انتاركتيدادا تىرشىلىك ەتەتىن يمپەراتور پينگۆيندەرى جاھاندىق جىلىنۋدىڭ سالدارىنان جويىلىپ كەتۋدىڭ الدىندا تۇر. سوڭعى 15 جىلدا ولاردىڭ سانى 22 پايىزعا ازايعانى انىقتالدى. عالىمدار بۇل تۇرگە تونگەن قاۋىپ بۇرىن بولجاعاننان الدەقايدا كۇردەلى ەكەنىن ەسكەرتەدى, دەپ جازادى Egemen.kz.
زەرتتەۋشىلەر ۋەددەلل مەن بەللينگسگاۋزەن تەڭىزدەرىنىڭ جاعالاۋىنداعى ون التى ءىرى پينگۆين كولونياسىنىڭ سپۋتنيكتىك سۋرەتتەرىن زەرتتەدى. بۇل كولونيالار الەمدەگى يمپەراتور پينگۆيندەرىنىڭ ۇشتەن ءبىر بولىگىن قۇرايدى. ەسەپتەۋلەرگە سايكەس, قازىرگى تاڭدا شامامەن 250 مىڭ جۇپ پينگۆين عانا قالعان.
يمپەراتور پينگۆيندەرى تەڭىز مۇزىندا كوبەيەدى. الايدا جاھاندىق جىلىنۋ سالدارىنان مۇز قاباتىنىڭ تۇراقسىز بولۋى ولاردىڭ كوبەيۋىنە كەرى اسەر ەتۋدە. بىرنەشە كولونيادا جاپپاي بالاپان ءولىمى تىركەلگەن – مۇز ەرتە جارىلىپ, بالاپاندار سۋ وتكىزبەيتىن قاۋىرسىندارىن دامىتپاي جاتىپ سۋعا باتىپ كەتكەن.
BAS زەرتتەۋشىسى پيتەر فرەتۆەللدىڭ ايتۋىنشا, بۇرىنعى بولجامدار ناقتى قاۋىپتىڭ اۋقىمىن جەتە كورسەتە الماعان. ەندى عالىمدار راديولوكاتسيالىق جانە جىلۋ كامەرالارى ارقىلى ءتىپتى ادام بارا المايتىن اۋماقتارداعى كولونيالاردى دا باقىلاۋعا الۋدى كوزدەپ وتىر.
عالىمداردىڭ كومپيۋتەرلىك مودەلىنە سۇيەنسەك, ەگەر جاھاندىق جىلىنۋ قازىرگى قارقىنىمەن جالعاسا بەرسە, 2100 جىلعا قاراي يمپەراتور پينگۆيندەرى مۇلدەم جويىلىپ كەتۋى مۇمكىن. كەي ساراپشىلار ولاردىڭ وڭتۇستىككە قاراي كوشەتىنىن بولجاپ وتىر, بىراق جاڭا ورتاعا بەيىمدەلە الاتىنى بەلگىسىز.
يمپەراتور پينگۆيندەرى قازىرگى كليماتتىق داعدارىس كەزىندە تابيعاتتىڭ وسالدىعىنىڭ ايقىن بەلگىسىنە اينالدى. ولارعا باستى قاۋىپ – ەكوجۇيەنىڭ جىلىنۋى. عالىمدار ءالى دە جاعدايدى وزگەرتۋگە مۇمكىندىك بار دەيدى. ول ءۇشىن:
پارنيكتىك گازدار شىعارىندىلارىن ازايتۋ, تۇراقتى ەنەرگەتيكاعا كوشۋ, حالىقارالىق ىنتىماقتاستىقتى كۇشەيتۋ قاجەت.تەك وسىنداي كەڭ اۋقىمدى شارالار عانا بۇل ءتۇردىڭ جويىلىپ كەتۋىنىڭ الدىن الا الادى.
جانەل تولەۋبەكوۆا, ەۇۋ ستۋدەنتى