ماسكەۋدە قاۋىپسىزدىك ماسەلەلەرىنە جەتەكشىلىك ەتەتىن جوعارى وكىلدەردىڭ XIII حالىقارالىق كەزدەسۋى ءوتتى. وعان قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى.
رەسەيدىڭ قاۋىپسىزدىك كەڭەسى ۇيىمداستىرعان ءىس-شارادا قاۋىپسىزدىك كەڭەستەرىنىڭ, قۇقىق قورعاۋ جانە ارنايى ورگانداردىڭ, سىرتقى ساياسي ۆەدومستۆولاردىڭ, سونداي-اق حالىقارالىق ۇيىمداردىڭ اتىنان كەلگەن 130-دان اسا دەلەگاتسيا مۇشەلەرى باس قوستى.
پلەنارلىق وتىرىس تەڭ جانە بولىنبەيتىن قاۋىپسىزدىك ارحيتەكتۋراسىن قالىپتاستىرۋ تاقىرىبىنا ارنالدى. تالقىلاۋ اياسىندا فورۋمعا قاتىسۋشىلار حالىقارالىق جاعدايدىڭ نەگىزگى دامۋ ءۇردىسى, جاھاندىق سىن-قاتەرلەر جونىندە پىكىر الماستى.
قازاقستان قاۋىپسىزدىك كەڭەسىنىڭ حاتشىسى تەڭ جانە بولىنبەيتىن قاۋىپسىزدىك قاعيداتىن ىسكە اسىرۋ بارلىق مەملەكەتتىڭ مۇددەلەرىن ءوزارا قۇرمەتتەۋدى, سونداي-اق وڭىرلىك جانە كونتينەنتتىك قاۋىپسىزدىك جۇيەلەرىنە سۇيەنۋدى كوزدەيتىنىن ايتتى.
سونىمەن قاتار قازاقستان مەن ورتالىق ازيا ءوڭىرىنىڭ حالىقارالىق قاۋىپسىزدىكتى قامتاماسىز ەتۋ ىسىنە ۇلەس قوساتىن بىرقاتار باعىتىن اتاپ ءوتتى. سونىڭ ىشىندە تەرروريزم مەن ەكسترەميزمگە قارسى تۇرۋ, جاپپاي قىرىپ-جويۋ قارۋىن تاراتپاۋدىڭ جاھاندىق رەجىمدەرىن نىعايتۋ, جانجالدى تومەندەتۋدىڭ كەپىلى رەتىندە وڭىرلىك ينتەگراتسيانى ىلگەرىلەتۋ شارالارىنا نازار اۋداردى.
بۇدان بولەك, اقپاراتتىق قاۋىپسىزدىكتى قامتاماسىز ەتۋ سالاسىنداعى حالىقارالىق ىنتىماقتاستىق ماسەلەسى قاراستىرىلدى. سونىمەن قاتار شىۇ مەن تمد-عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىنىڭ بەيرەسمي كەزدەسۋلەرى ءوتتى.
فورۋم اياسىندا عيزات نۇرداۋلەتوۆ بىرقاتار شەتەلدىك ارىپتەستەرىمەن كەلىسسوزدەر جۇرگىزىپ, ءوزارا ىقپالداستىق ماسەلەلەرىن قاراستىردى.