الماتىدا اۋىل وقۋشىلارىنىڭ اۋقىمدى ءبىلىم بەرۋ سايىسى – IQanat وليمپياداسىنىڭ فينالى باستالدى. ونىڭ ىرىكتەۋ كەزەڭدەرى بۇكىل ەل بويىنشا ءبىر جىلدان بەرى ءوتىپ كەلدى. 50 مىڭنان استام سەگىزىنشى سىنىپ وقۋشىسى جوباعا قاتىسىپ, ولاردىڭ ىشىندە ۇزدىك مىڭ بالا فيناليست اتاندى, دەپ جازادى Egemen.kz.
وليمپيادا اياسىنداعى EQ-تەست
IQanat فيناليستەرى ەموتسيالىق ينتەللەكت, كوشباسشىلىق جانە كاسىپكە بەيىمدىلىك بويىنشا تەستتەن وتەدى. بۇل – ىرىكتەۋدىڭ جاڭا ستراتەگياسى. كوپ جاعدايدا بالانىڭ جەتىستىكتەرىن مەكتەپ پاندەرى بويىنشا ءبىلىمى ەمەس, «soft skills» داعدىلارى ايقىندايدى. وسىلايشا, بيىلدان باستاپ قورىتىندى تەستىلەۋدىڭ اكادەميالىق بولىگى 80%-دى قۇراسا, قالعان 20% بولىگى «جۇمساق» داعدىلارعا تيەسىلى بولادى.
ء«بىزدىڭ مىندەتىمىز – بالالاردىڭ اراسىنان ەڭ اقىلدىلاردى ەمەس, ەڭ ىنتالى, باستاماشىل جانە ءوز ارمانىنا قول جەتكىزۋ ءۇشىن كۇرەسۋگە دايىندارىن ىرىكتەۋ. EQ-تەست بىزگە مۇنداي بالالاردى ءتيىمدى تاڭداۋعا مۇمكىندىك بەرەدى, سونداي-اق, ەڭ ماڭىزدىسى – بالانى كەيىن قاي باعىتتا دامىتۋ كەرەكتىگىن ايقىنداپ بەرەدى. ەموتسيالىق ينتەللەكت يكەمدى دۇنيە, ەگەر بالا تالىمگەرلەر, تيۋتورلار جانە قولداۋ بار دۇرىس ورتاعا تاپ بولسا, ونىڭ كورسەتكىشتەرى جاقسارادى. مۇنداي ءتاسىل بالانىڭ قاي تۇسى مىقتى, ال قاي جاعىن دامىتۋ كەرەكتىگىن كورسەتىپ بەرەدى», - دەدى IQanat اكادەميالىق ديرەكتورى زۋحرا شەگەنوۆا.
وقۋ-جاتتىعۋعا تولى اپتا
تەستىلەۋ فينال اپتاسىنىڭ ءبىر عانا كۇنىندە وتەدى. ۋاقىتتىڭ نەگىزگى بولىگىن ۇيىمداستىرۋشىلار بالالاردى وقىتۋعا جانە ىنتالاندىرۋعا ارنايدى. جاساندى ينتەللەكت پەن مەدياساۋاتتىلىقتان باستاپ, كاسىبي باعدارلاۋ, بۇقارا الدىندا سويلەۋ جانە ويلاۋ ديزاينىنا دەيىنگى ءتۇرلى تاقىرىپتا ترەنينگتەر مەن دارىستەر بولادى. بالالار تانىمال بيزنەسمەن, بلوگەرلەرمەن كەزدەسىپ, ينتەراكتيۆتى عىلىمي تاجىريبەلەرگە, reading-چەللەندجدەرگە قاتىسادى, ال ەرەسەك بالالار Peer-to-Peer جوباسى اياسىندا قاتىسۋشىلاردىڭ ءبىلىمىن تولىقتىرۋعا كومەكتەسەدى.
ايتا كەتەيىك, IQanat – قازاقستان كاسىپكەرلەرىنىڭ ءبىلىم بەرۋ جوباسى, قازىر جوبا قوعامداستىعىندا 220 مەتسەنات بار, ولاردىڭ ءاربىرى ءوز ءوڭىرىنىڭ بالالارىنا قامقورلىق تانىتىپ, ولاردىڭ دامۋىنا ۇلەسىن قوسادى.
«بالالاردىڭ كوپشىلىگى ءۇشىن بۇل – ءوز اۋىلىنان, ءوز وڭىرىنەن تىس ۇلكەن قالاعا العاشقى ساپارى. ولار تۇڭعىش رەت ۋنيۆەرسيتەتتەردى, بيزنەس ورتالىقتاردى, ۇلكەن داڭعىلداردى كورەدى. ولاردىڭ ساناسىندا «نەگە مەن ەمەس؟» دەگەن باستى سۇراق تۋادى. نەگە مەن وسىندا وقىپ, ەلىمىزدى وزگەرتۋگە جۇمىس ىستەمەيمىن؟ ءبىز بالالاردى ونلاين فورماتتا دا تەستىلەي الامىز, بىراق سەگىزىنشى سىنىپ وقۋشىلارىن ادەيى بۇكىل ەلدەن جيناپ, باسىن قوسامىز. ولار ءوز اۋىلدارىنىڭ سىرتىندا ۇلكەن الەم بارىن كورىپ, ەڭ باستىسى, ءوز ارمان-ماقساتتارىنا قول جەتكىزۋگە بولاتىنىن تۇسىنەدى», - دەدى ... وبلىسىنىڭ قامقورشىسى.
مەدەۋدەگى ماڭىزدى كەش
وليمپيادا مەدەۋ تاۋ شاتقالىنداعى ستاديوندا قورىتىندىلانىپ, ۇزدىك وقۋشىلاردى ماراپاتتاۋ ءراسىمى وتەدى. وقۋشىلاردىڭ ءبىر بولىگى بۋرابايداعى IQanat High School of Burabay مەكتەپ-پانسيوناتىندا ءبىلىم الۋ گرانتىنا يە بولادى. ولاردىڭ وقۋعا قاتىستى بارلىق شىعىنى وتەلەدى. وقۋشىلاردىڭ ەكىنشى بولىگى IQ ADVANCED تەرەڭدەتىپ وقۋ باعدارلاماسىنا قاتىسسا, ءۇشىنشى بولىگى IQ-IP ءۇش جىلدىق باعدارلاماسىنا قوسىلادى. ونىڭ اياسىندا بالالار جوعارى وقۋ ورىندارىنا تۇسۋگە ونلاين دايىندالادى.
IQanat – اقىلدى ءارى جۇيەلى قايىرىمدىلىقتىڭ جارقىن ۇلگىسى. ىرىكتەۋدەن كەيىنگى 3 جىل بويى بالالارمەن ۇزدىك ۇستازدار مەن مەنتورلاردىڭ جۇمىس ىستەۋىنىڭ ارقاسىندا جوبا تۇلەكتەرىنىڭ 94%-ى قازاقستان مەن شەتەلدىڭ جەتەكشى ۋنيۆەرسيتەتتەرىنە گرانت نەگىزىندە تۇسەدى. بۇگىندە جوبا تۇلەكتەرى الەمنىڭ 17 ەلىندە ءبىلىم الىپ جاتىر.