قاي ماراپات بولسىن, شىن يەسىن تابۋىمەن قۇندى. تالانتى تاس جاراتىن, ەڭبەگى تالاس تۋدىرمايتىن لايىقتى ازامات ناعىز باعاسىن السا, ءوزىمىز ماراپاتتالعانداي مارقايىپ قالاتىنىمىز بار. ءوزىمىز دەيتىن ءجونىمىز, كەشە عانا مەملەكەت باسشىسى قاسىم-جومارت توقاەۆ «Egemen Qazaqstan» گازەتى باس رەداكتورىنىڭ ورىنباسارى تالعات باتىرحانعا بۇقارالىق اقپارات قۇرالدارى سالاسىنداعى پرەزيدەنت سىيلىعىن تابىستادى.
وسىنداي سىيلىقتىڭ تورەسىمەن جۋرناليستەر كۇنى قارساڭىنداعى ماراپاتتار تيەگى اعىتىلدى. پرەزيدەنت ءوز قولىمەن تابىستاعان ديپلومدا بۇل سىيلىق تالعات باتىرحانعا «وتاندىق جۋرناليستيكانى دامىتۋعا قوسقان ۇلەسى ءۇشىن بەرىلدى» دەپ جازىلعان. مەملەكەت باسشىسىنىڭ وسى باعاسى – قارىمدى قالامگەردىڭ ۇلت باسپاسوزىندەگى ءونىمدى دە ونەگەلى ەڭبەك جولىنىڭ ايقىن كورسەتكىشى. كوزى قاراقتى وقىرمان تالعات باتىرحاننىڭ ەسىمى مەن سالماقتى ماقالالارىنا «استانا اقشامى», «ايقىن», «Egemen Qazaqstan» باسىلىمدارى ارقىلى قانىقتى.
سونداي-اق ءدال وسىنداي سىيلىقتى «قازاق گازەتتەرى» جشس-نا قاراستى «كازاحستانسكايا پراۆدا» گازەتىنىڭ ءبولىم مەڭگەرۋشىسى يۋليا ماگەر دە يەلەندى. وسى كۇنى پرەزيدەنتتىڭ باق سالاسىنداعى العىسى سەرىكتەستىك قۇرامىنداعى «Ana tili» گازەتىنىڭ ۇجىمىنا دا بەرىلدى.
«قازاق گازەتتەرى» جشس باس ديرەكتورىنىڭ ورىنباسارى قامبار احمەت پرەزيدەنت جارلىعىمەن مەملەكەتتىك ناگرادا – «ەرەن ەڭبەگى ءۇشىن» مەدالىمەن ماراپاتتالدى. مەرەكە قارساڭىندا «Amanat» پارتياسى دا جۋرناليستەر اراسىندا وتكىزىلەتىن ءداستۇرلى رەسپۋبليكالىق «Amanat مەديا» سىيلىعىنىڭ قورىتىندىسىن شىعارىپ, ءتۇرلى اتالىم بويىنشا 11 جەڭىمپازدى انىقتادى. قامبار احمەت وسى بايقاۋ جەڭىمپازدارىنىڭ قاتارىنان تابىلدى. ارىپتەسىمىز «زاڭ مەن ءتارتىپ» – كونستيتۋتسيانىڭ 30 جىلدىعىنا ارنالعان ۇزدىك ماتەريال» اتالىمىنىڭ يەگەرى اتانىپ وتىر.
سونداي-اق گازەتىمىزدىڭ اقمولا وبلىسىنداعى مەنشىكتى ءتىلشىسى بايقال ءبايادىل جۋرناليستەر وداعىنىڭ شەشىمىمەن «قازاقستاننىڭ قۇرمەتتى ءجۋرناليسى» اتاعىنا يە بولدى. بۇعان قوسا ول دا «ەرەن ەڭبەگى ءۇشىن» مەدالىمەن ماراپاتتالدى. ءدال وسىنداي مەدالگە شىعىس قازاقستان وبلىسىنداعى مەنشىكتى ءتىلشىمىز مەرەي قاينار ۇلى دا يە بولدى.
ال گازەتىمىزدىڭ ينتەرنەت-رەداكتسياسىنىڭ جەتەكشىسى دينار كەرىم مەملەكەتتىك ناگرادالاردىڭ ءبىرى – «شاپاعات» مەدالىن يەلەندى.
ارىپتەستەرىمىز ەلىمىزدىڭ زاڭ شىعارۋشى ورگانى – پارلامەنتتىڭ قوس پالاتاسى جاريالاعان بايقاۋدا دا ولجالى شىقتى. «Egemen Qazaqstan» گازەتى ساياسات جانە قۇقىق ءبولىمىنىڭ اعا ءتىلشىسى گۇلنار جولجان سەنات ۇيىمداستىرعان «پاراسات» بايقاۋىنداعى باسىلىمدىق باق-تاعى ۇزدىك جاريالانىمنىڭ جەڭىمپازى اتانسا, وسى ءبولىمنىڭ ءتىلشىسى زەيىن ەرعالي «ۇزدىك باسپا جاريالانىمى ءۇشىن» اتالىمىندا ءماجىلىستىڭ «پارلامەنت ءسوزى» سىيلىعىنا يە بولدى.
اعا ءتىلشى ەسكەندىر زۇلقارناي جۋرناليستەر وداعى سىيلىعىنىڭ لاۋرەاتى اتاندى.
گازەتىمىزدىڭ الماتى قالاسىنداعى مەنشىكتى تىلشىلەرىنىڭ ءبىرى ارمان وكتيابر الماتى قالاسى اكىمدىگى قوعامدىق دامۋ باسقارماسى مەن وڭىرلىك كوممۋنيكاتسيالار قىزمەتى باق وكىلدەرى اراسىندا ۇيىمداستىرعان الماتىنىڭ دامۋىن ناسيحاتتاعان ۇزدىك جۋرناليستەر بايقاۋىنىڭ «ۇزدىك جۋرناليست-ساراپشى» اتالىمىنىڭ جەڭىمپازى اتاندى.
الماتى وبلىسىنداعى مەنشىكتى ءتىلشىمىز ۇلبوسىن يسابەك پەن جامبىل وبلىسىنداعى مەنشىكتى ءتىلشىمىز تابيعات مۇسىلمانقۇل وبلىس اكىمىنىڭ قۇرمەت گراموتاسىمەن ماراپاتتالىپ, سىي-سياپاتقا يە بولدى.