«eGov Mobile» قوسىمشاسىندا ءۇي جانۋارىنا ارنالعان تسيفرلىق پاسپورت قىزمەتى ىسكە قوسىلدى. بۇل قۇجات ءۇي جانۋارلارىن ەسەپكە الۋ بىرىڭعاي دەرەكتەر بازاسىمەن بايلانىستى جۇمىس ىستەيدى.
تسيفرلىق تولقۇجات ۆەتەرينارلىق كلينيكاعا بارعاندا, ساياحات كەزىندە, كورمەگە قاتىسقاندا نەمەسە جانۋارىڭىز جوعالعان جاعدايدا جەدەل اقپارات ۇسىنۋعا وتە ىڭعايلى بولماق. سونىمەن قاتار بۇل جۇيە قاڭعىباس جانۋارلار سانىن ازايتۋعا جانە يەلەرىنىڭ جاۋاپكەرشىلىگىن ارتتىرۋعا كومەكتەسەدى. ناۋرىز ايىنداعى مالىمەت بويىنشا جۇيەدە 224 مىڭنان استام ءۇي جانۋارى تىركەلگەن, ونىڭ ىشىندە 20 مىڭنان استامى – يەسىز جانۋارلار.
تسيفرلىق پاسپورتتا بىرنەشە مالىمەت قامتىلادى. اتاپ ايتساق, جانۋاردىڭ جەكە ءنومىرى, اتى, ءتۇسى, تۇقىمى, تۋعان كۇنى, ەرەكشە بەلگىلەرى, جانۋاردىڭ ءتۇرى مەن جىنىسى, تىركەلگەن ءارى ناقتى تۇراتىن مەكەنجايى, يەسىنىڭ تولىق اتى-ءجونى مەن جسن, سونداي-اق چيپتەۋ, ستەريليزاتسيا, ۆاكتسيناتسيا تۋرالى اقپاراتتار تسيفرلىق پاسپورتتا تولىق جازۋلى تۇرادى.
قىزمەتتى پايدالانۋ ءۇشىن ەڭ اۋەلى «eGov Mobile» قوسىمشاسىنا كىرىپ, اۆتوريزاتسيادان ءوتۋ قاجەت. سودان سوڭ «تسيفرلىق قۇجاتتار» سەرۆيسىن اشىپ, «باسقا قۇجاتتار» بولىمىنەن جانۋاردىڭ پاسپورتىن تابۋىڭىز كەرەك. ەگەر قۇجات كورىنبەسە, «قۇجاتتاردى جاڭارتۋ» باتىرماسىن باسىڭىز.
جاڭا سەرۆيس تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ باستاماسىمەن, «ۇلتتىق اقپاراتتىق تەحنولوگيالار» اق جانە ەكولوگيا مينيسترلىگىمەن بىرلەسە وتىرىپ ىسكە قوسىلعان.