قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قىرعىزستاننىڭ چولپون-اتا قالاسىندا «ورتالىق ازيا – رەسەي» فورماتىندا وتكەن قاۋىپسىزدىك كەڭەستەرى حاتشىلارىنىڭ ەكىنشى كەزدەسۋىنە قاتىستى.
عيزات نۇرداۋلەتوۆ بايانداماسىندا ىنتىماقتاستىقتىڭ ناقتى باعىتتارىنا, سونىڭ ىشىندە تەرروريزم مەن ەكسترەميزم قاۋپىنە قارسى ءىس-قيمىل سالاسىنا توقتالدى. حالىقارالىق تەرروريستىك ۇيىمدار وزدەرىنىڭ يدەولوگياسىن تاراتۋ, قولداۋشىلاردى تارتۋ جانە ەلدەرىمىزگە كىرۋ ءۇشىن كۇننەن-كۇنگە كۇشەيىپ كەلە جاتقان جاھاندىق قايشىلىقتاردى, سونداي-اق كوشى-قون ۇدەرىستەرىن پايدالاناتىنى اتاپ ءوتىلدى. ەسىرتكى كونترابانداسى جانە ساۋداسىمەن, اسىرەسە پسيحواكتيۆتى زاتتار مەن سينتەتيكالىق ەسىرتكى قۇرالدارىنىڭ جاڭا تۇرلەرىنىڭ تارالۋى جاعدايىندا بىرلەسكەن كۇرەس تاعى ءبىر وزەكتى مىندەت بولىپ قالا بەرەدى. سونداي-اق كەزدەسۋ بارىسىندا ءوڭىردىڭ اقپاراتتىق, ەكولوگيالىق جانە سۋ-ەنەرگەتيكالىق قاۋىپسىزدىگى, كولىك-لوگيستيكالىق ينفراقۇرىلىمنىڭ ورنىقتىلىعى ماسەلەلەرى قارالدى.
ەسكە سالا كەتسەك, ورتالىق ازيا ەلدەرى جانە رەسەي قاۋىپسىزدىك كەڭەستەرى حاتشىلارىنىڭ ءبىرىنشى كەزدەسۋى 2023 جىلى ماۋسىمدا الماتىدا وتكەن ەدى.
وسى ساپارى بارىسىندا عيزات نۇرداۋلەتوۆ ۇجىمدىق قاۋىپسىزدىك تۋرالى شارت ۇيىمى قاۋىپسىزدىك كەڭەستەرى حاتشىلارى كوميتەتىنىڭ وتىرىسىنا قاتىستى. كەزدەسۋگە قاتىسۋشىلار ۇقشۇ-نىڭ جاۋاپتى ايماعىنداعى احۋال بويىنشا پىكىر الماستى. سونىمەن قاتار تاجىك-اۋعان شەكاراسىن نىعايتۋ جونىندەگى نىسانالى مەملەكەتارالىق باعدارلامانى ناقتى ىسكە اسىرۋ ماسەلەلەرىن قارادى, حالىقارالىق تەرروريزمگە, ەسىرتكى اينالىمىنا, زاڭسىز كوشى-قونعا قارسى كۇرەس, سونداي-اق مۇشە مەملەكەتتەردىڭ كيبەرقاۋىپسىزدىگىن قامتاماسىز ەتۋ جونىندەگى شارالاردى تالقىلادى.
عيزات نۇرداۋلەتوۆ ارىپتەستەرىنە ۇقشۇ قىزمەتىنىڭ وزەكتى باعىتتارى بويىنشا قازاقستاننىڭ ۇستانىمىن حاباردار ەتىپ, حالىقارالىق ۇيىمدار تۋرالى اقپارات الماسۋ جانە ولاردى قازىرگى قاقتىعىستار جاعدايىندا قايتا قۇرۋ قاجەتتىگىن اتاپ ءوتتى.
ۇقشۇ شەڭبەرىندە ءوزارا ءىس-قيمىل تەتىكتەرىن ودان ءارى جەتىلدىرۋگە جانە ۇجىمدىق قاۋىپسىزدىك سالاسىنداعى ۇيلەستىرۋدى نىعايتۋعا قاتىستى بىرقاتار قۇجاتقا قول قويىلدى.
بۇدان بولەك, قازاقستان رەسپۋبليكاسى قاۋىپسىزدىك كەڭەسىنىڭ حاتشىسى چولپون-اتادا I ۇقشۇ كيبەرقاۋىپسىزدىك جونىندەگى حالىقارالىق كونفەرەنتسياسىنا قاتىستى. ءىس-شارادا كيبەرقاۋىپسىزدىكتى قامتاماسىز ەتۋ سالاسىنداعى حالىقارالىق ىنتىماقتاستىق پەن قۇقىقتىق رەتتەۋ ماسەلەلەرى قارالدى. زاماناۋي تسيفرلىق تەحنولوگيالار, سونىڭ ىشىندە جاساندى ينتەللەكتىنىڭ جاھاندىق جانە ايماقتىق قاۋىپسىزدىككە اسەرىنىڭ الەۋەتتى اسپەكتىلەرى قاراستىرىلدى.
جيىنعا قازاقستاننان ۋاكىلەتتى مەملەكەتتىك ورگانداردىڭ وكىلدەرى قاتىستى.