الماتىدا كەزدەيسوق ءوتىپ بارا جاتقان ەر ادام تۇرعىن ءۇيدىڭ ءتورتىنشى قاباتىنداعى پاتەردىڭ بالكونىندا شىققان ءورتتى ءسوندىردى. ونىڭ ەرلىگى الەۋمەتتىك جەلى قولدانۋشىلارىن تاڭقالدىردى, دەپ جازادى Egemen.kz.
وقيعا 4 ماۋسىم كۇنى ساعات 17:07 شاماسىندا ناۋرىزباي اۋدانى, ءجۇنىسوۆ كوشەسى 2/23 مەكەنجايىندا ورنالاسقان «الما سيتي» تۇرعىن ءۇي كەشەنىندە بولعان. قالالىق توتەنشە جاعدايلار دەپارتامەنتىنىڭ مالىمەتىنشە, ون قاباتتى ءۇيدىڭ ءتورتىنشى قاباتىنداعى بالكوندا قوقىس ورتەنگەن. ءورت اۋماعى شامامەن 1 شارشى مەتردى قۇراعان.
وقيعا كۋاگەرلەرى تۇسىرگەن بەينە TikTok جەلىسىندە تاراپ, كوپشىلىكتىڭ نازارىن اۋداردى. ۆيدەودا ەر ادامنىڭ عيماراتتىڭ سىرتىمەن ورمەلەپ, بالكونعا جەتىپ, جانىپ جاتقان زاتتى تومەنگە تاستاعانى كورىنەدى.
قالالىق تجد حابارلاۋىنشا, ءورت سوندىرۋشىلەر كەلگەنگە دەيىن ءورتتى ءسوندىرىپ ۇلگەرگەن ازامات — 33 جاستاعى اسىل احمەتوۆ.
«ول باتىلدىق تانىتىپ, بالكونعا كىرىپ, جانىپ جاتقان قوقىستى تومەنگە تاستادى. وسىلايشا ءورتتىڭ ءارى قاراي تارالۋىنىڭ الدىن الدى. قازىرگى ۋاقىتتا ول توتەنشە جاعدايلار ءمينيسترىنىڭ اتىنان ماراپاتقا ۇسىنىلدى», دەدى الماتى قالالىق تجد ءباسپاسوز قىزمەتى.
بۇل وقيعا الەۋمەتتىك جەلىلەردە قىزۋ تالقىلانىپ, كوپشىلىك اسىل احمەتوۆتىڭ ارەكەتىن كينوداعى كورىنىستەرمەن سالىستىرىپ جاتىر.
جانەل تولەۋبەكوۆا, ەۇۋ ستۋدەنتى