قۇتقارۋشىلاردىڭ قاتارىندا قابىلەتىمەن كوپتى تامساندىرعان تالاي جان بار. ولاردىڭ اراسىندا سۋرەتشى, مۋزىكانت, اقىن, ءتىپتى دەكوراتيۆتى-قولدانبالى ونەر شەبەرلەرى دە از ەمەس. بۇل – ولار ءۇشىن تەك كوڭىل كوتەرەر ەرمەك ەمەس, رۋحاني جان دۇنيەنىڭ كورىنىسى, ارىپتەستەرگە ۇلگى بولاتىن ونەگە. شىن مانىندە, رۋحتىڭ قۋاتى تەك ەرلىك پەن ەرجۇرەكتىك ارەكەتتەردە عانا ەمەس, شىعارماشىلىقتا دا ايقىن كورىنىس تابادى, دەپ جازادى Egemen.kz.
سولاردىڭ ءبىرى – پاۆلودار وبلىسى توتەنشە جاعدايلار دەپارتامەنتى ەرتىس اۋدانى №9 ءورت ءسوندىرۋ ءبولىمىنىڭ ءورت ءسوندىرۋشى-قۇتقارۋشىسى ازامات سماعۇلوۆ. ول – باتىرلىق پەن شىعارماشىلىقتى قاتار الىپ جۇرە الاتىن ازامات.
جاسى 28-دەگى جاس مامان قىزمەتكە كىرىسكەنىنە كوپ بولماسا دا, ءوز ىسىنە جاۋاپكەرشىلىكپەن قاراپ, باتىلدىعىمەن, ادالدىعىمەن كوزگە ءتۇسىپ ۇلگەردى. كۇن سايىن قاۋىپتىڭ قۇرساۋىندا ءجۇرىپ, وتتى ءوشىرىپ, ادام ءومىرى مەن مۇلكىن قۇتقارىپ كەلەدى.
ال قىزمەتتەن تىس ۋاقىتتا ازاماتتىڭ باسقا ءبىر قىرى اشىلادى. ول – سۋرەتشى. قولىنا قىلقالام مەن قارىنداش الىپ, شابىت الەمىنە شومادى. ارنايى كوركەمدىك ءبىلىمى بولماسا دا, سۋرەت سالۋ تەحنيكاسىن ءوز بەتىنشە مەڭگەرگەن. ونىڭ تۋىندىلارى – ىشكى جان دۇنيەسىنىڭ كورىنىسى, سەزىم مەن تەبىرەنىستىڭ بوياۋعا اينالعان بەينەسى. بۇل – شىعارماشىلىق ارقىلى رۋحاني تەپە-تەڭدىك ورناتىپ, كۇيزەلىستى جەڭۋدىڭ جولى.
ازامات سماعۇلوۆ – تجم قاتارىنداعىلاردىڭ اراسىندا ءومىرىن قاتەرگە تىگىپ قانا قويماي, ءوزىنىڭ ونەرىمەن وزگەلەرگە رۋح بەرىپ جۇرگەن شىعارماشىل جاننىڭ بىرەگەيى. بۇل – قاراپايىم قىزمەتكەردىڭ تۇلعالىق بيىگى مەن ادامي بولمىسىنىڭ ايعاعى.