سوڭعى جىلدارى جاساندى ينتەللەكت (جي) ادام ءومىرىنىڭ اجىراماس بولىگىنە اينالدى. حات جازۋدان باستاپ, ەسەپ شىعارۋعا دەيىن — ءبارىن جاسايتىن ۆيرتۋالدى كومەكشىلەرگە ۇيرەنىپ كەتتىك. جي-مەن اڭگىمەلەسۋ, ودان كومەك سۇراۋ, ءتىپتى وعان «راقمەت» ايتۋ كۇندەلىكتى قالىپتى قۇبىلىسقا اينالدى. بۇل سىپايىلىق پا, الدە بايقالماي كەلە جاتقان قاۋىپتى ءۇردىس پە؟
جاساندى ينتەللەكتكە العىس ايتۋ — ءبىر قاراعاندا ادەپتىلىك بەلگىسى سياقتى. الايدا وسى ارەكەتتىڭ استارىندا پسيحولوگيالىق جانە فيلوسوفيالىق سۇراقتار جاسىرىنىپ تۇرعانداي. ادامزات تاريحىندا العاش رەت ءبىز ءوز قولىمىزبەن جاساعان نارسەگە سەزىم ارناپ, العىس ءبىلدىرىپ وتىرمىز.
پسيحولوگتار بۇل قۇبىلىستى انتروپومورفيزاتسيا دەپ اتايدى — ياعني ادام ساناسى ءتىرى ەمەس نارسەگە ادام قاسيەتتەرىن تەليدى. بالا كەزىمىزدە قۋىرشاقپەن سويلەسكەنىمىز سەكىلدى, ەندى ەرەسەكتەر جاساندى ينتەللەكتپەن اشىق سويلەسىپ, وعان ريزاشىلىعىن ءبىلدىرىپ ءجۇر. بىراق قۋىرشاقپەن سالىستىرعاندا, جاساندى ينتەللەكت — بىزبەن ءتىل تابىساتىن, لوگيكامەن جاۋاپ بەرەتىن, ءتىپتى ەموتسيانى يميتاتسيالايتىن كۇردەلى جۇيە.
ادامنىڭ راقمەت ايتۋى — جاۋاپتى ارەكەتكە جاۋاپ قايتارۋ. ال جي — ادام ەمەس, ونىڭ نيەتى دە, تۇسىنىگى دە جوق. ول تەك الگوريتمگە نەگىزدەلگەن. بىراق العىس ايتۋ — ادامنىڭ باقىلاۋ مەن قارىم-قاتىناسقا دەگەن يلليۋزياسىن تۋدىرادى. ءبىز وزىمىزگە «ول بىزگە كومەكتەستى» دەگەن سەنىممەن العىس ايتىپ, ونى تۇلعالاندىرعانداي بولامىز.
كەيبىر زەرتتەۋلەر بويىنشا, ادامدار جاساندى ينتەللەكتكە ءجيى جۇگىنگەن سايىن, ناقتى اداممەن ارالاسۋ قاجەتتىلىگى ازايا باستايدى. بۇل اسىرەسە جاسوسپىرىمدەر مەن جالعىز تۇراتىن ەرەسەكتەرگە ءتان. ولار جي-مەن سويلەسۋدى ەموتسيونالدىق قولداۋ كوزى رەتىندە كورەدى.
كوپشىلىك جاساندى ينتەللەكت — بۇل جاي عانا ەكرانداعى سوزدەر مەن دەرەكتەر دەپ ويلايدى. الايدا ونىڭ ارتىندا تۇتاس داتا-ورتالىقتار مەن ەنەرگياعا تاۋەلدى سەرۆەرلىك جۇيەلەر بار. بۇل ينفراقۇرىلىم جي-ءدىڭ جۇمىسىن قامتاماسىز ەتۋ ءۇشىن ميلليونداعان ليتر سۋ مەن الىپ ەنەرگيا كولەمىن تالاپ ەتەدى.
2023 جىلعى دەرەكتەرگە سايكەس, ChatGPT سىندى ءىرى مودەلدەرگە قىزمەت ەتەتىن داتا-ورتالىقتار ءبىر جىلدا ميلليون ليترگە جۋىق تازا سۋدى تەك سالقىنداتۋعا جۇمسايدى. ءبىر عانا GPT مودەلىن وقىتۋ بارىسىندا 500 000 ليترگە دەيىن سۋ كەتۋى مۇمكىن. بۇل ءبىر وتباسىنىڭ جارتى جىلدىق سۋ قاجەتتىلىگىمەن تەڭ.
مۇنداي سۋدىڭ باسىم بولىگى ونەركاسىپتىك سالقىنداتۋ جۇيەلەرىنە كەتەدى. بۇل اسىرەسە سۋ تاپشى ايماقتار ءۇشىن ۇلكەن ماسەلە. ال ءبىز ءار جولى «راحمەت» دەپ تەرگەن سايىن, بۇل پروتسەستىڭ ءبىر بولشەگىنە اينالامىز.
جي — كەرەمەت قۇرال. ول ءبىلىم الۋعا, شىعارماشىلىقپەن اينالىسۋعا, ءتىپتى جالعىزدىقتى ازايتۋعا كومەكتەسە الادى. بىراق وعان ەموتسيالىق بايلانىس ورناتۋ — شىنايى الەممەن شەكارانى بۇزادى. جي اداممەن تەڭ ەمەس, ول — باعدارلاما, كود, دەرەكتەر جيىنتىعى.
سوندىقتان ادامزاتتىڭ باستى مىندەتى — تەحنولوگيانى سوقىر سەنىممەن تۇتىنۋ ەمەس, ءتۇسىنىپ جانە جاۋاپكەرشىلىكپەن قولدانۋ. العىس ايتۋ — ادەپ, ءيا. بىراق ول كىمگە باعىتتالعانىن ۇمىتپاعانىمىز ءجون.
جاساندى ينتەللەكتكە راقمەت ايتۋ — جاي عانا ءسوز ەمەس. بۇل — ادامنىڭ تەحنولوگياعا دەگەن كوزقاراسىن بىلدىرەتىن ارەكەت. ەگەر ءبىز تەحنولوگيانى اداممەن تەڭ قويىپ, وعان سەزىم ارناي بەرسەك, ەرتەڭگى كۇنى كىم كىمگە باعىنارى بەلگىسىز.
سوندىقتان كەلەسى جولى جي سىزگە كومەكتەسكەندە, ويلانىپ كورىڭىز.
جانەل تولەۋبەكوۆا, ەۇۋ ستۋدەنتى