وقۋ جىلى دا ءتامامدالدى. وقۋشىلار جازعى دەمالىسقا شىقتى. مەكتەپ تۇلەكتەرى ءۇشىن ءومىردىڭ جاڭا كەزەڭى باستالسا, تومەنگى سىنىپ جەتكىنشەكتەرى جازعى دەمالىستى قىزىقتى وتكىزگىسى كەلەدى. بۇل ماسەلە اتا-انالاردى دا تولعانتادى.
وسىعان وراي قالاداعى №2 وقۋشىلار سارايى بالالاردىڭ جازعى دەمالىسىن قىزىقتى ءارى ءتيىمدى وتكىزۋ ءۇشىن 10 كۇندىك لاگەر قىزمەتىن ۇيىمداستىردى. مەكەمە باسشىسى دانيار ەگىزباەۆتىڭ ايتۋىنشا, 1 ماۋسىمنان تامىزعا دەيىن 5 كەزەڭ بويىنشا 625 وقۋشى لاگەردە دەمالا الادى. سونداي-اق ءار كەزەڭ بويىنشا 25 بالادان بەس توپ وقۋشىلار سارايىنداعى ءتۇرلى ۇيىرمەگە قاتىسىپ, لاگەردەگى كۇندەرىن قىزىقتى وتكىزبەك. مۇندا جەتكىنشەكتەر سۋرەت سالىپ, سپورتتىق جاتتىعۋلار جاساپ, قولونەرمەن اينالىسىپ, موبيلوگرافيا مەن روبوتتەحنيكانىڭ قىر-سىرىن مەڭگەرەدى.
«جازعى دەمالىستا بالالار قىدىرىپ ويناعىسى كەلەدى. اتا-انالار تاڭەرتەڭنەن كەشكە دەيىن جۇمىستا بولعاندىقتان, ولار كوبىنەسە كوشە مەن اۋلاداعى ويىن الاڭدارىنا بارادى. قالا بەردى كۇنى بويى عالامتور اقتارىپ, تەلەفون شۇقىلايدى. سوندىقتان وقۋشىلاردىڭ بوس ۋاقىتىن پايدالى ىسكە جۇمساۋ ءۇشىن مەكەمە جانىنان جازعى لاگەر اشىپ وتىرمىز. وعان شىمكەنت قالاسىنداعى كەز كەلگەن جەتكىنشەك جازىلا الادى. ءبىزدىڭ لاگەر بالالارعا ۇنايدى دەپ ويلايمىن. ويتكەنى ون كۇندىك دەمالىستى قىزىقتى ءارى ەستە قالاتىنداي ەتىپ وتكىزۋگە بارىمىزدى سالامىز», دەدى وقۋشىلار سارايىنىڭ باسشىسى د.ەگىزباەۆ.
بۇل ءبىلىم وشاعى 2023 جىلى اشىلعان. قازىر قالاداعى ەڭ زاماناۋي وقۋشىلار سارايى سانالادى. مۇندا عىلىمي باعىتتاعى ءتۇرلى زەرتحانا جۇمىس ىستەيدى.
شىمكەنت قالاسىنىڭ ءبىلىم باسقارماسى تاراتقان مالىمەتكە سۇيەنسەك, شاھاردا مەملەكەتتىك جانە جەكەمەنشىك 290 مەكتەپ تىركەلگەن. مۇندا 270 مىڭنان استام وقۋشى ءبىلىم الادى. بيىل ءبىلىم باسقارماسى بالالاردىڭ جازعى دەمالىسىن ءتيىمدى ۇيىمداستىرۋعا كوڭىل ءبولىپ وتىر. اسىرەسە مەكتەپ جانىنداعى ۇيىرمەلەر مەن اۋلا سپورت كلۋبتارىنا ەرەكشە ءمان بەرمەك.
«نەگىزىندە بالالاردى مەكتەپتەن تىس قوسىمشا بىلىممەن قامتۋ ءۇشىن وقۋشىلار سارايىن كوبەيتۋ قاجەت. ازىرگە قالادا وسىنداي ءۇش مەكەمە بار. جوسپار بويىنشا شاھاردىڭ ءار اۋدانىنان ءبىر-ءبىر وقۋشىلار سارايىن اشۋ كوزدەلگەن ەدى. الەۋمەتتىك ماسەلەنى شەشۋگە مەملەكەت تاراپىنان كەيىنگى جىلدارى جاقسى كوڭىل ءبولىنىپ كەلەدى. سوندىقتان قالادا زاماناۋي وقۋشىلار سارايىنىڭ سانى ارتا تۇسەدى دەگەن سەنىمدەمىز. مەكتەپتەن تىس قوسىمشا ءبىلىم ۇيىمدارى كوپ بولسا, كانيكۋل كەزىندە بالالاردىڭ جازعى دەمالىستارىن ۇيىمداستىرۋعا دا جاقسى», دەيدى د.ەگىزباەۆ.
سونداي-اق شىمكەنت قالاسىنىڭ توتەنشە جاعدايلار دەپارتامەنتى جۋىردا ارنايى بريفينگ ۇيىمداستىرىپ, اتا-انالارعا بالالارىن قاراۋسىز قالدىرماۋدى ەسكەرتتى. دەپارتامەنت ماماندارىنىڭ ايتۋىنشا, قالادا قاۋىپتى دەپ تانىلعان 13 سۋ كوزى بار. سوندىقتان شومىلۋ ناۋقانى كەزىندە دەپارتامەنت قالالىق اكىمدىكپەن بىرلەسىپ, بىرقاتار قاۋىپسىزدىك ءىس-شارالارىن ۇيىمداستىرىپ وتىر.
شىمكەنت