گرەكيا استاناسى افينادا قازاق كينوسىنىڭ كۇندەرى ءوتتى. مادەني ءىس-شارا اياسىندا قازاقستان رەسپۋبليكاسى مادەنيەت جانە اقپارات مينيسترلىگى مەن «قازاقفيلم» ۇلتتىق كينوستۋدياسىنىڭ قولداۋىمەن تۇسىرىلگەن فيلمدەر گرەك كورەرمەنىنە ۇسىنىلدى.
فەستيۆال باعدارلاماسىنا قازاقستان تاريحى, مادەنيەتى مەن حالىق باتىرلارى تۋرالى باياندايتىن كلاسسيكالىق جانە زاماناۋي فيلمدەر كىردى. كينو كۇندەرى ساق پاتشايىمى, ەركىندىك پەن باتىلدىقتىڭ رامىزىنە اينالعان توميريس تۋرالى تاريحي ءفيلمنىڭ كورسەتىلىمىمەن باستالدى. بۇل تۋىندى فەستيۆال قوناقتارى تاراپىنان قىزىعۋشىلىق تۋدىردى. سول سەبەپتى ءفيلمدى گرەكيادا پروكاتقا شىعارۋ مۇمكىندىگى تۋرالى كەلىسسوز جۇرگىزىلىپ جاتىر.
سونداي-اق كورەرمەنگە اتى اڭىزعا اينالعان «دوس-مۇقاسان» انسامبلىنە ارنالعان كينو تۋىندىسى مەن «قازاقفيلم» قايتا قالپىنا كەلتىرگەن قازاق كينوسىنىڭ كلاسسيكاسى «مەنىڭ اتىم قوجا» ءفيلمى كورسەتىلدى.
كورسەتىلىمنەن كەيىن قازاقستاندىق اكتەرلەر مەن رەجيسسەرلەر جانە گرەك كينووندىرىسىنىڭ وكىلدەرى قاتىسقان شىعارماشىلىق كەزدەسۋلەر مەن پىكىرتالاستار ۇيىمداستىرىلدى. فەستيۆالگە قاتىسۋشىلاردىڭ پىكىرىنشە, مۇنداي مادەني الماسۋ جيىندارى – قازاقستان مەن گرەكيا حالىقتارىنىڭ اراسىنداعى ءوزارا تۇسىنىستىك پەن ىنتىماقتاستىقتى نىعايتۋدىڭ ءتيىمدى جولى.
وسىلايشا, افينادا وتكەن قازاق كينوسىنىڭ كۇندەرى گرەك كورەرمەنىنىڭ ەرەكشە ىقىلاسىنا بولەنىپ, ەكى ەل اراسىنداعى مادەني بايلانىستى ودان ءارى نىعايتا ءتۇستى.