مەملەكەتتىك قولداۋ شارالارىنىڭ, ديقاندار مەن جەرگىلىكتى اكىمشىلىكتىڭ ۇيلەسىمدى جۇمىسىنىڭ ارقاسىندا قازاقستاندا بيىل ەگىس دەر كەزىندە جۇرگىزىلىپ, تولىق اياقتالدى, دەپ جازادى Egemen.kz.
ايتا كەتكەن ءجون, بيىل ەگىس جۇمىستارىن قارجىلاندىرۋ (700 ملرد تەڭگە) العاش رەت دالا جۇمىستارى باستالعانعا دەيىن التى اي بۇرىن باستالدى.
ديقانداردىڭ جەڭىلدەتىلگەن قارجىعا قولجەتىمدىلىگىن ارتتىرۋ ماقساتىندا قارىز سوماسىنىڭ 85%-نا دەيىن كەپىلدىك بەرۋ مەحانيزمى ىسكە قوسىلدى.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە اۋىل شارۋاشىلىعى تەحنيكاسىن جەڭىلدەتىلگەن ليزينگ ارقىلى الۋ كولەمى 250 ملرد تەڭگەنى قۇرادى. بۇل ماشينا-تراكتور پاركىن جاڭارتۋعا جانە كوكتەمگى دالا جۇمىستارىن اگروتەحنيكالىق مەرزىمدەردە, جوعارى تەحنولوگيالىق تيىمدىلىكپەن جۇرگىزۋگە ەلەۋلى اسەر ەتتى.
الدىن الا مالىمەتتەرگە سايكەس, اۋىل شارۋاشىلىعى داقىلدارى 23,7 ملن گەكتار جەرگە ورنالاستىرىلدى. سونىمەن قاتار, ەگىستىك القاپتاردىڭ قۇرىلىمىن ارتاراپتاندىرۋعا ەرەكشە نازار اۋدارىلدى. بۇل رەتتە ەگىن اينالىمىنىڭ عىلىمي نەگىزدەلگەن نورمالارى, كليماتتىق تاۋەكەلدەرگە توزىمدىلىك جانە نارىقتىق ۇردىستەر ەسكەرىلدى.
ناتيجەسىندە ونىمدىلىگى جوعارى جانە سۇرانىسقا يە داقىلداردىڭ ەگىس كولەمى ۇلعايدى: مايلى داقىلدار – 3,4 ملن گەكتار (وتكەن جىلمەن سالىستىرعاندا 0,5 ملن گەكتارعا ارتىق), مال ازىقتىق داقىلدار – 3,3 ملن گەكتار (114 مىڭ گەكتارعا ارتتى), داندىك جۇگەرى – 167,5 مىڭ گەكتار, كوكونىس-باقشا داقىلدارى – 222,3 مىڭ گەكتار.
اتالعان ەگىس القاپتارى ەلدىڭ ىشكى قاجەتتىلىكتەرىن قامتاماسىز ەتىپ قانا قويماي, اگروونەركاسىپتىك كەشەننىڭ ەكسپورتتىق الەۋەتىن ارتتىرۋعا مۇمكىندىك بەرەدى.