قازاقستاننىڭ ءتۇرلى وڭىرلەرىندە قىزمەتتىك يتتەردىڭ توتەنشە جاعدايلار كەزىندەگى تاپسىرمالاردى ورىنداۋعا قانشالىقتى دايىن ەكەنىن ايقىندايتىن سەرتيفيكاتتاۋ سىناقتارى ءساتتى اياقتالدى, دەپ حابارلايدى Egemen.kz تجم ءباسپاسوز قىزمەتىنە سىلتەمە جاساپ.
قىزمەتتىك يتتەر ەلىمىزدىڭ تۇكپىر-تۇكپىرىندە ىزدەۋ-قۇتقارۋ جۇمىستارىندا ماڭىزدى ءرول اتقارا وتىرىپ, ازاماتتىق قورعانىس جۇيەسىنىڭ اجىراماس بولىگى بولىپ قالا بەرەدى. وتكىر ينستينكتىگىنىڭ, توزىمدىلىگىنىڭ جانە ەڭ قيىن جاعدايلاردا ارەكەت ەتۋ قابىلەتىنىڭ ارقاسىندا كينولوگيالىق ەسەپتوپتار تابيعي جانە تەحنوگەندىك ورتادا ادامداردى تابۋ مىندەتتەرىن ورىندايدى.
ەلىمىزدىڭ ءارتۇرلى ايماقتارىندا قىزمەتتىك يتتەردىڭ توتەنشە جاعدايلار كەزىندە ارەكەت ەتۋگە دايىندىعى ارنايى سەرتيفيكاتتاۋ سىناقتارى ارقىلى تەكسەرىلىپ, ءساتتى اياقتالدى.
اقمولا وبلىسىندا نەمىس وۆچاركاسى ديگگەر جانە بەلگيالىق وۆچاركالار اكسەل مەن گەرا سىناقتاردان سۇرىنبەي ءوتتى. بۇل يتتەر مەن ولاردىڭ كينولوگتارى بارلىق تاپسىرمالاردى ءتيىمدى ورىنداپ, «ا» ساناتىنداعى وپەراتسيالارعا قاتىسۋ قۇقىعىنا يە بولدى.
الماتى وبلىسى مەن الماتى قالاسىندا ەيس, لادا, الفا ەسىمدى بەلگيالىق وۆچاركالار مەن ارلان اتتى نەمىس وۆچاركاسى جوعارى ىزدەۋ قابىلەتتەرى مەن كينولوگتارىمەن ءوزارا جۇمىس ۇيلەسىمدىلىگىن كورسەتىپ, سىناقتان ءساتتى ءوتتى.
شىعىس قازاقستان وبلىسىندا ءتورت كينولوگيالىق توپ سەرتيفيكاتتاۋدان ءوتىپ, حيت, ميللەنيۋم ستار, يستوچنيك سچاستيا كيانتي جانە يستوچنيك سچاستيا ۆيللينگتون ەسىمدى لابرادورلار ناقتى جاعدايعا ۇقساس ورتادا — ۇيىندىلەر مەن كەدەرگىلەر اراسىنان زارداپ شەككەندەردى تابۋ تاپسىرماسىن ورىندادى.
جەتىسۋ وبلىسىندا تجد جەدەل-قۇتقارۋ جاساعى بازاسىندا كەدەرگىلەردەن ءوتۋ, ورمان مەن قيراعان عيماراتتاردا ىزدەۋ جاتتىعۋلارى ءوتتى. بارلىق يتتەر مەن كينولوگتار جوعارى دايىندىق دەڭگەيىن كورسەتىپ, وپەراتسيالارعا قاتىسۋعا لايىق دەپ تانىلدى.
باتىس قازاقستان وبلىسىندا دجەسسيدىڭ قىزمەتتىك ءيتى بارلىق تاپسىرمالاردى تولىق جانە ساپالى ورىنداپ شىقتى.
قىزىلوردا وبلىسىندا راپيتا مەن يارا اتتى بەلگيالىق وۆچاركالار جانە كودي ەسىمدى گولدەن-رەتريۆەر تىڭداۋ مەن يكەمدىلىككە قاتىستى جاتتىعۋلاردا جوعارى ناتيجە كورسەتىپ, «ا» ساناتىنا سايكەس كەلەتىنىن دالەلدەدى.
قوستاناي وبلىسىندا ەكى توپ تابيعي جانە جاساندى ورتادا ۇزدىك ناتيجە كورسەتىپ, بارلىق كەزەڭنەن تابىستى ءوتتى.
ماڭعىستاۋ وبلىسىندا نەمىس وۆچاركاسى گەرمەس پەن بەلگيالىق وۆچاركا نايزا جوعارى دايىندىقتارىن كورسەتىپ, سىناقتان سۇرىنبەي ءوتتى.
پاۆلودار وبلىسىنىڭ ەكىباستۇز قالاسىنداعى جەدەل-قۇتقارۋ جاساعىندا رادي مەن سانتي اتتى جاس يتتەر العاش رەت سىناققا قاتىسىپ, بارلىق كەزەڭدە ۇيلەسىمدى جۇمىس كورسەتىپ, سەنىمگە يە بولدى.
شىمكەنت قالاسىندا لابرادور-رەتريۆەر بەرتا, بەلگيالىق وۆچاركا ەۆا جانە ارچي ەسىمدى يتتەرمەن جۇمىس ىستەيتىن ەسەپتوپتار دا وزدەرىنىڭ كاسىبي دايىن ەكەندىگىن دالەلدەپ, سەرتيفيكات الدى.
بۇل سىناقتار كينولوگيالىق ەسەپتوپتاردىڭ قۇتقارۋ جۇمىستارىنداعى كاسىبي دەڭگەيىن تاعى ءبىر مارتە كورسەتتى. بۇل يتتەر — توتەنشە جاعداي تۋىنداعاندا العاشقى كومەككە كەلەتىن, ادام ءومىرىن ساقتاۋعا ارنالعان ماڭىزدى قۇرال بولىپ وتىر.
ولار — ۋاقىتپەن جارىسا ارەكەت ەتەتىن, كوپتەگەن ادام ءومىرىن قۇتقارۋعا ۇلەس قوسقان ناعىز ءتورت اياقتى باتىرلار.