ەلورداداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اسا كورنەكتى جۋرناليست, قازاقستاننىڭ حالىق جازۋشىسى, قوعام قايراتكەرى شەرحان مۇرتازانىڭ اۋديتورياسى اشىلدى. سالتاناتتى راسىمگە سەنات پەن ءماجىلىس دەپۋتاتتارى, مەملەكەت جانە قوعام قايراتكەرلەرى, ەلىمىزدىڭ جۋرناليستيكا سالاسىنىڭ ارداگەرلەرى, بەلگىلى اقىن-جازۋشىلار مەن بۇقارالىق اقپارات قۇرالدارىنىڭ وكىلدەرى, سونىمەن قاتار شەتەلدىك سەرىكتەس جوعارى وقۋ ورىندارىنىڭ عالىمدارى قاتىستى.
شەرحان مۇرتازانىڭ وتاندىق جۋرناليستيكا مەن ادەبيەتتىڭ دامۋىنا قوسقان ۇلەسىن ايعاقتايتىن بۇل اۋديتوريا وسى وقۋ ورنىنىڭ عانا ەمەس, ەلوردانىڭ كاسىبي-ينتەللەكتۋالدىق ورتالىعى بولماق.
«بەلگىلى قايراتكەر شەرحان مۇرتازا اتىنداعى اۋديتوريانىڭ اشىلۋى – بۇكىل قوعامعا وي سالاتىن, ۇلگى بولاتىن ءىس-شارا. بىلىكتى جۋرناليستەر, ءبىلىمدى ازاماتتار وسى اۋديتوريادا شەر-اعانىڭ رۋحىنا تاعزىم ەتىپ, ۇلكەن اسەر السا ەكەن دەگەن ويمەن اشىپ وتىرمىز», دەدى ەۇۋ رەكتورى, اكادەميك ەرلان سىدىقوۆ.
ءىس-شارا بارىسىندا شەر-اعانىڭ ءىزباسارلارى سەنات دەپۋتاتى نۇرتورە ءجۇسىپ, قوعام قايراتكەرلەرى ءۋاليحان قاليجانوۆ, دارحان مىڭباي, قالامگەر جارىلقاپ بەيسەنباي ۇلى, ءماجىلىس دەپۋتاتتارى قازىبەك يسا, جاناربەك ءاشىمجان, «قازاق گازەتتەرى» سەرىكتەستىگىنىڭ ديرەكتورى, اكادەميك ديحان قامزابەك ۇلى, «حابار» اگەنتتىگى باسقارما توراعاسى كەمەلبەك ويشىباەۆ جانە وزگە دە زيالى قاۋىم وكىلدەرى تەبىرەنە ءسوز سويلەپ, شەرحان مۇرتازانىڭ قايتالانباس تۇلعا, كورنەكتى جازۋشى, تالانتتى پۋبليتسيست, شەبەر اۋدارماشى بولعانىن اتاپ ءوتتى.
«شەرحان مۇرتازا تەمىرقازىق رەتىندە بىزگە ۇلگى بولا ءبىلدى. قايراتكەرلىك, قالامگەرلىك, جۋرناليستىك جاعىنان الساق تا, شەر-اعانىڭ ومىرلىك جولىن جاقسى بىلەسىزدەر. ول كىسىنىڭ وسىندا قويىلعان كىتاپتارىن, ماقالالارىن وقىپ, پارلامەنتتە سويلەگەن سوزدەرىنەن, ءومىر جولىنان تاعىلىم الىپ, شەر-اعاڭشا جازىپ, وي ايتۋعا ۇمتىلاتىن قازاقتىڭ جاس جۋرناليستەرىنىڭ تولقىنى كوپتەپ شىعا بەرسىن», دەدى نۇرتورە ءجۇسىپ.
بەلگىلى قالامگەر, اكادەميك ءۋاليحان قاليجانوۆ شەرحان مۇرتازا رەداكتورلىق ەتكەن شاقتا قازاق باسىلىمىنىڭ التىن ءداۋىرى ورناعانىن, گازەتتىڭ وقىلىمدى بولۋىنا, وقىرماندى كوبەيتۋگە ولشەۋسىز ۇلەس قوسقانىن اتاپ ءوتتى.
ديحان قامزابەك ۇلى «ەگەمەننىڭ» شىن مانىندە ەگەمەن بولۋىنا شەرحان مۇرتازا قالىپتاستىرعان مىقتى ءداستۇردىڭ اسەر ەتكەنىن باسا ايتتى. سونداي-اق كورنەكتى جازۋشى, جۋرناليست ءارى بىرەگەي قوعام قايراتكەرى اتىنداعى اۋديتوريانىڭ اشىلۋىن – مەملەكەتتىك ماڭىزى بار ءىس ءارى كاسىبي كورەگەندىكتىڭ كورىنىسى ەكەنىن جەتكىزدى.
بيىل 35 جىلدىعى اتالىنىپ ءوتىپ جاتقان «Ana tılı» گازەتىنىڭ تۇڭعىش رەداكتورى, تۇركىتانۋشى جارىلقاپ بەيسەنباي ۇلى «شەرحان مۇرتازا مەن سەيداحمەت بەردىقۇلوۆ سىندى ۇلت جۋرناليستيكاسىنداعى دارا تۇلعالار اتىنداعى اۋديتوريانىڭ قاتار ورنالاسۋى ءبارىمىزدى قۋانتىپ وتىر. راسىندا, باردى باعالاۋ مەن قالام دارابوزدارىن قادىرلەۋ – ەلدىك بورىشىمىز» دەدى.
ۋنيۆەرسيتەتتىڭ جۋرناليستيكا جانە الەۋمەتتىك عىلىمدار فاكۋلتەتىندە اشىلعان بۇل اۋديتوريا زاماناۋي تەحنيكامەن جابدىقتالعان. بۇعان جامبىل وبلىسىنىڭ اكىمدىگى تىكەلەي قولداۋ ءبىلدىرىپتى. اۋديتوريا بولاشاق جۋرناليستەرگە ءبىلىم جانە زەرتتەۋ الاڭى رەتىندە قىزمەت ەتپەك. مۇندا جازۋشىنىڭ ءومىرى مەن شىعارماشىلىعىنا ارنالعان دەرەكتى ەكسپوزيتسيالار, فوتو جانە بەينەماتەريالدار, ارحيۆتىك دەرەككوزدەر قويىلعان.