اقتاۋ قالاسىندا اسكەري-اۋە كۇشتەرىندە اۆياتسيا بازاسىنىڭ قۇرىلعانىنا 14 جىل تولۋىنا وراي سالتاناتتى شارا ءوتتى, دەپ حابارلايدى Egemen.kz.
سالتاناتتى جيىنعا اسكەري ءبولىمنىڭ جەكە قۇرامى مەن قۇرمەتتى قوناقتارى – اقتاۋ گارنيزونى اسكەري بولىمدەرىنىڭ كومانديرلەرى, قارۋلى كۇشتەردىڭ ارداگەرلەرى جانە اسكەري قىزمەتشىلەردىڭ وتباسى مۇشەلەرى قاتىستى.
ءىس-شارا جاۋىنگەرلىك تۋدى شىعارۋدان جانە قازاقستان رەسپۋبليكاسىنىڭ مەملەكەتتىك ءانۇرانىن ورىنداۋدان باستالدى. كومانديردىڭ ءبىرىنشى ورىنباسارى – 30153 اسكەري ءبولىمى شتابىنىڭ باستىعى پولكوۆنيك رۋسلان سماعۇلوۆ قۇتتىقتاۋ ءسوز سويلەدى.
ول جەكە قۇرامدى اتاۋلى كۇنمەن قۇتتىقتاپ, وتباسىلارىنا اماندىق پەن قىزمەتتە تابىس تىلەدى. ەرەكشە كوزگە تۇسكەن اسكەري قىزمەتشىلەرگە گراموتالار مەن باعالى سىيلىقتار تابىس ەتىلدى.
ء«بىزدىڭ اۆياتسيالىق بازامىز 2011 جىلعى 25 مامىردا قورعانىس ءمينيسترىنىڭ ديرەكتيۆاسى نەگىزىندە قۇرىلدى. 14 جىل بويى ءبىز باتىس ايماقتىڭ اۋە شەبىن قورعاۋدا تۇرمىز جانە كوپتەگەن جاۋاپتى مىندەتتەردى ورىندايمىز. ءبولىمنىڭ جەكە قۇرامى وقۋ-جاتتىعۋلار مەن قۇتقارۋ وپەراتسيالارىنا بەلسەندى قاتىسادى. بيىل ءبىز اسكەري شەرۋدە ءبولىمنىڭ قىزمەتىن ابىرويمەن كورسەتتىك», دەدى كومانديردىڭ تاربيە جانە يدەولوگيالىق جۇمىس جونىندەگى ورىنباسارى پودپولكوۆنيك روللان باكىروۆ.
ءىس-شارانى ۇيىمداستىرۋشىلار قوناقتارعا قارۋ-جاراق قۇرامىنداعى اۆياتسيالىق تەحنيكانى – جويعىشتار, تىكۇشاقتار جانە ۇشقىشسىز باسقارىلاتىن قۇرىلعىلاردى كورسەتتى. داستۇرگە ساي سپورتتىق جارىستار مەن كوركەمونەرپازدار كونتسەرتى ءوتتى.