2025-2026 وقۋ جىلىندا 300 مىڭنان استام وقۋشى ورنىنا ەسەپتەلگەن 200-دەن استام جاڭا مەكتەپ (جارتىسىنا جۋىعى اۋىلداردا ورنالاسادى) سالۋ جوسپارعا الىنعان. سونىڭ ىشىندە 206 مىڭ وقۋشى ورنىنا ارنالعان 112 مەكتەپ «كەلەشەك مەكتەپتەرى» ۇلتتىق جوباسى شەڭبەرىندە پايدالانۋعا بەرىلەدى, دەپ حابارلايدى Egemen.kz.
جوبالاردى ىسكە اسىرۋ قالا مەن اۋىل مەكتەپتەرى اراسىنداعى الشاقتىقتى ازايتۋعا, اپاتتى 15 مەكتەپتىڭ ماسەلەسىن شەشۋگە, ءۇش اۋىسىمدى وقىتۋ مەن 150 مىڭعا جۋىق وقۋشى ورنىنىڭ تاپشىلىعىن جويۋعا مۇمكىندىك بەرەدى. سونداي-اق بيىل 248 مەكتەپ رەنوۆاتسيادان ءوتىپ, شاتىرلار اۋىستىرىلادى, قاسبەتتەرى-تەرەزەلەر جاڭارتىلادى, ينجەنەرلىك جەلىلەرگە كۇردەلى جوندەۋ جۇرگىزىلىپ, اۋماقتارى اباتتاندىرىلادى.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ مالىمدەۋىنشە قوسىمشا 1000 اۋىل مەكتەبىندە جوندەۋ جۇمىستارى جۇرگىزىلىپ, جيھاز جاڭارتىلادى, كىتاپحانالار, اسحانالار مەن قاۋىپسىزدىك جۇيەلەرى جابدىقتالادى. سونىمەن قاتار حيميا, فيزيكا, بيولوگيا, روبوتوتەحنيكا جانە STEM باعىتتارى بويىنشا 1000 زاماناۋي پاندىك كابينەت ساتىپ الىنىپ جاتىر.
ەسكە سالايىق, 2019 جىلدان بەرى سالادا اۋقىمدى ينفراقۇرىلىمدىق جوبالار جۇزەگە اسىرىلىپ كەلەدى. سودان بەرى 1200 جاڭا مەكتەپ اشىلىپ, 1 ميلليوننان استام وقۋشى ورنى قامتاماسىز ەتىلگەن.