قازاقستاندىق ايگىلى وپەرا ءانشىسى ماريا مۋدرياك قىتايدا العاش رەت ۆولفگانگ امادەي موتسارتتىڭ «فيگارونىڭ ۇيلەنۋى» وپەراسىنداعى گرافينيا الماۆيۆا پارتياسىن ورىندايدى. قويىلىمدار 15, 17 جانە 19 شىلدە كۇندەرى بەيجىڭدەگى ۇلتتىق ورىنداۋشىلىق ونەر ورتالىعىندا, ال 8–10 تامىز ارالىعىندا سيان قالاسىنداعى Grand Opera House ساحناسىندا وتەدى, دەپ حابارلايدى Egemen.kz.
مادەنيەت جانە اقپارات مينيسترلىگىنىڭ مالىمەتىنشە, بۇل ماريا مۋدرياكتىڭ قىتايعا بەسىنشى گاسترولدىك ساپارى. بۇعان دەيىن ول وسى تۋىندىدا سيۋزاننانىڭ پارتياسىن ورىنداعان بولسا, ەندى العاش رەت كۇردەلى ءارى ەموتسياعا تولى گرافينيا الماۆيۆانىڭ بەينەسىن ساحنالايدى. بۇل ءرول ايەل بولمىسىنىڭ نازىك سەزىمدەرى مەن ىشكى كۇرەسىن جەتكىزەتىن درامالىق كەيىپكەر رەتىندە وپەرا تۋىندىسىنىڭ ماڭىزىن ارتتىرادى.
ماريا مۋدرياك قازاقستاندا دۇنيەگە كەلگەن, ونەر جولىن ەرتە باستاعان تالانت. 10 جاسىنان باستاپ يتاليادا ۆوكالدان ءبىلىم الىپ, اتاقتى لا سكالا تەاترىنىڭ بالالار حورىندا ءان سالعان. كەيىن ميلان قالاسىنداعى دجۋزەپپە ۆەردي اتىنداعى كونسەرۆاتوريانى ۇزدىك اياقتاپ, بۇگىندە الەمدىك ساحنالاردا ونەر كورسەتىپ ءجۇر. ول قازىرگى تاڭدا الەمدەگى ەڭ ۇزدىك ون سوپرانونىڭ ءبىرى رەتىندە مويىندالعان.
ء«انشىنىڭ قىتايعا ساپارى — ونىڭ حالىقارالىق مانسابىنداعى تاعى ءبىر ماڭىزدى قادام. بۇل گاترولدىك ساپاردا قىتايلىق كورەرمەن ونەرپازدىڭ قايتالانباس زور داۋىسى مەن اكتەرلىك شەبەرلىگىن تاماشالاي الادى», دەلىنگەن حابارلامادا.