قازاقستاننىڭ شيكىزات نارىعىنداعى پوزيتسياسى نىعايىپ كەلەدى

ونەركاسىپ جانە قۇرىلىس مينيسترلىگى سالانىڭ نەگىزگى جەتىستىكتەرىن اتادى: 

• تاۋ-كەن مەتاللۋرگيا كەشەنىنىڭ ءجىو-دەگى ۇلەسى 8%, وندىرىلگەن ءونىم كولەمى 14,3 ترلن تەڭگەدەن, ەكسپورت كولەمى 21,4 ملرد اقش دوللارىنان استى.

• اۆستراليالىق مودەل نەگىزىندە ەنگىزىلگەن جەر قويناۋىن پايدالانۋ جۇيەسى گەولوگيالىق بارلاۋعا 420 ملرد تەڭگەدەن استام ينۆەستيتسيا تارتۋعا مۇمكىندىك بەردى.

• جالپى قۇنى 3,5 ترلن تەڭگەدەن اساتىن بەس ءىرى ينۆەستيتسيالىق جوبا ىسكە قوسىلادى دەپ كۇتىلۋدە, ناتيجەسىندە 8 مىڭعا جۋىق جاڭا جۇمىس ورنى اشىلادى.

• قازاقستان تيتان, مىس, اليۋميني, فەرروقورىتپالار, سونداي-اق بەريللي, تانتال جانە نيوبي سىندى سيرەك ءارى ستراتەگيالىق ماڭىزدى مەتالداردى وندىرۋدە الەمدىك كوشباسشىلار قاتارىندا.

• جەر قويناۋىن پايدالانۋدا اينالمالى (تسيركۋليارلى) مودەلگە كوشۋ جالعاسۋدا: 55 ملرد توننادان استام تەحنوگەندىك مينەرالدىق تۇزىلىمدەردى (تمت) تۇگەندەۋ جۇمىستارى باستالدى.

• 2025 جىلى ەلىمىزدە تۇڭعىش رەت ۆولفرام ءوندىرىسى ىسكە قوسىلادى, سونداي-اق ىستىققا ءتوزىمدى نيكەل قورىتپالارى, گاللي جانە ينتەرمەتالليدتەردى ءوندىرۋ تەحنولوگيالارىن دامىتۋ ءىسى جالعاسىپ جاتىر. 

ايتا كەتەيىك, قازاقستان باي مينەرالدىق قوردى زاماناۋي ينفراقۇرىلىممەن جانە جاھاندىق تۇراقتى دامۋ ستاندارتتارىمەن ۇشتاستىرا وتىرىپ, حالىقارالىق سەرىكتەستەر مەن ينۆەستورلار ءۇشىن اشىق, تۇراقتى جانە بولجامدى ورتا قالىپتاستىرۋدا.