق تەلەۆيزيا سالاسىنداعى ەڭ جوعارى جەتىستىكتەرى ءۇشىن 1 ميلليون تەڭگە كولەمىندە اقشالاي سىياقى بەرىلدى.

بايقاۋ بارىسىندا مەملە­كەت­تىك كەڭەسشى ەرلان قارين قاتىسۋشىلارعا جىلى لەبىزىن ءبىلدىرىپ, «تۇمار» بايگەسىنىڭ ماڭى­زىن ايشىقتادى.

«بارشاڭىزدى كاسىبي مەرە­كە­لەرىڭىزبەن شىن جۇرەكتەن قۇت­تىق­­تايمىن! بۇكىل ەلدىك ءىس­تىڭ با­سى-قاسىندا وزدەرىڭىز جۇر­سىز­دەر. سوندىقتان اقوردادا وت­كەن ما­راپاتتاۋ راسىمىندە مەملە­كەت باسشىسى قاسىم-جومارت توقاەۆ جۋرناليستەردى «ەلدەگى رەفورمالاردىڭ قوزعاۋشى كۇشى» دەپ اتاپ ءوتتى. بۇل – ۇلكەن سەنىم ءارى زور جاۋاپكەرشىلىك. سەبەبى سىزدەردىڭ ەڭبەكتەرىڭىز قوعامنىڭ كوكەيىندەگى ماسەلەنى كوتەرىپ, بيلىك پەن بۇقارا اراسىندا التىن كوپىر بولىپ وتىر. مەنىڭ دە ەڭبەك جولىمنىڭ ءبىر كەزەڭى تەلەۆيزيامەن تىعىز بايلانىستى بولدى. 2000-جىلداردىڭ باسىندا «حابار» تەلەارناسىندا حالىقارالىق شوۋ-باعدار­لامانى جۇرگىزدىم. جىلدا وسى كاسىبي مەرەكە قارساڭىندا «تۇمار» بايقاۋىندا باس قوسۋ  جاقسى داستۇرگە اينالدى. كەلەر جىلى وسى بايگەنىڭ ونجىل­دىق مەجەسىن  وتكەرەمىز. ءوز باسىم بۇل بايقاۋ­دىڭ ۇزىلمەي, تۇراقتى ءوتىپ كەلە جاتقانىنا ەرەكشە قۋانا­مىن. سەبەبى «تۇمار» – قازاق تەلە­ۆيزياسىنداعى پۋبلي­تسيستي­كانىڭ وزىندىك ءبىر تاريحى مەن ءداستۇرىن جالعاستىرىپ كەلە جاتقان جوبا. كەز كەلگەن سالادا ۇرپاقتار ساباقتاستىعى – اسا ماڭىزدى قۇندىلىق. كۇنى كەشە مەملەكەت باسشىسىنىڭ ارداگەر جۋرناليستەرگە ارنايى قۇرمەت كورسەتۋىنىڭ تاعىلىمدىق ءمانى دە وسىندا», دەدى ەرلان قارين.

ايتا كەتەيىك, «تۇمار» ۇلتتىق بايقاۋى العاش رەت 2017 جىلى مادەنيەت جانە اقپارات مينيسترلىگىنىڭ باس­تاماسىمەن قۇرىلعان. باي­قاۋدىڭ باستى ماقساتى – وتان­دىق تەلەۆيزيانىڭ ساپالى دامۋىنا ىقپال ەتۋ, تەلەۆيزيالىق كونتەنت وندى­رىسىندە تالانتتى مامانداردى قولداۋ.

سونىمەن بيىلعى باي­قاۋدىڭ جەڭىمپازدارىنا توقتالساق, «ەڭ ۇزدىك الەۋمەتتىك تەلەجوبا» اتالىمى بويىنشا «Jibek joly» تەلەارناسىنىڭ «تازا قالا» جوباسى توپ جاردى. بۇدان بولەك, «جىلدىڭ ەڭ ۇزدىك رەپورتاجى» اتالىمىندا «مير» تەلەارناسىنىڭ «ۆ گوستياح ۋ كوچەۆنيكوۆ», «ەڭ ۇزدىك جۋرناليستىك زەرتتەۋ» اتالىمىندا «Atameken business» تەلەارناسىنىڭ  «اەس جانە ەنەرگەتيكالىق قاۋىپسىزدىك», «ەڭ ۇزدىك اقپا­رات­تىق-ساراپتامالىق باع­دار­ل­اما» اتالىمىندا «24KZ» تەلەار­ناسىنىڭ  «President» باعدارلاماسى, سونىمەن قاتار «جىلدىڭ ەڭ ۇزدىك تەلەحيكاياسى» اتالىمىندا  31 ارنانىڭ «12:00» تەلەحيكاياسى, «ەڭ ۇزدىك بالالار تەلەجوباسى» اتالىمىندا «Turkistan TV» تەلەارناسىنىڭ «تۇركىستان ساقشىلارى» تەلەجوباسى, «ەڭ ۇزدىك وڭىرلىك ارنا» اتالىمىندا «Saryarqa» تەلەارناسى, «ەڭ ۇزدىك دەرەكتى فيلم» اتالىمىندا «Jibek joly» تەلەارناسىنىڭ «چەلوۆەك س وستروۆا كۋلالى» دەرەكتى ءفيلمى وق بويى وزىق شىقسا, «ەڭ ۇزدىك تەلەجۋرناليست» اتالىمىندا «Qazaqstan TV» تەلەارناسىنىڭ ءتىلشىسى اقەركە بەكتاس, «ەڭ ۇزدىك تەلە­جۇر­گىزۋشى» اتالىمىندا «حابار» تەلەارناسىنىڭ ءتىلشىسى ءمولدىر دوسپاەۆا, سونداي-اق  «ەڭ ۇزدىك سپورتتىق كوممەنتاتور» اتالىمىندا «Qazsport» تەلەارناسىنىڭ ءتىلشىسى ەرىك ەرسىن جەڭىمپاز اتاندى.

ال «تۇمار-2025» ۇلتتىق تەلەۆيزيالىق بايقاۋى­نىڭ ارنايى جۇلدەسى «كتك» تەلەارناسىنا, «ەۋرازيا ءبىرىن­شى» ارناسىنا جانە «حابار» اگەنتتىگىنە تابىستالدى.

«تۇمار» ۇلتتىق تەلەۆيزيا­لىق بايگەسىنە «حابار» اگەنت­تىگى» اق جانە «Qazaqstan» رترك جانە «مەديا دامىتۋ قورى» كق, قازتەلەراديو, وتاۋ TV, Galam TV, Sport+, «قازاقتەلەكوم» اق  سىندى وتاندىق بىرەگەي كومپانيالار قولداۋ كورسەتتى.