قارجى ءمينيسترى ءمادي تاكيەۆ «ۇلتتىق قور – بالالارعا» جوباسى اياسىندا ءاربىر قازاقستاندىق بالاعا قانشا قاراجات اۋدارىلعانىن مالىمدەدى, دەپ حابارلايدى Egemen.kz.
بۇگىن پارلامەنت پالاتالارىنىڭ بىرلەسكەن وتىرىسىندا ۇكىمەت پەن جوعارى اۋديتورلىق پالاتا 2024 جىلعى رەسپۋبليكالىق بيۋدجەتتىڭ ورىندالۋى بويىنشا ەسەپ بەردى.
ءمينيستردىڭ ايتۋىنشا, سوڭعى ەكى جىل ىشىندە 7 ميلليونعا جۋىق بالاعا 233 اقش دوللارى كولەمىندە قاراجات ەسەپتەلگەن. تەك 2024 جىلى باعدارلاماعا 6 919 131 بالا قاتىسقان, ولاردىڭ ارقايسىسىنىڭ شوتىنا 100,52 دوللاردان تۇسكەن. جالپى اۋدارىلعان سوما 695,5 ميلليون اقش دوللارىن قۇرادى.
«ۇلتتىق قوردىڭ اكتيۆتەرى 2023 جىلى 16 پايىزعا ءوسىپ, 66,2 ميلليارد دوللارعا جەتتى», دەدى ءمادي تاكيەۆ.
مينيستر سونداي-اق ەل ەكونوميكاسىنىڭ ءوسىمى تۋرالى دا مالىمەت بەردى. 2024 جىلى ءجىو 4,8 پايىزعا ۇلعايعان. بۇل ءوسىم نەگىزىنەن مۇنايعا قاتىسى جوق سەكتوردىڭ ەسەبىنەن قامتاماسىز ەتىلدى. ال بيىلعى جىلدىڭ 5 ايىندا ءجىو ءوسىمى 6 پايىزدى قۇراعان.
سونىمەن قاتار مادي تاكيەۆتىڭ ايتۋىنشا, 2024 جىلدىڭ قورىتىندىسى بويىنشا رەسپۋبليكالىق بيۋدجەتكە 19,6 ترلن تەڭگە ءتۇستى, بۇل جىلدىق جوسپاردىڭ 97,2%-ىن قۇرايدى. قاراجاتتىڭ ءتۇسۋىنىڭ تومەندەۋى ءۇشىنشى ەلدەردەن يمپورتتىڭ ازايۋىنا جانە تەڭىز كەن ورنىندا كەڭەيتۋ جونىندەگى جوبانى ىسكە قوسۋدىڭ كەيىنگە قالدىرىلۋىنا بايلانىستى.