بيىل ادامزات بالاسىنىڭ تاريحىنداعى زاردابى مەن قاسىرەتى وتە اۋىر, ەڭ قانقۇيلى ەكىنشى دۇنيەجۇزىلىك سوعىستاعى جەڭىسكە 80 جىل تولدى. نەمىس باسقىنشىلارىنا قارسى كۇرەستە قازاقستاننىڭ قوسقان ۇلەسى ۇشان-تەڭىز. سوعىستا اتىلعان ءاربىر ون وقتىڭ توعىزى ەلىمىزدە شىعارىلسا, ءاربىر بەسىنشى وتانداسىمىز مايدانعا اتتاندى. سول مايدانگەرلەردىڭ ءوزى بۇگىندە ازايىپ بارادى. الايدا ەرلىگى ەلگە مۇرا, ۇرپاققا ۇران بولعان اسىل جاندار سانادان سىزىلىپ, ويدان وشپەۋگە ءتيىس.
ءبىزدىڭ پانفيلوۆ اۋىلدىق وكرۋگى اقساقالدار كەڭەسىنىڭ باستاماسىمەن پانفيلوۆ اۋىلىندا ۇوس ارداگەرلەرىنە ەسكەرتكىش ورناتۋ ەرتە كوكتەمدە قولعا الىنىپ, 9 مامىر جەڭىس كۇنىندە اشىلدى. بۇل ەسكەرتكىش-تاقتادا پانفيلوۆ, ارقاباي, ءتۇزۋساي اۋىلدارىنان سوعىسقا قاتىسىپ, بەيبىت ومىردە ەڭبەك ەتىپ قايتىس بولعان 178 جەرلەسىمىزدىڭ اتى-ءجونى جازىلدى.
وسى ءتىزىمنىڭ ىشىندە قۇدايبەرگەن جانسەرىكوۆ سوعىستا كورسەتكەن ەرلىكتەرىنە ساي ەكى رەت كەڭەس وداعىنىڭ باتىرى اتاعىنا ۇسىنىلىپ, الا الماي قالعان. بۇل مايدانگەرگە پانفيلوۆ اۋىلىنان كوشە بەرىلدى. جەڭىستىڭ 80 جىلدىعىنا وراي ەكى مايدانگەرگە كوشە اتاۋىن بەرۋ تۋرالى اۋدان اكىمىنىڭ اتىنا ۇسىنىس بەرىلدى. وسى ەسكەرتكىشتىڭ ورناتىلۋىنا دەمەۋشىلىك جاساعان كاسىپكەرلەر مەن جالپى جۇرتشىلىققا ريزاشىلىعىمىزدى بىلدىرەمىز.
مايدانگەرلەردىڭ ەسىمى قاشالىپ جازىلعان ەسكەرتكىش جانىندا «ەرلىك – ەلگە مۇرا, ۇرپاققا ۇران» اتتى سالتاناتتى جيىن ءوتتى. ءىس-شارانىڭ اشىلۋ راسىمىندە الماتى وبلىسىنىڭ قۇرمەتتى ازاماتى نۇرسەيىت قۇدىقوۆ, پانفيلوۆ اۋىلدىق وكرۋگىنىڭ اكىمى دۋلات داۋلەتاليەۆ, اكىم ورىنباسارى ساۋلە مىقتىباەۆا, پانفيلوۆ اۋىلدىق اقساقالدار كەڭەسىنىڭ مۇشەسى سۋلتان نيزاموۆ لەبىزىن ءبىلدىردى. №33 ورتا مەكتەپ ۇجىمى كونتسەرتتىك باعدارلاما ۇسىندى. ءىس-شارا سوڭىندا قوناقتار مەن اۋىل تۇرعىندارى ەسكەرتكىشكە گۇل شوقتارىن قويدى. گۇل شوقتارى پانفيلوۆتىڭ دا بيۋستىنە قويىلىپ, قۇرمەت كورسەتىلدى.
وسىنداي تاعىلىمدى ءىس-شارا وكرۋگ اۋماعىنداعى جىبەك جولى, قارابۇلاق, توڭكەرىس اۋىلدارىنداعى مايدانگەرلەرگە ارنالعان ەسكەرتكىشتەردىڭ دە جانىندا ءوتتى.
2024 جىلدىڭ اقپان ايىندا №17 ورتا مەكتەپتە وتكەن باسقوسۋدا جەڭىستىڭ 80 جىلدىعىنا دايىندىق تۋرالى اڭگىمە قوزعالعان ەدى. جيىندا عالىم, پروفەسسور لەيلا احمەتوۆا مەن قحا مۇشەسى, ەتنومەدياتور جۇماقىز بۇتاباەۆا ءبىزدىڭ ەسكەرتكىش ورناتۋ تۋرالى ۇسىنىسىمىزدى قولداپ, جوباعا قوسقان ەدى. وسى كىسىلەردىڭ ۇيىتقى بولۋىمەن ارداگەرلەردىڭ اتى-جوندەرىن ناقتىلاپ, تىزىمگە قوسۋ جۇمىستارىن باستاپ كەتتىك. بىرلەسىپ اتقارعان جۇمىستىڭ ناتيجەسىندە بۇرىنعى ەسكەرتكىشتىڭ جالعاسى رەتىندە جاڭا ەسكەرتكىش ورناتىلدى.
باتىر بابالارىمىزدىڭ قاھارماندىق رۋحى ۇرپاقتان-ۇرپاققا ونەگە بولادى دەپ سانايمىز. ەرلىك ەشقاشان ۇمىتىلمايدى.
اباي جۇرىنوۆ,
پانفيلوۆ اۋىلدىق اقساقالدار كەڭەسىنىڭ توراعاسى
الماتى وبلىسى,
تالعار اۋدانى