پرەزيدەنت قاسىم-جومارت توقاەۆتىڭ تۋريزم سالاسىن وركەندەتۋ تۋرالى تاپسىرماسىنا سايكەس جامبىل وبلىسىندا جۇيەلى جۇمىستار قولعا الىندى, دەپ حابارلايدى Egemen.kz.
ءوڭىردىڭ تۋريزم سالاسىن ىلگەرىلەتۋ ماقساتىندا جالپى قۇنى 17,6 ملرد تەڭگەنى قۇرايتىن 25 ينۆەستيتسيالىق جوبانى ىسكە اسىرۋدىڭ ناتيجەسىندە, 350 جاڭا جۇمىس ورنىن قۇرۋعا مۇمكىندىك تۋادى. وسى جىلى تۋريستەردىڭ سۇرانىسىن قاناعاتتاندىراتىن 3 دەمالىس ايماعىن ىسكە قوسۋ بويىنشا ناقتى جۇمىستار جاسالدى.
جوعارىدا ايتىلعان جوبالاردىڭ العاشقىسى ىسكە قوسىلدى. «تەكتۇرماس» ەتنو-تاريحي كەشەنىندە ورنالاسقان «كونە قامال» قورعانى سالتاناتتى تۇردە اشىلدى. بۇل نىسان ەتنو-تاريحي كەشەننىڭ جالعاسى. جاڭا نىساننىڭ وڭ جاق قابىرعاسى جاساندى تاستارمەن ادىپتەلگەن. ۇزىندىعى 220 مەتردى قۇرايتىن قورعانمەن قورشالعان. مۇندا ورتاعاسىرلىق قورعاندار مەن دۋالداردىڭ كورىنىستەرى ۋاقىت سۇرانىسىنا ساي كوركەم بەينەلەرمەن تولىقتىرىلعان.
قازىرگى كەزدە وڭىردە 18 تۋريستىك بيزنەس سۋبەكتىسىنە مەملەكەتتىك قولداۋ شارالارى كورسەتىلىپ جاتىر. جالپى, وبلىس اۋماعىندا 40 تۋريستىك نىسان بار. ولارعا كەلەتىن تۋريستەردى قولداۋ ءۇشىن 10 جاڭا تۋريستىك مارشرۋت ازىرلەنگەن. قازىر وسى مارشرۋتتاعى نىسانداردىڭ ينفراقۇرىلىمىن جاقسارتۋ جۇمىستارى ءجۇرىپ جاتىر.
جالپى ۇزىندىعى 34,8 شاقىرىمدى قۇرايتىن 3 تۋريستىك نىسانعا اپاراتىن جول قۇرىلىسىن جۇرگىزۋگە جەرگىلىكتى بيۋدجەتتەن قارجى قارالىپ, جول سالۋ جۇمىستارى قارقىن الدى.
ماسەلەن, جۋالى اۋدانىنداعى «كوكساي Resort» دەمالىس ورتالىعىنا باراتىن اۆتوجولدىڭ قۇرىلىسى (19,5 شاقىرىم) وسى جىلدىڭ ماۋسىم ايىنىڭ باسىندا تولىق اياقتالادى دەپ جوسپارلانعان.
جامبىل اۋدانىنداعى «تاسكول» تۋريستىك نىسانىنا دەيىنگى 2,8 شاقىرىم جەرگە جول توسەلدى. قازىرگى تاڭدا جول جيەگى اباتتاندىرىلىپ جاتىر.
سونداي-اق «المالى» دەمالىس ورنىنا اپاراتىن 12,5 شاقىرىم جولدىڭ 7,5 شاقىرىمى توسەلىپ, اينالاسى اباتتاندىرىلدى. قالعان 5 شاقىرىم جول قۇرىلىسىن ماۋسىم ايىنا دەيىن اياقتاۋ كوزدەلىپ وتىر.
جامبىل وبلىسى