قاراعاندى وبلىسىنىڭ وساكاروۆ اۋدانىندا 6000 باسقا ارنالعان زاماناۋي ءسۇت-تاۋار فەرماسىنىڭ قۇرىلىسى باستالدى. قۇنى 30 ملرد تەڭگەدەن اساتىن بۇل اۋقىمدى ينۆەستيتسيالىق جوبا – ەلىمىزدەگى ءسۇتتى مال شارۋاشىلىعى سالاسىنداعى ەڭ ىرىلەرىنىڭ ءبىرى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
ستف قۋاتى جىلىنا 9 مىڭ توننا ءسۇت وندىرۋگە جەتەدى, ال كەشەن تولىق ىسكە قوسىلعاندا 180 جاڭا جۇمىس ورنى اشىلادى.
وبلىس اكىمى ەرماعانبەت بولەكپاەۆ وساكاروۆ اۋدانىنا ساپارى بارىسىندا جوبانىڭ جۇزەگە اسۋ بارىسىمەن تانىسىپ, بولاشاق نىساننىڭ ىرگەتاسىنا ەسكەرتكىش تاستى ورناتقان.
«بۇل وتە قاجەتتى جانە ماڭىزدى جوبا. جاقىندا نۇرا اۋدانىندا 1200 باسقا ارنالعان ستف اشىلدى. ەندى جاڭا باستامالاردىڭ ارقاسىندا ءسۇت زاۋىتتارىن تولىق وتاندىق شيكىزاتپەن قامتاماسىز ەتەمىز», دەدى اكىم.
ايتا كەتەيىك, جوبانى «ەۆرازيا ينۆەست LTD» جشس جۇزەگە اسىرىپ جاتىر. كومپانيا قۇرىلتايشىسى يۆان گەورگيادي كەشەننىڭ ءبىرىنشى كەزەڭى بيىل ىسكە قوسىلاتىنىن, ال فەرمادا گولشتين-فريز تۇقىمدى سيىرلار وسىرىلەتىنىن مالىمدەدى.
«كەشەننىڭ جەكە جەم-ءشوپ بازاسى بولادى. بيىل مىڭ گەكتار جەرگە جۇگەرى مەن جوڭىشقا ەگىلدى. بولاشاقتا كاسىپورىن سۋارمالى جەر كولەمىن 10 مىڭ گەكتارعا دەيىن ۇلعايتىپ, 120 جاڭبىرلاتىپ سۋارۋ ماشيناسىن ورناتادى», دەدى يۆان گەورگيادي.
سونىمەن قاتار, جوبادا 12 مىڭ تونناعا ارنالعان كوكونىس ساقتايتىن قويما سالۋ جوسپارلانعان.
ايتا كەتەيىك, بيىل وساكاروۆ اۋدانىندا ەگىستىك كولەمى 450 مىڭ گەكتارعا دەيىن ۇلعايعان. بۇل بىلتىرعىدان 34,5 مىڭ گەكتارعا كوپ. سونداي-اق مال باسى مەن ءونىم كولەمى دە ارتقان.