«AMANAT» پارتياسى ەڭ كوپ وقىلاتىن وتاندىق 100 ادەبي كىتاپتى انىقتاۋ بويىنشا جالپىۇلتتىق ساۋالناما جۇرگىزۋگە بەلسەندى قولداۋ كورسەتۋدە, دەپ جازادى Egemen.kz.
قازىرگى تاڭدا وتاندىق ادەبيەتتىڭ ەڭ كوپ وقىلاتىن ءارى قازاقستاندىقتاردىڭ سۇيىكتى 100 كىتابىن انىقتاۋعا ارنالعان جالپىۇلتتىق ساۋالناما جالعاسۋدا. بۇگىن ەلوردادا ۇلتتىق قۇرىلتاي مۇشەلەرىنىڭ, جازۋشىلاردىڭ, قوعام قايراتكەرلەرى مەن وقىرمانداردىڭ قاتىسۋىمەن تاقىرىپتىق ءىس-شارا ءوتىپ, ونىڭ بارىسىندا الدىن الا قورىتىندىلار جاريا ەتىلدى. قازىرگى ۋاقىتتا ساۋالناماعا 16 مىڭنان استام ازامات قاتىسقان.
ۇيىمداستىرۋشىلار – قازاقستاندىق قوعامدىق دامۋ ينستيتۋتىنىڭ مالىمەتىنشە, داۋىس بەرۋ 23 شىلدەگە دەيىن جالعاسادى. وتاندىق اۆتورلاردىڭ ەڭ كوپ وقىلاتىن 100 تۋىندىسى 10 تامىز – اباي كۇنى ۇسىنىلادى.
جوبا 2025 جىلى 23 ساۋىردە – ۇلتتىق قۇرىلتاي مۇشەلەرىنىڭ ۇسىنىسى بويىنشا بەكىتىلگەن ۇلتتىق كىتاپ كۇنى باستاۋ الدى. پرەزيدەنت قاسىم-جومارت توقاەۆ اتالعان باستاماعا قولداۋ ءبىلدىردى. مەملەكەت باسشىسى قوعامدا كىتاپ وقۋ مادەنيەتىن دامىتۋدىڭ, سونداي-اق كىتاپتاردىڭ قولجەتىمدىلىگىن قامتاماسىز ەتۋدىڭ ماڭىزىن ۇنىمە ايتىپ كەلەدى.
ءىس-شارادا ءسوز سويلەگەن ءماجىلىس دەپۋتاتى, «AMANAT» پارتياسى فراكتسياسىنىڭ مۇشەسى, ۇلتتىق قۇرىلتاي مۇشەسى ايدوس سارىم بۇل باستاما ادەبي تالعامنىڭ قالىپتاسۋىنا ىقپال ەتىپ قانا قويماي, ەلىمىزدەگى كىتاپ يندۋسترياسىنا بايىپتى باعدار بەرەتىنىن اتاپ ءوتتى.
«ەگەر وسى ساۋالناما ناتيجەسى بويىنشا ءبىز بەلگىلى ءبىر كىتاپتاردىڭ بارلىق جەردە بارىنشا كوپ وقىلاتىنىن بىلەتىن بولساق, بۇل اتالعان تۋىندىلاردى قايتا باسىپ شىعارۋعا, ولاردى ناسيحاتتاۋعا جانە دارىپتەۋگە مۇمكىندىك بەرەدى. مۇنداي ساۋالنامالار – بەيبەرەكەت اقپارات اعىمىنا قارسى تۇرۋدىڭ, ادەبيەتكە تۇراقتى جانە عىلىمي نەگىزدەلگەن تالعام قالىپتاستىرۋدىڭ ءبىر جولى. وزگە مەملەكەتتەردەگى سەكىلدى, ۋاقىت وتە كەلە ءوز قۇندىلىعىن جوعالتپايتىن كىتاپتار ءتىزىمى جاسالادى. ءبىز قوعامدى نە تولعاندىراتىنىن, جاستاردىڭ, اعا بۋىننىڭ قاي جانردى ۇناتاتىنىن ۇعىنا الامىز. بۇل جاي عانا ءتىزىم ەمەس, بۇل – ءداۋىر ايناسى», – دەدى ول.
ايدوس سارىمنىڭ ايتۋىنشا, ارالىق قورىتىندى ءار ءتۇرلى جاستاعى ازاماتتاردىڭ, ءار ءتۇرلى تىلدە سويلەيتىن توپتاردىڭ تالعامىنا تالداۋ جاساۋعا مۇمكىندىك بەرەدى. سونىمەن قاتار مۇنداي زەرتتەۋلەر باسپاگەرلەرگە قانداي كىتاپتار سۇرانىسقا يە جانە نە نارسەگە نازار اۋدارۋ كەرەك ەكەنى تۋرالى مالىمەت ۇسىنادى. جوبا قازىردىڭ وزىندە ماڭىزدى مادەني وقيعاعا اينالدى. سونىڭ كومەگىمەن بولاشاقتا اۋقىمدى الەۋمەتتىك-مادەني زەرتتەۋلەر جۇرگىزۋگە بولادى.
سونىمەن قاتار «100 كىتاپ» جوباسى اياسىندا قاتىسۋشىلاردى ىنتالاندىرۋ ماسەلەسى دە قاراستىرىلعان. «100 كىتاپ» جوباسىنىڭ سەرىكتەسى – «مەلومان-MARWIN» دۇكەندەر جەلىسىنىڭ قولداۋىمەن 9000-شى, 10000-شى جانە 16000-شى داۋىس بەرۋشىلەرگە سىيلىق كارتالارى تابىستالدى. بۇل قادام وقىرماندارعا جارقىن توسىنسىي عانا ەمەس, وتانداستارىمىز ءسۇيىپ وقيتىن 100 كىتاپتى تاڭداۋ پروتسەسىنە ازاماتتاردى بارىنشا كوپ تارتۋعا قوسىمشا ىنتا بولدى.
ماسەلەن, 9000-شى داۋىس بەرۋشى – استانا تۇرعىنى ءجۇسىپ امانتاي, 10000-شى قاتىسۋشى – قاراعاندى تۇرعىنى اسەل كوشەن, ال 16000-شى ازامات – اقتوبە تۇرعىنى گۇلجان وتەگەنوۆا.
ايتا كەتەيىك, «AMANAT» پارتياسى كىتاپ وقۋ مادەنيەتىن ىلگەرىلەتۋگە بەلسەندى اتسالىسۋدا. 2023 جىلعى قىركۇيەك ايىنان باستاپ پارتيا «كىتاپ-AMANAT» جوباسىن قولعا الىپ, سونىڭ اياسىندا ەل اۋماعىندا, اسىرەسە شاعىن قالالار مەن اۋىلداردا 23 كىتاپ ورتالىعى اشىلدى. وندا ادەبي كەشتەر, جازۋشىلارمەن كەزدەسۋلەر, ءتۇرلى بايقاۋلار وتەدى. بارلىعى 700-دەن استام ءىس-شارا وتكىزىلدى. كىتاپتار نارىق باعاسىنان تومەن باعامەن ساتىلادى.
ءار قازاقستاندىق ازامات eGov Mobile موبيلدىك قوسىمشاسى ارقىلى داۋىس بەرىپ, ون كىتاپقا دەيىن تاڭداۋ جاساي الادى. شىعارمانىڭ اتاۋى مەن اۆتورىن دا كورسەتۋ قاجەت