پرەمەر-مينيستر ولجاس بەكتەنوۆ قازاقستانعا رەسمي ساپارىمەن كەلگەن سلوۆاكيا رەسپۋبليكاسىنىڭ پرەمەر-ءمينيسترى روبەرت فيتسومەن كەزدەستى. كەزدەسۋ بارىسىندا ساۋدا-ەكونوميكالىق ىنتىماقتاستىقتى دامىتۋ ماسەلەلەرى تالقىلاندى, دەپ حابارلايدى Egemen.kz.
«سلوۆاكيا – قازاقستاننىڭ ەۋروپالىق وداقتاعى سەنىمدى سەرىكتەسى. قازاقستان پرەزيدەنتى قاسىم-جومارت توقاەۆ سلوۆاكيا رەسپۋبليكاسىمەن جان-جاقتى ستراتەگيالىق ارىپتەستىكتى دامىتۋعا ەرەكشە ءمان بەرەدى. ءبىزدىڭ ەلدەرىمىزدە ونەركاسىپتى, اۋىل شارۋاشىلىعىن, جوعارى بىلىكتى ادامي كاپيتالدى دامىتۋ, سونداي-اق قولايلى گەوگرافيالىق جاعداي سالالارىندا كوپتەگەن ۇقساستىقتار بار. مۇنىڭ ءبارى قازاقستان – سلوۆاكيا قاتىناستارىن ودان ءارى نىعايتۋعا بەرىك نەگىز بولادى», دەدى ولجاس بەكتەنوۆ.
ايتا كەتەيىك, وتكەن جىلى ەكى ەل اراسىنداعى تاۋار اينالىمى $140 ملن-دى قۇراعان. ال بيىلعى جىلدىڭ 4 ايىندا ءوزارا ساۋدا كولەمى 46%-عا ارتقان. سونىمەن قاتار ساۋدا قۇرىلىمىن ءارتاراپتاندىرۋ جانە تاۋارلار مەن كورسەتىلەتىن قىزمەتتەر ءتۇرىن ودان ءارى كەڭەيتۋ شارالارىنىڭ ماڭىزدىلىعى اتاپ ءوتىلدى.
«ەكى مەملەكەتتىڭ باسشىلارى مەن پرەمەر-مينيسترلەر كەزدەسۋلەرى – جوبالاردى جۇزەگە اسىرۋدىڭ جۇمىلدىرۋشى قۇرامداس بولىگى. ءبىز تاۋار اينالىمىن ارتتىرۋعا عانا ەمەس, بىرلەسكەن ءوندىرىس ورىندارىن قۇرۋعا دا مۇددەلىمىز», دەپ اتاپ ءوتتى روبەرت فيتسو.
ءوز كەزەگىندە قازاقستان ورگانيكالىق ءوندىرىس سالاسىندا بىرلەسكەن كاسىپورىندار قۇرۋ جانە تاجىريبە الماسۋ, حالىقارالىق نارىقتارعا تۇراقتى شىعۋدى قامتاماسىز ەتەتىن ءتيىمدى كولىك-لوگيستيكالىق باعىتتاردى دامىتۋ ارقىلى اۋىل شارۋاشىلىعى سالاسىنداعى ىنتىماقتاستىقتى تەرەڭدەتۋگە مۇددەلى.
قر ۇكىمەتىنە وتاندىق تاسىمالداۋشىلار تاراپىنان كەلىپ تۇسكەن وتىنىشتەردى ەسكەرە وتىرىپ, ولجاس بەكتەنوۆ ترانزيتتىك جۇك تاسىمالداۋعا رۇقسات بەرۋ كۆوتاسىن ودان ءارى ۇلعايتۋ ماسەلەسىن قاراۋعا باستاماشى بولدى.
تاراپتار جان-جاقتى ءوزارا ءتيىمدى ىنتىماقتاستىقتى نىعايتۋعا جانە روبەرت فيتسونىڭ قازاقستانعا رەسمي ساپارى بارىسىندا قول جەتكىزىلگەن ۋاعدالاستىقتاردى تولىق جۇزەگە اسىرۋعا نيەتتى ەكەنىن جەتكىزدى.