الماتى قالاسىندا بىرنەشە جىل بويى الەۋمەتتىك جەلىلەر ارقىلى جاڭا تۋعان سابيلەردى زاڭسىز ساتۋمەن اينالىسقان قىلمىستىق توپتىڭ ارەكەتى اشكەرەلەندى, دەپ حابارلايدى Egemen.kz.
تەرگەۋ بارىسىندا بەلگىلى بولعانداي, قىلمىستىق توپتىڭ مۇشەلەرى الەۋمەتتىك جەلى ارقىلى بالا اسىراپ العىسى كەلەتىن ادامدار مەن الەۋمەتتىك وسال توپتاردان شىققان ايەلدەردى بايلانىستىرىپ وتىرعان. ولاردىڭ اراسىندا شەتەلدىك ازاماتشالار دا بولعان.
وپەراتيۆتىك ءىس-شارا كەزىندە پوليتسەيلەر جاڭا تۋعان ۇل بالانى ءىرى اقشا سوماسىنا ساتۋ ارەكەتىن تىركەپ, كۇدىكتىلەردى قىلمىس ۇستىندە ۇستادى. قازىرگى تاڭدا اتالعان فاكت بويىنشا قىلمىستىق ءىس قوزعالىپ, كۇدىكتىلەر قاماۋعا الىندى. ءسابي مەملەكەت قامقورلىعىنا الىنىپ, ارنايى مەكەمەگە ورنالاستىرىلدى.
الماتى قالالىق پوليتسيا دەپارتامەنتى باستىعىنىڭ ءبىرىنشى ورىنباسارى قۋاتبەك ناۋاتوۆ:
-بۇل ءبىر رەتتىك وقيعا ەمەس. ءبىز ورنىققان, جۇيەلى سحەما بولعان دەپ سانايمىز. مۇمكىن, بۇل قىلمىس باسقا وڭىرلەرمەن دە بايلانىستى. جاڭا تۋعان سابيلەرگە قاتىستى مۇنداي زاڭسىز ارەكەتتەر – ادامگەرشىلىككە جات اۋىر قىلمىس. مۇنداي ىستەردىڭ ەشقايسىسى جازاسىز قالمايدى,- دەدى.
ارايلىم مىرزاحان, ەۇۋ ستۋدەنتى