سەنات دەپۋتاتتارى سۇيىندىك الداشەۆ, بيبيگۇل جەكسەنباي, اينۇر ارعىنبەكوۆا جانە زاكيرجان كۋزيەۆ كورەيا رەسپۋبليكاسىنىڭ ۇلتتىق اسسامبلەياسى جانىنداعى بالالار, حالىق جانە قورشاعان ورتا ماسەلەلەرى جونىندەگى كوميتەت توراعاسى لي ين يونمەن كەزدەستى. اڭگىمەلەسۋ بارىسىندا تاراپتار زاڭ شىعارۋ ورگاندارى اراسىنداعى ىنتىماقتاستىقتى ودان ءارى دامىتۋ كەلەشەگىن تالقىلادى.
سۇيىندىك الداشەۆ اتاپ وتكەندەي, قازاقستان مەن كورەيا اراسىنداعى ساياسي بايلانىستار سىندارلى ديالوگ پەن تىعىز قارىم-قاتىناسقا نەگىزدەلگەن. ەكىجاقتى قاتىناستار ءوزارا سەنىم مەن اشىقتىق رۋحىندا جوعارى دەڭگەيدە بەلسەندى دامىپ كەلەدى. سەناتور كەيىنگى جىلدارى بۇل سەرىكتەستىكتىڭ اياسىن كەڭەيتۋگە ەكى ەل باسشىلارىنىڭ ءوزارا ساپارلارى دا سەرپىن بەرگەنىن ايتتى.
وسى رەتتە كورەيا ۇلتتىق اسسامبلەياسى قۇرعان قورشاعان ورتا جانە دامۋ ماسەلەلەرى جونىندەگى ازيا-تىنىق مۇحيتى پارلامەنتتىك فورۋمىنىڭ كۇن ءتارتىبى مەن ونىڭ قازاقستان ماقساتتارىمەن ۇندەستىگى ەرەكشە اتالىپ ءوتتى. تاراپتار بىرلەسكەن كۇش-جىگەردى بالا مەن وتباسى قۇقىقتارىن قورعاۋعا, گۋمانيتارلىق باعىتتاعى باستامالاردى ىلگەرىلەتۋگە جۇمساۋعا نيەتتى ەكەنىن ءبىلدىردى. سونداي-اق كورەيالىق پارلامەنتشىلەرگە كامەلەتكە تولماعاندارعا قاتىستى قۇقىق بۇزۋشىلىقتاردىڭ الدىن الۋ جانە وعان قارسى كۇرەس باعىتىندا قازاقستاندا قولعا الىنعان زاڭنامالىق شارالار تانىستىرىلدى.
«قازاقستان بالالار مەن وتباسى دەنساۋلىعىن قورعاۋعا باسىمدىق بەرەدى. 2022 جىل بالالار جىلى دەپ جاريالانىپ, الەۋمەتتىك قورعاۋ, ءبىلىم بەرۋ جانە دەنساۋلىق ساقتاۋ سالالارىندا ماڭىزدى رەفورمالار باستالدى. 2016 جىلدان بەرى بالا قۇقىقتارى جونىندەگى ۋاكىل ينستيتۋتى جۇمىس ىستەيدى. ءبىزدىڭ ەل كورەيادا تۇراتىن ازاماتتاردىڭ, ونىڭ ىشىندە بالالاردىڭ قۇقىقتارىن قورعاۋعا مۇددەلى. قازىرگى ۋاقىتتا كورەيادا شامامەن 45 مىڭداي وتانداسىمىز تۇرادى. ءبىز ولاردى ساپالى بىلىممەن, مەديتسينالىق جانە الەۋمەتتىك قىزمەتتەرمەن قامتاماسىز ەتۋگە ۇمتىلامىز. وسىعان بايلانىستى قازاقستان ازاماتتارىنىڭ بالالارىنا ينكليۋزيۆتى ءبىلىم بەرۋ, ەرتە دامىتۋ جانە مادەني ينتەگراتسيا باعدارلامالارىنا قولجەتىمدىلىكتى قامتاماسىز ەتۋگە كومەكتەسۋ تۋرالى كورەيالىق تاراپقا ءوتىنىش بىلدىرەمىز», دەدى س.الداشەۆ.
كەزدەسۋ بارىسىندا تاراپتار ساۋدا-ەكونوميكالىق, ينۆەستيتسيالىق ىنتىماقتاستىقتى كەڭەيتۋ, سونداي-اق ءبىلىم بەرۋ, مادەنيەت, تۋريزم جانە وزگە دە سالالارداعى بىرلەسكەن جوبالاردى ىسكە اسىرۋ ماسەلەلەرىن تالقىلادى.
ءوز كەزەگىندە لي ين يون كوپجاقتى قارىم-قاتىناستاردى دامىتۋعا قىزىعۋشىلىق ءبىلدىرىپ, قازاقستاندا جۇرگىزىلىپ جاتقان رەفورمالاردىڭ تيىمدىلىگىن اتاپ ءوتتى.