ىشكى نارىقتى وتاندىق تاۋارلى بالىقپەن تولىقتىرۋ ماڭىزدى مىندەت. تاياۋدا مەملەكەت باسشىسى قاسىم-جومارت توقاەۆ «اكۆامادەنيەت تۋرالى» زاڭعا قول قويدى, دەپ جازادى Egemen.kz.
زەرەندى كولىنىڭ جاعاسىنداعى بالىق تالىمباعى الپىس جىلدان استام ۋاقىت بويى جۇمىس ىستەپ كەلەدى. تالىمباقتىڭ تسەحتارىندا اقبالىق پەن تۇقى وسىرىلۋدە. دەرناسىلدەر ءوسىپ جەتىلگەن سوڭ كولگە جىبەرىلەدى. كاسىپورىن اۋماعىندا 240 گەكتار توعان شارۋاشىلىعى جۇمىس ىستەيدى.
–جىل سايىن ءبىز وسى توعانداردا مەليوراتسيالىق جۇمىس جۇرگىزەمىز, – دەيدى زەرەندى بالىق شارۋاشىلىعى كاسىپورنىنىڭ ديرەكتورى ۆالەري پونامورەنكو, – بالدىردان تازالايمىز, تۇقى قۇرتىمەن قورەكتەندىرىپ, بالىقتاردى وسىرەمىز. ادەتتە ءبىز تۇقى تۇقىمىن تامىز, قىركۇيەك ايلارىندا الامىز.
كاسىپورىندا 24 ادام جۇمىس ىستەيدى. ولاردىڭ بارلىعى ءوز ىستەرىنىڭ شىنايى ماماندارى. ايماقتا بالىق وسىرۋگە قولايلى 632 سۋ قويماسى بار. ونىڭ 360-ى بالىقپەن اينالىساتىن شارۋاشىلىقتارعا بەكىتىلگەن, قالعانى رەزەرۆتىك قوردا.
–تاۋارلى بالىق ءوسىرۋ شارۋاشىلىعىن دامىتۋ ءۇشىن 169 سپورتتىق اۋەسقويلىق باعىتتاعى 8 جانە كاسىپتىك بالىق اۋلاۋ ءۇشىن 103 سۋ ايدىنى بەلگىلەنگەن, – دەيدى ەسىل وبلىسارالىق باسسەيندىك بالىق شارۋاشىلىعى ينسپەكتسياسىنىڭ ءبولىم باسشىسى سانسىزباي ىدىرىسوۆ, – بىلتىر جوسپار بويىنشا 1520 توننا تاۋارلى بالىق ءوسىرۋ مەجەلەنسە, تابيعاتتى پايدالانۋشىلار بۇل كورسەتكىشتى اسىرا ورىندادى. بيىل ەكى مىڭ توننا بالىق اۋلاۋدى كوزدەپ وتىرمىز.
وڭىردە بەس اي ىشىندە 335 توننا بالىق وسىرىلگەن. قوڭىر كۇزدە اقبالىق پەن تۇقى اۋلاۋ مولشەرى ارتا تۇسەدى. ەلىمىزدە بالىق شارۋاشىلىعىن دامىتۋ باعدارلاماسىنا سايكەس 2030 جىلى 270 مىڭ توننا تاۋارلى بالىق ءوندىرۋ جوسپارلانىپ وتىر. الداعى ۋاقىتتا وبلىس ءوز ۇلەسىن ون مىڭ تونناعا جەتكىزبەك.
اقمولا وبلىسى