ەلىمىزدە بالالاردى بالاباقشامەن قامتۋ دەڭگەيى ارتتى

مەملەكەت باسشىسىنىڭ تاپسىرماسى بويىنشا مەكتەپكە دەيىنگى ءبىلىم بەرۋ سالاسىندا قولجەتىمدىلىكتى, قىزمەت ساپاسىن جانە اشىقتىقتى ارتتىرۋعا باعىتتالعان جۇيەلى جۇمىس جۇرگىزىلىپ كەلەدى. 

2024 جىلدان باستاپ مەكتەپكە دەيىنگى ۇيىمداردا ۆاۋچەرلىك قارجىلاندىرۋدىڭ پيلوتتىق جوباسى ىسكە قوسىلدى. بۇگىنگى كۇنى بۇل جوبا وبلىستىق ماڭىزى بار 15 قالادا جانە ەلىمىزدىڭ ەكى وڭىرىندەگى 5 اۋداندا جۇزەگە اسىرىلۋدا. ولار تاراز, شىمكەنت, تۇركىستان, ورال, استانا, سەمەي, وسكەمەن, قوستاناي, قاراعاندى, پەتروپاۆل, پاۆلودار, جەزقازعان, تالدىقورعان, قوسشى, قوناەۆ قالالارى مەن جامبىل وبلىسىنىڭ بايزاق, سونداي-اق تۇركىستان وبلىسىنىڭ سارىاعاش, سايرام, ماقتاارال, قازىعۇرت, جەتىساي اۋداندارى.

«ۆاۋچەرلىك قارجىلاندىرۋ جۇيەسىنە 3 مىڭنان استام مەكتەپكە دەيىنگى ۇيىم قوسىلدى. وسى ۋاقىت ىشىندە 230 مىڭنان استام بالا مەكتەپكە دەيىنگى بىلىممەن قامتىلدى. تاراز, تۇركىستان, شىمكەنت, ورال, استانا قالالارىندا ۆاۋچەر جۇيەسى ەنگىزىلگەلى بەرى كەزەك 44%-عا قىسقاردى», دەيدى مەكتەپكە دەيىنگى ءبىلىم بەرۋ دەپارتامەنتىنىڭ ديرەكتورى مانار اداموۆا.

ماۋسىم-شىلدە ايلارىندا بۇل جوباعا اقتاۋ, اقتوبە, اتىراۋ, قىزىلوردا, الماتى قالالارى قوسىلادى. ال 2025 جىلدىڭ سوڭىنا دەيىن ەلىمىزدەگى بارلىق مەكتەپكە دەيىنگى ۇيىمدار وسى جۇيەگە ەنگىزىلەدى.

ايتا كەتەيىك, ۆاۋچەرلىك قارجىلاندىرۋ جۇيەسى بەلگىلەنگەن تالاپتارعا ساي كەلەتىن جانە بوس ورىندارى بار مەكتەپكە دەيىنگى ۇيىمدارعا قولجەتىمدىلىكتى قامتاماسىز ەتەدى.

اتا-انالارعا بالاباقشانى ءوز قالاۋى بويىنشا تاڭداۋ مۇمكىندىگى بەرىلگەن, بۇل جەكەمەنشىك قانا ەمەس, مەملەكەتتىك بالاباقشالار اراسىندا دا سالاۋاتتى باسەكەلەستىكتى قالىپتاستىرادى.

جۇيە ەڭ الدىمەن قارجىلاندىرۋ پروتسەسىنىڭ اشىقتىعىن قامتاماسىز ەتەتىن باستى شارتتى قامتيدى – «اقشا بالاعا بەرىلەدى». قاراجات اتا-انالار بالانىڭ قاتىسۋ تابەلىندەگى دەرەكتەردى راستاعاننان كەيىن عانا اۋدارىلادى.