ەلىمىزدەگى باس گازەت بەتىندە ساياسات پەن ەكونوميكادان باستاپ رۋحاني دۇنيەلەر دە مولىنان كەزدەسەدى. باسىلىمنىڭ تۇراقتى وقىرمانى رەتىندە ماعان «جادىگەر» ايدارى اياسىندا بەرىلەتىن ماقالالار قىزىقتى.
قازىر ۇمىتىلا باستاعان تالاي جادىگەردى ۇلتتىق مۇرا رەتىندە دارىپتەپ جۇرگەن باسىلىم ءتىلشىسى بەكەن قايرات ۇلىنىڭ جازعانىن ىزدەپ ءجۇرىپ وقيمىن. كونە قالالار كومبەسى, ەسىمى ەلگە بەلگىلى تالاي تۇلعا تۇتىنعان م ۇلىكتەر, بەلگىلى تۋىندىلاردىڭ بىزگە بەيمالىم تاريحى تۋرالى ماقالالارىن ساقتاپ قويامىن. سوڭعى بەتتەگى «عالام عاجاپتارى» ايدارىمەن بەرىلەتىن شاعىن عانا دۇنيەلەردە ادامنىڭ تانىم اياسىن كەڭەيتە تۇسەتىن دەرەك مولىنان كەزدەسەدى.
وسىدان 3 جىل بۇرىن گازەتتە زامانىندا بالالارىن بىلىمگە باۋلىپ, قازاق قوعامىنا ايتارلىقتاي ىقپال ەتكەن مۇڭايتپاس لاپين اۋلەتى جاتقان قورىمنىڭ قاراۋسىز قالعانى تۋرالى ماقالا جاريالاندى. سىر توپىراعىندا تۇڭعىش رەت ەۋروپالىق ۇلگىدە ءبىلىم بەرەتىن «حان مەكتەبىن» اشقان مۇڭايتپاس پەن ونىڭ اۋلەتى تارتقان ازاپ-مەحناتتىڭ شەت-شەگى جوق. ولار ماڭگىلىك مەكەن تاپقان قورىمنىڭ قاراۋسىز قالىپ, جان-جاعىن يت تۇمسىعى باتپايتىن شەڭگەل باسىپ بارا جاتقانى دا جانىمىزعا باتاتىن ەدى. «قۇمدا قالعان قايراتكەر» اتتى سول ماقالا ەل ازاماتتارىنىڭ جۇمىلىپ, اۋدان, اۋىل اكىمدىكتەرىنىڭ كومەگىمەن قورىمعا اپاراتىن جولدى تەگىستەپ, قايراتكەردىڭ باسىنا بەلگىتاس ورناتىپ, اتى وشۋگە اينالعان تۇلعانى قايتادان حالىققا تانىستىرۋىنا تۇرتكى بولدى.
ەل ىشىندەگى تالاي جادىگەردى جۇرتقا تانىستىرعان باس باسىلىمنىڭ قوعامنىڭ رۋحاني دامۋىنا قوسىپ كەلە جاتقان ۇلەسى ۇلكەن ەكەنىن ايتا الامىز.
جۇماباي بايزاق ۇلى,
زەينەتكەر
قىزىلوردا وبلىسى,
سىرداريا اۋدانى