مەملەكەتتىك كەڭەسشى ەرلان قارين قىتاي كوممۋنيستىك پارتياسىنىڭ ورتالىق كوميتەتى ۇگىت-ناسيحات ءبولىمى مەڭگەرۋشىسىنىڭ ورىنباسارى حۋ حەپينمەن كەزدەستى. بۇل جۇزدەسۋ مادەني-گۋمانيتارلىق جانە اقپاراتتىق سالاداعى ەكىجاقتى ىنتىماقتاستىقتى دامىتۋ اياسىندا ءوتتى.
مەملەكەتتىك كەڭەسشى قازاقستان مەن قىتاي اراسىنداعى بۇقارالىق اقپارات قۇرالدارى, عىلىم جانە مادەنيەت سالالارىنداعى ءوزارا ءىس-قيمىلدىڭ نەگىزگى باعىتتارىن اتاپ ءوتتى. سونداي-اق ەكى ەلدىڭ ساراپتامالىق ورتالىقتارى مەن جەتەكشى مەديا قۇرىلىمدارى اراسىنداعى تاجىريبە الماسۋ ماسەلەسىنە ەرەكشە نازار اۋداردى.
حۋ حەپين قوناقجايلىق كورسەتكەنى ءۇشىن قازاقستان تاراپىنا ريزاشىلىعىن ءبىلدىرىپ, قىتاي مەن ورتالىق ازيا ەلدەرىنىڭ باق سالاسىنداعى ىنتىماقتاستىعى فورۋمىنىڭ جوعارى دەڭگەيدە ۇيىمداستىرىلعانىن ايتتى.
تاراپتار گۋمانيتارلىق ديالوگتى نىعايتۋ ءوزارا تۇسىنىستىك پەن ىنتىماقتاستىق رۋحىنداعى بايلانىستاردى ودان ءارى بەكەمدەۋگە ىقپال ەتەتىنىنە سەنىم ءبىلدىردى.