ۇلتتىق مۋزەيدە مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ ۇيىتقى بولۋىمەن مەملەكەت جانە قوعام قايراتكەرى, اقىن, جازۋشى-پۋبليتسيست, ءرامىزتانۋشى ەربول شايمەردەن ۇلىن ەسكە الۋعا ارنالعان «مەملەكەتتىك رامىزدەر – ەلتانىم نەگىزى» اتتى كونفەرەنتسيا ءوتتى.
سەنات دەپۋتاتى نۇرتورە ءجۇسىپتىڭ مودەراتورلىعىمەن وتكەن كەزدەسۋگە سەناتور بيبىگۇل جەكسەنباي, مادەنيەت جانە اقپارات ءمينيسترىنىڭ ورىنباسارى ايبەك سىدىقوۆ, عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى ەربول تىلەشوۆ, ەكس-سەناتور ءلاززات سۇلەيمەن جانە بىرقاتار زيالى قاۋىم وكىلدەرى, ءرامىزتانۋشىنىڭ كوزىن كورىپ, شاپاعاتىن سەزىنگەن جاندار جينالدى.
جيىندى اشقان ن.ءجۇسىپ بۇگىنگى رامىزدەرىمىزدىڭ دايىندىق جۇمىستارىنىڭ وتىمەن كىرىپ, ك ۇلىمەن شىققان ەربول شايمەردەن ۇلىن ۇلتتىق گەرالديكانى قالىپتاستىرۋعا ولشەۋسىز ۇلەس قوسقانىن اتاپ ءوتتى.
كونفەرەنتسيا بارىسىندا اقىن قالقامان سارين مەملەكەتتىك كەڭەسشى ەرلان قاريننىڭ قۇتتىقتاۋ حاتىن وقىپ بەرىپ, ونى جۇبايى ك.شايمەردەنوۆاعا تاپسىردى. قۇتتىقتاۋدا ەربول شايمەردەن ۇلىنىڭ سانالى عۇمىرىن ەلىمىزدىڭ مادەنيەتى مەن ءباسپاسوزدىڭ, ءتىل سالاسىنىڭ وركەن جايۋىنا, مەملەكەتتىك رامىزدەردى ۇلىقتاۋعا ارناعان تاعىلىمى زور تۇلعا, ءبىرتۋار ازامات ەكەنى اتاپ وتىلگەن.
«ول ەلتاڭبا, تۋ, مەملەكەتتىك ءرامىز رەتىندە قابىلدانىپ جاتقان كەزدە كوميسسيا مۇشەسى بولىپ, كەيىن رامىزدەردى زەردەلەپ, زەرتتەپ, سالانىڭ دامۋىنا زور ۇلەس قوستى», دەگەن ەرلان تىنىمباي ۇلى كۇلاش قايىرجانقىزىنا العىس-ريزاشىلىعىن ءبىلدىرىپتى.
مادەنيەت جانە اقپارات ءمينيسترىنىڭ ورىنباسارى ايبەك سىدىقوۆ ەربول شايمەردەنۇلىنىڭ مەملەكەتتىك رامىزدەردىڭ ءمانى مەن مازمۇنىن ۇلت بولمىسى مەن تاريحىنىڭ بيىك ولشەمىندە زەردەلەپ, ءسوز ونەرىن مەملەكەتتىك يدەولوگياعا توعىستىرعان ازاماتتاردىڭ ءبىرى ەكەنىنە توقتالدى. سونداي-اق ونىڭ قازاق گەرالديكاسىن زەردەلەپ, ءرامىزتانۋدى عىلىمي نەگىزگە كوتەرىپ, بۇل سالانىڭ قالىپتاسۋى مەن دامۋىنا ولشەۋسىز ۇلەس قوسىپ, ەڭبەك سىڭىرگەنىن دە اتاپ ءوتتى.
كونفەرەنتسيادا سەناتور ب.جەكسەنباي, ءتىل ساياساتى كوميتەتىنىڭ توراعاسى ە.تىلەشوۆ, قوعام قايراتكەرى ل.سۇلەيمەن, جازۋشى ق.جيەنباي, ك.شايمەردەنوۆا دا ءسوز سويلەپ, ەستەلىكتەرىن ءبولىستى.
جيىن بارىسىندا «ەلتانىم» تاقىرىبىندا كىتاپ كورمەسى ۇيىمداستىرىلىپ, ە.شايمەردەن ۇلىنىڭ ءومىرى مەن ەڭبەك جولىن بايانداعان شاعىن دەرەكتى فيلم كورسەتىلدى.
سونداي-اق ءانشى زارينا وماروۆا ارنايى كەلىپ, ە.شايمەردەن ۇلىنىڭ سوزىنە جازىلعان مارات وماروۆتىڭ «ارمان قالا» ءانىن ورىنداپ بەردى. زارينا بۇل ءان ءوزىنىڭ بالا كۇنىنەن جانىنا جاقىن, ەرەكشە جاقسى كورەتىن اندەرىنىڭ ءبىرى ەكەنىن ايتتى.