كەز كەلگەن ساياسي قوزعالىستار بىزگە ۋتوپيانى ۋادە ەتەدى. ۋتوپيا دەگەنىمىز, «كوگىلدىر ارمان, كوگەرتەر كەز عوي كوڭىلدى قالعان». انت-سۋ ىشەتىندەردىڭ باعدارلاماسىن قابىلداساڭىز, يدەالدى قوعامعا جەتەمىن دەپ ويلايسىز.
بىراق اركىمنىڭ ۋتوپياسى ءارتۇرلى. بىرەۋگە تىنىش اۋىل – جۇماق, باسقاسىنا شۋلى مەگاپوليس – باقىت. ءبىزدىڭ قوعام مۇنداي پوپۋليستتىكتەن الدەقاشان شارشادى. وسى تۇستا ارگەنتينانىڭ ەڭ قيىن كەزىندە پرەزيدەنت بولىپ سايلانعان حاۆەر ميلەيدىڭ ۇستىنىن ۇستانىم قىلساق قوي دەپ ءوزىمىز دە ءبىر ۋتوپياعا بەرىلدىك. حاۆەر ءوزىن «ليبەرتارياندىق باعىتتىڭ ادامىمىن» دەيدى. ليبەرتارياندىقتىڭ ءمانى – ۋتوپيانى ەمەس, ەركىندىكتى ۋادە ەتۋ. اركىم ءوز ءومىرىن ءوز قالاۋى بويىنشا قۇرۋعا قۇقىلى. ياعني, مەملەكەتتىك كاپيتاليزمدى مويىندامايدى. مەملەكەت ەكونوميكاعا مۇلدە ارالاسپاۋى كەرەك. مەملەكەت ءسىزدىڭ ومىرىڭىزگە ارالاسپايدى, تەك ءسىزدىڭ قۇقىقتارىڭىزدى قورعايدى. ءار قاۋىمداستىق ءوز ەرەجەلەرىن ورناتا الادى. ءبىر جەردە داستۇرلەر ماڭىزدى بولسا, باسقا جەردە ەركىندىك پەن يننوۆاتسيا ۇستەمدىك ەتەدى. بۇل دەتسەنتراليزاتسيا – ارتاراپتىلىقتىڭ كەپىلى.
جاڭاعى ماقتاپ وتىرعان ارگەنتينا پرەزيدەنتى ميلەيىمىز كەلە سالا ەلدە اۋقىمدى وزگەرىستەردى باستاعان ەدى. حالىق تۇسىنبەي دال بولدى. ول ەلەكتر ەنەرگياسىنا سۋبسيديالاردى الىپ تاستاپ, كوممۋنالدىق تولەمدەردى 4 ەسە قىمباتتاتتى. 18 مينيسترلىكتىڭ جارتىسىن جاۋىپ, 25 مىڭ مەملەكەتتىك قىزمەتكەردى جۇمىستان شىعاردى. سالىق قىزمەتىن جاۋىپ, ونىڭ ورنىنا جاڭا ARCA ورگانىن قۇردى. سالىقتىق امنيستيا جاريالاپ, ازاماتتارعا زاڭسىز اكتيۆتەرىن زاڭداستىرۋعا مۇمكىندىك بەردى, ناتيجەسىندە بانكتەردەگى دەپوزيتتەر 19,3 ميلليارد دوللارعا ءوستى. ۇلتتىق ۆاليۋتانى – پەسونى قۇنسىزداندىرىپ, ونى ەركىن اينالىمعا جىبەردى. ەندى نە ىستە دەيسىز, ەركىندىككە جەتۋ ءۇشىن دە ەرىك-جىگەر كەرەك...بىراق بۇل ساياسي بۇزاقىلىقتىڭ ناتيجەسى دە كەرەمەت بولدى. جاڭاشىل پرەزيدەنت «وتىنەمىن, ءسال شىداي تۇرىڭىزدارشى» دەپ شىڭعا جەتەلەدى.
– ۇكىمەتكە كەيىنگى 5 جىلدا باتىل رەفورمالار جەتىسپەي وتىرعانى تايعا تاڭبا باسقانداي انىق كورىنەدى. رەفورما – ەش كومپروميسسىز, بەلگىلى ءبىر قالىپتاسقان جۇيەنى سىندىرۋعا ارنالعان قادام. ال بىزدەگى وزگەرىستەردىڭ بارلىعى كومپروميستىك, كەيدە كوسمەتيكالىق بولىپ جاتادى. ءبىزدىڭ باستى پروبلەمامىز – بيۋدجەت دەفيتسيتىنىڭ جىل ساناپ ۇلعايۋى. دەفيتسيتتى 3 تريلليون تەڭگە كوريدورىنا قايتا اپارىپ تىعا الساق, ۇلتتىق قور سىندى رەزەرۆتەردى تەز تولتىرىپ الىپ, ارتىنان دەفيتسيتتى ينۆەستيتسيالىق تابىس ەسەبىنەن جاۋىپ وتىرۋعا مۇمكىندىك الار ەدىك. قازاقستاننىڭ ەڭ باستى جاۋى – ەكونوميكالىق پوپۋليزم. حالىققا ۇنايتىن نارسە ايتۋ وڭاي. اقشا باساتىن ستانوكتى قوسىپ قويىپ, بارلىق كرەديتتى كەشىرىپ, بارلىعىنا اقشا تاراتۋ دا قيىن ەمەس. بىراق ەكونوميكانى الداي المايسىز. ارگەنتينا, ۆەنەسۋەلا, باسقا دا لاتىن امەريكاسىنىڭ ەلدەرى پوپۋليستەر بيلىكتە وتىرعان كەزەڭنىڭ زاردابىن ءالى كۇنگە دەيىن تارتىپ كەلەدى, – دەپ تۇسىندىرەدى مۇنى ايبار ولجاەۆ.