ماۋسىم ايىندا نە قىمباتتادى

Tele2 تاريفتەرى قىمباتتادى

2025 جىلعى 2 ماۋسىمنان باستاپ Tele2 ۇيالى بايلانىس وپەراتورى بىرقاتار تاريفتىك جوسپارلارعا سايكەس ابونەنتتىك تولەم مەن قىزمەت كولەمىن جاڭارتتى.

«كومپانيا جەلىنى دامىتۋ مەن جاڭعىرتۋ, ونى كۇتىپ-ۇستاۋ جانە جوندەۋ جۇمىستارىنا, سونىمەن قاتار جابدىقتاردىڭ قىمباتتاۋىنا بايلانىستى كەيبىر تاريفتەردى قايتا قارادى», دەلىنگەن رەسمي حابارلامادا.

ەلەكتر ەنەرگياسىنىڭ ءتاريفى دە ءوستى

2025 جىلعى 1 ماۋسىمنان باستاپ تالدىقورعاندا ەلەكتر ەنەرگياسىنىڭ ورتاشا بوساتۋ ءتاريفى 1 كۆت/ساع ءۇشىن 36,16 تەڭگەنى (ققس-سىز) قۇرادى. بۇل تۋرالى 25 ساۋىردە جاريالانعان رەسمي حابارلامادا ايتىلعان.

ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ ءبولىم باسشىسى مانار ابدامباەۆتىڭ ايتۋىنشا, ءتاريفتىڭ وسۋىنە بىرقاتار فاكتورلار اسەر ەتكەن.

«باستى سەبەپ — ەلەكتر ەنەرگياسىن جەتكىزۋ مەن تاراتۋ قىزمەتتەرىنىڭ قىمباتتاۋى. ايماقتىق جانە ايماقارالىق جەلىلىك ۇيىمداردىڭ تاريفتەرى 33,4 پايىزعا دەيىن وسكەن. بۇل وتكەن جىلمەن سالىستىرعاندا 3,82 تەڭگەگە (ققس-سىز) ارتىق», دەدى ول.

سونىمەن قاتار, ەلەكتر قۋاتىنىڭ دايىن بولۋىن قامتاماسىز ەتۋ قىزمەتىنىڭ باعاسى دا ايتارلىقتاي ارتقان. بىرىڭعاي ساتىپ الۋشىنىڭ جاڭا ەسەبى بويىنشا مۆت/ايىنا 454,3 ميلليون تەڭگە كولەمىندە ءوسىم تىركەلگەن. بۇل – 20 پايىزدان جوعارى.

الماتىدا دا جارىق قۇنى كوتەرىلەدى

1 ماۋسىمنان باستاپ الماتى قالاسىندا دا ەلەكتر ەنەرگياسىنىڭ ءتاريفى ءوسۋى مۇمكىن. قازىرگى ۋاقىتتا بۇل وزگەرىستەرگە قاتىستى جوبا ءتيىستى ساراپتامادان ءوتىپ جاتىر.

قازىر قالا تۇرعىندارى جارىق ءۇشىن 1 كۆت/ساع-قا 27,59 تەڭگە (ققس-سىز) تولەسە, جاڭا جوباعا ساي بۇل كورسەتكىش 29,52 تەڭگەگە دەيىن جەتپەك. ال جەكە كاسىپكەرلەر مەن كوممەرتسيالىق جالعا الۋشىلار ءۇشىن تاريف 38,66 تەڭگەگە, ال مەملەكەتتىك مەكەمەلەر ءۇشىن 111,72 تەڭگەگە دەيىن ءوسۋى ىقتيمال.

سونداي-اق, ەلەكتر قۋاتىن تۇتىنۋ كولەمىنە قاراي سارالانعان تاريفتەردى دە قايتا قاراۋ ۇسىنىلعان. ياعني, قانشالىقتى كوپ تۇتىنساڭىز – سونشالىقتى قىمبات تولەيسىز. جوبا قازىرگى تاڭدا تابيعي مونوپوليالاردى رەتتەۋ دەپارتامەنتىندە قارالۋدا. ەگەر ماقۇلدانسا, جاڭا تاريفتەر وسى ماۋسىمدا-اق كۇشىنە ەنەدى.

ايتا كەتەيىك, سوڭعى ءبىر جىلدا قازاقستان بويىنشا ەلەكتر ەنەرگياسى ءتاريفى ورتا ەسەپپەن 12 پايىزعا ءوستى. بۇعان دەيىن ەلوردادا دا وسىنداي وزگەرىستەر بولعانى حابارلانعان.

 

IELTS ەمتيحانى دا قىمباتتادى

2025 جىلعى 1 ماۋسىمنان باستاپ قازاقستاندا IELTS حالىقارالىق ەمتيحانىنىڭ باعاسى دا رەسمي تۇردە ءوستى. بۇل وزگەرىس الداعى جازدا جانە كەيىنگى ايلاردا تەست تاپسىراتىن ۇمىتكەرلەرگە قاتىستى.

جاڭا باعالار كەلەسىدەي:

IELTS Academic / General Training — 94 500 تەڭگە

IELTS UKVI — 106 000 تەڭگە

IELTS Life Skills — وزگەرىسسىز

Get Education ۇيىمىنىڭ رەسمي سايتىندا جاريالانعان تۇسىندىرۋدە ايتىلعانداي, باعا ءوسۋىنىڭ سەبەبى بىرنەشە فاكتورعا بايلانىستى. ولاردىڭ ىشىندە ۆاليۋتا باعامىنىڭ وزگەرىسى, تەستتى ۇيىمداستىرۋ شىعىندارى, فورماتتى جاڭارتۋ, لوگيستيكا مەن جالعا الۋ تولەمدەرى بار.

«بۇل — جىل سايىنعى جوسپارلى وزگەرىس. 2025 جىل دا بۇل داستۇردەن تىس قالعان جوق»,  دەلىنگەن حابارلامادا.

سايىپ كەلگەندە, ماۋسىم ايىنان باستاپ كۇشىنە ەنگەن تاريفتىك وزگەرىستەر حالىقتىڭ الەۋمەتتىك جانە ەكونوميكالىق تۇرمىس-تىرشىلىگىنە تىكەلەي ىقپال ەتىپ وتىر. ەلەكتر قۋاتى مەن بايلانىس قىزمەتىنىڭ قۇنى وسكەن جاعدايدا تۇتىنۋشىلار شىعىندارىن قايتا ەسەپتەۋگە ءماجبۇر. ال حالىقارالىق ەمتيحان باعاسىنىڭ كوتەرىلۋى بىلىمگە ۇمتىلعان جاستاردىڭ جوسپارلارىنا اسەر ەتۋى مۇمكىن. سوندىقتان باعانىڭ نەگىزسىز وسۋىنە جول بەرمەي, تاريفتىك ساياساتتىڭ اشىقتىعى مەن نەگىزدىلىگىن قامتاماسىز ەتۋ – بۇگىنگى كۇننىڭ وزەكتى مىندەتى.