الماتىداعى استانا الاڭىندا «جاستار رۋحى» جق باستاماسىمەن سالاۋاتتى ءومىر سالتىن دارىپتەيتىن «چەمپيوندىق رۋح» جوباسى اياسىندا كەڭ اۋقىمدى تاڭعى جاتتىعۋ ءوتتى, دەپ حابارلايدى Egemen.kz.
شارانىڭ باستى ماقساتى – جاستار مەن قالا تۇرعىندارىن سپورتقا باۋلۋ, بەلسەندى ءومىر ءسۇرۋدى ناسيحاتتاۋ جانە تاڭعى جاتتىعۋ مادەنيەتىن قالىپتاستىرۋ.
تاڭعى ساعات 08:00-دە باستالعان جاتتىعۋعا قالا تۇرعىندارى مەن ۇيىم جاستار, سونداي-اق پرەزيدەنت جانىنداعى مەملەكەتتىك باسقارۋ اكادەمياسىنىڭ قايتا دايارلاۋ كۋرسىندا دايارلاۋدان ءوتىپ جاتقان مەملەكەتتىك قىزمەتشىلەر قاتىستى. «چەمپيوندىق رۋح» جوباسى – بۇل تەك جاتتىعۋ عانا ەمەس, ول – جەڭىسكە جەتۋگە دەگەن ۇمتىلىستىڭ, ىشكى ءتارتىپ پەن رۋحتىڭ سيمۆولى. وسى جوبا الماتى قالاسىنان باستاۋ الىپ, ەلىمىزدىڭ بارلىق وبلىستارىندا جالعاسىن تاۋىپ كەلەدى. جوبانى قولداۋ ماقساتىندا شاراعا ەلىمىزدىڭ تانىمال سپورتشىلارى قاتىسىپ ءوز تاجىريبەسىمەن ءبولىستى.
يگى شارانىڭ قوناعى, كاسىپقوي بوكسشى, ورتا سالماقتىڭ سەركەسى قانات يسلام تاڭعى جاتتىعۋعا ارنايى قاتىستى.
«مەن رينگتە كوپ قارسىلاسپەن بەتپە-بەت كەلدىم, بىراق ەڭ ۇلكەن قارسىلاس – ءوزىمىزدىڭ ەرىنشەكتىگىمىز بەن قورقىنىشىمىز. تاڭعى جاتتىعۋ ارقىلى ءبىز ءوزىمىزدى جەڭەمىز. وسىنداي جوبالار جاس ۇرپاققا ۇلكەن سەرپىن بەرەدى. ەگەر ءار تاڭدى قوزعالىسپەن باستاساڭ – سەنىڭ كۇنىڭ عانا ەمەس, بۇكىل بولاشاعىڭ جەڭىسكە جەتەلەيدى», دەدى ق.يسلام.
«چەمپيوندىق رۋح» جوباسىنىڭ امباسسادورى نۇرسۇلتان ورىنباساروۆ سپورتتى سەرىك ەتۋ سەرگەكتىككە باستايتىنىن جەتكىزدى.
«چەمپيون بولۋ ءۇشىن تەك رينگتە جەڭۋ از. چەمپيوندىق – بۇل كۇندەلىكتى ءتارتىپ, تاڭدى ەرتە تۇرىپ, ءوز-وزىڭمەن كۇرەسۋ, رۋحاني توزىمدىلىك. ءبىز وسى جوبامەن جاستارعا ءبىر نارسەنى ايتقىمىز كەلەدى: جەڭىس ءار ادامنىڭ ىشىندە, ونى وياتۋ – ءوز قولىڭدا. تاڭعى جاتتىعۋ – كۇننىڭ ەمەس, بولاشاقتىڭ جەڭىسى. بۇل باستاما ارقىلى جاستاردىڭ جۇرەگىنە سەنىم ۇيالاتۋ – مەن ءۇشىن ۇلكەن مارتەبە», دەدى بىلىكتى سپورتشى.
الماتى قالاسى «جاستار رۋحى» توراعاسى ديداربەك دىلدابەك «چەمپيوندىق رۋح» بۇل جاي عانا سپورتتىق باستاما ەمەس, بۇل – جاستاردىڭ وي-ساناسىن وياتۋعا, كۇنىن بەلسەندىلىكپەن باستاۋعا, ءتارتىپ پەن تاباندىلىققا باۋلۋعا باعىتتالعان جوبا ەكەنىن اتاپ ءوتتى.
شاھار جاستارى مەن مەملەكەتتىك قىزمەتشىلەرىنىڭ ءبىر الاڭدا جينالۋى – ءبىزدىڭ قوعامدا سالاۋاتتى ءومىر سالتىنىڭ شىن مانىندە قۇندىلىققا اينالىپ كەلە جاتقانىن كورسەتەدى. «جاستار رۋحى» الداعى ۋاقىتتا دا جاستاردىڭ فيزيكالىق جانە رۋحاني دامۋىنا باعىتتالعان وسىنداي فورماتتاعى جوبالاردى تۇراقتى تۇردە ۇيىمداستىرۋعا ىقىلاستى», دەدى د.دىلدابەك.
ءىس-شارا كوڭىلدى اۋەنمەن, سپورتتىق جاتتىعۋلارمەن, قاتىسۋشىلارعا ارنالعان بەلسەندى ويىندارمەن كومكەرىلىپ, چەمپيونداردىڭ اسەرلى اڭگىمەلەرىنە ۇلاستى. اشىق اسپان استىندا وتكەن بۇل ءىس-شارا جاڭا كۇندى شابىتپەن باستاۋدىڭ تاماشا ۇلگىسىنە اينالسا يگى.