مەن – كوپ وقيتىن ادامداردىڭ ءبىرىمىن. ءارىپ تانىعالى وقىپ كەلەمىن دەسەم دە بولادى. ءالى كۇنگە گازەتسىز كۇنىم ءمانسىز كورىنەدى.
بۇعان, مۇمكىن, اكەمنىڭ اسەرى دە بولعان شىعار. ولاي دەيىن دەسەم, بىرگە تۋعان باۋىرلارىمنىڭ ءبارى بىردەي وقۋعا قۇمارتقان جوق. سەگىز بالانىڭ ىشىندە ۇران دەگەن ءىنىمىز ەكەۋمىز كوپ وقيتىنبىز. ءبىر ماقالامدا اكەمنىڭ مەكتەپتە جۇمىس ىستەيتىن ءبىر سىڭلىمە: «نەگە گازەت وقىمايسىڭ, مۇعالىم ەمەسسىڭ بە؟» دەگەن ءسوزىن كەلتىرگەن ەدىم.
اكەم اۋداندىق گازەتتەن باستاپ, وبلىستىق, رەسپۋبليكالىق گازەت-جۋرنالداردى (ونىڭ ىشىندە «سوتسياليستىك قازاقستان», «مادەنيەت جانە تۇرمىس», «قازاقستان ايەلدەرى», ت.ب.) جازدىرىپ الاتىن. بىزگە ارناپ «بالدىرعان», «قازاقستان پيونەرى» باسىلىمدارىن الدىراتىن. گازەتتىڭ ءبىر ءنومىرى كەلمەي قالسا, جۇگىرىپ پوشتاعا باراتىنمىن.
تۇراقتى تۇردە وقۋ ادامنىڭ كوكجيەگىن كەڭەيتىپ, ونىڭ ءىرى تۇلعاعا دەگەن قىزىعۋشىلىعىن ارتتىرادى. مىنا ءبىر دەرەك ەسىمدە قالىپتى: «سوتسياليستىك قازاقستان» گازەتىنەن (1964 جىلعى ءبىر نومىرىنەن) قانىش ساتباەۆتىڭ قايتىس بولعانى تۋرالى وقىدىم.
كەيىن ارنايى وقۋ ورنىن ءبىتىرىپ, وقىتۋشىلىق قىزمەتكە تۇرعاننان كەيىن باسىلىمداردى ءوزىم جەكە جازدىرىپ الاتىن بولدىم. بالا كەزىمنەن كۇنى بۇگىنگە دەيىن قول ۇزبەي جازدىرىپ الاتىن گازەتىم – «Egemen Qazaqstan». ەلمەن ەتەنە سانالاتىن باسىلىم بەتتەرىنەن تانىس تۇلعالاردى ءبولىپ-جارمايمىن. ايتسە دە, جاراسباي سۇلەيمەنوۆ, مەيرامبەك تولەپبەرگەن, جانبولات اۋپباەۆ سىندى قالامگەرلەردىڭ ماقالالارىن ۇناتىپ وقيتىنمىن. ولاردىڭ ىشىندە ج.سۇلەيمەنوۆتىڭ كىتاپتارى جەكە كىتاپحانا قورىما قوسىلعانىن ايتىپ وتسەم, ارتىق بولماس. بۇگىندە ولاردىڭ ورنىن وزگە اۆتورلار باستى. رۋحانيات سالاسىن قاۋزايتىن ايگۇل احانبايقىزىنىڭ ەسىمى جاقسى تانىس. ارينە, وبلىس جاڭالىقتارى – باستى نازارىمدا.
بيالاش سۇيىنكينا,
قوستاناي قالاسىنىڭ تۇرعىنى