مەملەكەت باسشىسى قاسىم-جومارت توقاەۆتىڭ الەۋمەتتىك ينفراقۇرىلىمدى دامىتۋ جونىندەگى تاپسىرماسىن ورىنداۋ ماقساتىندا اقمولا وبلىسىندا ەكى جاڭا مەديتسينالىق مەكەمە – ارشالى اۋدانى ارناساي اۋىلىندا دارىگەرلىك امبۋلاتوريا جانە بۇلاندى اۋدانى التىندى اۋىلىندا فەلدشەرلىك-اكۋشەرلىك پۋنكت ءوز جۇمىسىن باستادى. بۇل نىساندار ەلگە قايتارىلعان اكتيۆتەر ەسەبىنەن سالىنىپ, قۇرىلىسىنا ارناۋلى مەملەكەتتىك قوردان 295 ملن تەڭگە بولىنگەن, دەپ حابارلايدى Egemen.kz.
ۇكىمەتتىڭ ءباسپاسوز قىزمەتىنىڭ حابارلاۋىنشا, ارناساي اۋىلىنداعى جاڭا دارىگەرلىك امبۋلاتوريا 2 مىڭنان استام ادامعا قىزمەت كورسەتەدى.
«بۇل مەكەمە ەلتوق, قويگەلدى, باباتاي ستانسالارى مەن 42-رازەزدىڭ تۇرعىندارى ءۇشىن العاشقى مەديتسينالىق كومەكتى جاقىنداتىپ, قولجەتىمدى ەتەدى. 450 شارشى مەترلىك عيمارات ءبىر اۋىسىمدا 45 ادامدى قابىلداي الادى. مۇندا ەكگ اپپاراتى, دەفيبريللياتورلار, فيزيوتەراپيا جانە وڭالتۋ جابدىقتارى سياقتى زاماناۋي مەديتسينالىق قۇرىلعىلار ورناتىلعان», دەلىنگەن حابارلامادا.
ال التىندى اۋىلىندا اشىلعان فەلدشەرلىك-اكۋشەرلىك پۋنكت التىندى, الاكول, جاڭاتالاپ, ەلتاي جانە بوياركا اۋىلدارىنىڭ 1 مىڭعا جۋىق تۇرعىنىنا ساپالى مەديتسينالىق قىزمەت كورسەتەدى. بۇل نىسان دا تولىقتاي زاماناۋي قۇرال-جابدىقتارمەن قامتاماسىز ەتىلگەن.
جاڭا نىسانداردىڭ اشىلۋ سالتاناتىنا قر باس پروكۋرورىنىڭ ورىنباسارى عالىمجان قويگەلديەۆ پەن اقمولا وبلىسىنىڭ اكىمى مارات احمەتجانوۆ قاتىسقان.
ايتا كەتەيىك, بۇگىندە وڭىردە تاعى سەگىز دەنساۋلىق ساقتاۋ نىسانى – ءۇش دارىگەرلىك امبۋلاتوريا, ءتورت فەلدشەرلىك-اكۋشەرلىك جانە ءبىر مەديتسينالىق پۋنكت قۇرىلىسى اياقتالۋعا جاقىن. بۇل جوبالارعا جالپى سوماسى شامامەن 1,7 ملرد تەڭگە كولەمىندە قارجى بولىنگەن.