«JastarX» ساراپتامالىق الاڭىنىڭ كەزەكتى ماۋسىمى باستالدى. استاناداعى «ÓzgeEpic» كرەاتيۆ حابىندا وتكەن العاشقى كەزدەسۋگە جاس كوشباسشىلار, ستۋدەنتتەر مەن ساراپشىلار قاتىستى. ولار تسيفرلاندىرۋدىڭ ازاماتتارعا اسەرى, كليماتتىق داعدارىسقا دەگەن كوزقاراس, قازىرگى قۇندىلىقتار مەن مىنەز-ق ۇلىق ۇلگىلەرى تۋرالى وي قوزعادى.
مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ قولداۋىمەن, «جاستار» عىلىمي-زەرتتەۋ ورتالىعىنىڭ باستاماسىمەن قولعا الىنعان بۇل جوباعا ەكى جىل بولدى. «JastarX» الاڭىندا ازاماتتار بەلگىلى ءبىر تاقىرىپ توڭىرەگىندە ءوز ويىن ەركىن ايتىپ, ەلدىڭ دامۋىنا نەگىز بولاتىن وڭتايلى شەشىمدەردى ۇسىنادى.
ماۋسىمنىڭ العاشقى جۇزدەسۋى «جاڭا بۋىننىڭ قۇندىلىقتارى: ۋاقىت كورىنىسى» تاقىرىبىنا ارنالدى. باسقوسۋدا جاستار عالىمدارمەن بىرگە قازىرگى قوعامداعى ولاردىڭ ءرولى, جاڭا الەۋمەتتىك ستراتەگيالاردى قالىپتاستىرۋعا قوسار ۇلەسى سەكىلدى ماڭىزدى ماسەلەلەردى تالقىلادى.
بۇعان قوسا جيىندا ء«تىل-قازىنا» ۇلتتىق عىلىمي-پراكتيكالىق ورتالىعىنىڭ وكىلى ايگەرىم سەرىكجانوۆا قازاق ءتىلىن تسيفرلاندىرۋ جوباسىن تانىستىرىپ, جاساندى ينتەللەكت نەگىزىندەگى TilQazyna LLM تىلدىك مودەلىن كورسەتتى. بۇل يننوۆاتسيالىق ءونىم قازاق ءتىلىنىڭ لەكسيكا, مورفولوگيا مەن سەمانتيكانىڭ تاعى باسقا سالاسىندا, ونىڭ ىشىندە قازاق تىلىندە ءماتىندى گەنەراتسيالاۋ, پەريفراز جاساۋ, كونتەكسپەن جۇمىس ىستەۋ, ىقشامداۋ, سونداي-اق گرامماتيكالىق جانە پۋنكتۋاتسيالىق قاتەلەردى تۇزەتۋ, فرازەولوگيزمدەردىڭ ءمانىن اشۋ, تەرميندەردى اۋدارۋ سىندى تاپسىرمالاردى ورىندايدى.
ال «United Central Asian Professionals» جوباسىنىڭ ۇيلەستىرۋشىسى جانە نازارباەۆ ۋنيۆەرسيتەتىنىڭ عىلىمي كومەكشىسى ارۋجان كاپاروۆا جاستاردىڭ كليماتتىق داعدارىستى ەڭسەرۋدەگى رولىنە نازار اۋداردى. ونىڭ ايتۋىنشا, جاس ۇرپاق كۇن تارتىبىندەگى ەكولوگيالىق ماسەلەلەرگە بەلسەندى ارالاسىپ, كليماتتىڭ وزگەرۋى سالدارلارىنىڭ كۇشەيۋىن ەسكەرە وتىرىپ, ورنىقتى بولاشاقتى قالىپتاستىرۋعا ۇلەس قوسۋعا ءتيىس.
ءوز كەزەگىندە «جاستار» عزو الەۋمەتتانۋلىق زەرتتەۋلەر جانە بولجاۋ باسقارماسىنىڭ جەتەكشىسى سابينا شايمەردەنوۆا جاستاردىڭ نەگىزگى قۇندىلىقتارى جونىندەگى كەيىنگى زەرتتەۋ ناتيجەلەرىمەن ءبولىستى. انىقتالعانداي, قازىرگى جاس بۋىن ءۇشىن باستى قۇندىلىقتار قاتارىندا وتباسى, دەنساۋلىق جانە تۇراقتىلىق ماڭىزدى. سونداي-اق ساۋالناما بارىسىندا ماماندار جاستاردىڭ تسيفرلىق تەحنولوگيالارعا جوعارى قىزىعۋشىلىعىن جانە الەۋمەتتىك جەلىلەردەگى ەرەكشە بەلسەندىلىگىن بايقاعان.
كامشات تولەگەنوۆا,
ل.ن.گۋميلەۆ اتىنداعى ەۇۋ-دىڭ 2-كۋرس ستۋدەنتى