الماتى وبلىسىندا ءوڭىر اكىمى مارات سۇلتانعازيەۆتىڭ توراعالىعىمەن قۇقىقبۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسى ءوتتى. جيىن بارىسىندا 2025 جىلدىڭ العاشقى بەس ايىنىڭ قورىتىندىسى قارالىپ, قۇقىقتىق ءتارتىپتى نىعايتۋ, قوعامدىق قاۋىپسىزدىكتى ارتتىرۋ جانە الدىن الۋ شارالارىنىڭ باسىم باعىتتارى تالقىلاندى, دەپ حابارلايدى Egemen.kz.
مەملەكەتتىك ورگانداردىڭ ءوزارا ءتيىمدى ءىس-قيمىلى مەن كەشەندى ءتاسىلىنىڭ ناتيجەسىندە وڭىردە قۇقىقبۇزۋشىلىق دەڭگەيىنىڭ ايتارلىقتاي تومەندەگەنى اتاپ ءوتىلدى. قۇقىقتىق ستاتيستيكا جانە ارنايى ەسەپكە الۋ كوميتەتىنىڭ الماتى وبلىسى بويىنشا دەپارتامەنتىنىڭ ۋاقىتشا باسشىسى ماكسات ايتيمبەتوۆ ۇسىنعان دەرەكتەرگە سايكەس, قۇقىقبۇزۋشىلىق تۋرالى وتىنىشتەر مەن حابارلامالار سانى 11,5%-عا, ال تىركەلگەن قىلمىستىق قۇقىقبۇزۋشىلىقتار سانى 12,4%-عا ازايعان.
«قۇقىقبۇزۋشىلىق تۋرالى وتىنىشتەر مەن حابارلامالار سانى 35 069-دان 31 029-عا دەيىن قىسقاردى (–11,5%), ال تىركەلگەن قىلمىستىق قۇقىقبۇزۋشىلىقتار سانى 4 481-دەن 3 925-كە دەيىن تومەندەدى (–12,4%). اسا اۋىر قىلمىستار – 45,3%-عا, اۋىر قىلمىستار – 14,7%-عا, ال ونشا اۋىر ەمەس قىلمىستار – 16%-عا ازايدى. قاساقانا ادام ءولتىرۋ ەكى ەسەگە (28-دەن 14-كە دەيىن), ۇرلىق – شامامەن ۇشتەن بىرگە (922-دەن 653-كە دەيىن), ۇساق ۇرلىق – ءتورت ەسەدەن استام (518-دەن 112-گە دەيىن) تومەندەدى. قوعامدىق ورىندارداعى قۇقىقبۇزۋشىلىقتار – 19%-عا, ال الكوگولدىك ماس كۇيىندە جاسالعان قىلمىستار – 3%-عا ازايدى. ەسىرتكى اينالىمىنا قاتىستى, ساتۋ ماقساتىنسىز تىركەلگەن قۇقىقبۇزۋشىلىقتار 25,4%-عا قىسقاردى», دەلىنگەن حابارلامادا.
وبلىستىق پوليتسيا دەپارتامەنتىنىڭ باستىعى مەيرام ابىكەنوۆ بۇل وڭ ديناميكانىڭ كەشەندى الدىن الۋ شارالارىنىڭ ارقاسىندا مۇمكىن بولعانىن جەتكىزدى. ونىڭ ايتۋىنشا, الەۋەتتى قاۋىپ توندىرەتىن اۋماقتاردا جۇمىس قارقىنىن باسەڭدەتپەي, پروفيلاكتيكالىق شارالاردى كۇشەيتۋ قاجەت.
ءوز كەزەگىندە وبلىس پروكۋرورى بەرىك اداموۆ قىلمىستىڭ الدىن الۋدا زاماناۋي تەحنولوگيالاردىڭ ءرولىن اتاپ ءوتتى. ول وڭىردە كىسى ءولتىرۋ 75%-عا, ۇرلىق 37%-عا, مال ۇرلىعى 27%-عا ازايعانىن ايتتى. سونداي-اق, قوسىمشا 9 000 بەينەباقىلاۋ كامەراسىن ورناتۋ جوسپارى جاريالانىپ, بۇل «سوقىر نۇكتەلەردى» ازايتىپ, قاۋىپسىزدىك دەڭگەيىن ارتتىرۋعا سەپتىگىن تيگىزەتىنىنە سەنىم ءبىلدىردى.
جيىنعا سونىمەن قاتار ەكونوميكالىق تەرگەپ-تەكسەرۋ دەپارتامەنتىنىڭ باسشىسى دانيار اقجانوۆ, سىبايلاس جەمقورلىققا قارسى قىزمەت پەن ۇقك دەپارتامەنتىنىڭ وكىلدەرى قاتىسىپ, سالالىق ماسەلەلەر مەن ۇسىنىستارىن ورتاعا سالدى.
جازعى دەمالىس كەزەڭىندە بالالاردىڭ قاۋىپسىزدىگىنە ەرەكشە نازار اۋدارىلدى. جول-كولىك وقيعالارى مەن كامەلەتكە تولماعانداردىڭ قاتىسۋىمەن بولعان قايعىلى وقيعالارعا بايلانىستى ءبىلىم بەرۋ, كولىك جانە اۆتوموبيل جولدارى باسقارمالارىنىڭ باسشىلارى ەسەپ بەردى. سونىمەن قاتار, كەيبىر اۋدانداردا جەكەلەگەن قىلمىس تۇرلەرىنىڭ ءوسۋى تىركەلىپ, سول ءوڭىر اكىمدەرى ناقتى تۇسىنىكتەمە بەردى.
جيىندى قورىتىندىلاعان وبلىس اكىمى مارات سۇلتانعازيەۆ قىلمىستىڭ تومەندەۋى بارلىق مۇددەلى ورگانداردىڭ ۇيلەسىمدى جانە جاۋاپكەرشىلىكپەن اتقارعان جۇمىسىنىڭ ناتيجەسى ەكەنىن ايتتى.
«قىلمىستىڭ تومەندەۋى – بۇل ۆەدومستۆولاردىڭ ۇيلەسىمدى جانە جاۋاپكەرشىلىكپەن اتقارعان جۇيەلى جۇمىسىنىڭ جەمىسى. قابىلدانعان شارالار ناقتى ناتيجە بەرىپ جاتقانىن كورىپ وتىرمىز. باستى ماقسات – قىلمىستىڭ الدىن الۋ, ۋاقىتىلى ارەكەت ەتۋ جانە ءوڭىر تۇرعىندارىنىڭ قاۋىپسىزدىگىن قامتاماسىز ەتۋ. بۇل – ءبىزدىڭ نەگىزگى باسىمدىعىمىز», دەدى ءوڭىر باسشىسى.
كوميسسيا جۇمىستى جالعاستىرىپ, بولاشاقتا قۇقىقبۇزۋشىلىقتاردىڭ الدىن الۋمەن قاتار, وتكەن تاجىريبەدەن ساباق الىپ, قايتالانباۋىن قامتاماسىز ەتۋگە ەرەكشە نازار اۋداراتىن بولادى.