ەلىمىزدىڭ باس گازەتىن سوناۋ شەرحان مارقۇمداردىڭ كەزىنەن بەرى ۇزبەي وقىپ كەلەمىن. «Egemen Qazaqstan» گازەتى تاۋەلسىزدىك جىلدارىنداعى اينىماس سەرىگىم دەسە دە بولادى.
جاسىم 75-تەن اسسا دا, گازەتتى ۇزبەي الىپ وتىرامىن. وزىمە ۇناعان ماقالالاردى قيىپ الىپ قويامىن. رۋحاني قۇندىلىقتار تۋرالى, ەلەۋلى تۇلعالار تۋرالى ماقالالاردى ۇناتىپ وقيمىن. اسىرەسە ساراپتامالار ۇنايدى. ءوز ماماندىعىم زووتەحنيك بولعان سوڭ, اۋىل شارۋاشىلىعى سالاسىنا بۇيرەگىم بۇرىپ تۇرادى. گازەتتە ەلىمىزدىڭ اۋىل شارۋاشىلىعىن قالاي دامىتۋ جونىندە ساراپتاما ماتەريالدار جيىرەك شىقسا, جاقسى بولار ەدى. ازىرگە ونداي ماقالا ازداۋ سياقتى. ءبىزدىڭ جەرىمىز كەڭ, اۋىل شارۋاشىلىعىنا كوبىرەك كوڭىل ءبولۋىمىز كەرەك. سوسىن ەكونوميكانىڭ دامۋ بارىسى جونىندە ماماندار پىكىرى, ساراپتاما كوبىرەك بولسا يگى. ارينە, بۇل تاقىرىپتى تىلشىلەر جازىپ جاتىر, بىراق كاسىبي ماماننىڭ جازۋى بولەك قوي.
قازىر بايقاعانىم, گازەتتە اقپارات, كۇندەلىكتى جاڭالىقتار باسىم بەرىلەدى. ال گازەت اۋىلعا, بىزگە جەتكەنشە ول جاڭالىقتىڭ ءمانى قالمايدى. سوندىقتان ءوز باسىم گازەتتەن كولەمدى ساراپتاما كۇتەمىن. كەيىنگى كەزدەرى ماقالالاردان ولجاس سۇلەيمەنوۆ تۋرالى جازىلعان ەسسە ۇنادى. سوسىن ەكىنشى دۇنيەجۇزىلىك سوعىس – سۇيىكتى تاقىرىبىم. كەيىنگى كەزدەرى شىققان باۋىرجان مومىش ۇلى, ءاليا مولداعۇلوۆا تۋرالى جاقسى ماقالالاردى تۇشىنىپ وقىدىم. گازەت ۇجىمىنا تابىس تىلەيمىن!
ءۋاليوللا ابىشەۆ,
ەڭبەك ارداگەرى
باتىس قازاقستان وبلىسى,
قازتالوۆ اۋىلى