27 مامىردا اقتوبەگە شۇعىل قونعان رەسەيلىك Boeing-777 ۇشاعىنداعى جولاۋشىنىڭ جۇرەگى ۇشۋ كەزىندە توقتاپ قالعان. ايەل ادام ۇشاق قونعانعا دەيىن كوز جۇمعان, دەپ حابارلايدى Egemen.kz.
اقتوبە قالالىق اۋەجايى اكىمشىلىگى راستاعانداي Nordwind Airlines كومپانياسىنا تيەسىلى ەكاتەرينبۋرگ – سوچي باعىتىنداعى رەيس جەكسەنبى كۇنى اقتوبە اۋەجايىنا شۇعىل تۇردە قونعان. سەبەپ – بورتتاعى 42 جاستاعى ايەل جولاۋشىنىڭ كەنەتتەن جاعدايىنىڭ ناشارلاۋى بولعان. ول كۇيەۋى مەن بالالارىنىڭ قاسىندا وتىرعان. وكىنىشكە قاراي, مەديتسينالىق كومەك كورسەتىلگەنگە دەيىن جولاۋشى قايتىس بولعان.
مارقۇمنىڭ دەنەسى اقتوبەدە قالدى. وتباسى مۇشەلەرىنىڭ قازىرگى ۋاقىتتا قايدا ەكەنى ناقتى حابارلانعان جوق. اۋە كومپانياسى مەن مەديتسينالىق مەكەمەلەر ازىرگە رەسمي پىكىر بىلدىرگەن جوق.
اكتوبە ستانتسياسىنداعى لينەيلىك پوليتسيا ءبولىمىنىڭ مالىمەتىنشە, وقيعا ورنى تەكسەرىلىپ, كۋاگەرلەردەن جاۋاپ الىنۋدا. بىرقاتار ساراپتامالار تاعايىندالادى. بارلىق ءمان-جاي انىقتالعاننان كەيىن پروتسەسسۋالدىق شەشىم قابىلدانادى.
ايتا كەتەيىك, وقيعا بولعان رەيستە 564 جولاۋشى بولعان. شۇعىل قونۋعا بايلانىستى ۋاقىتشا كىدىرىس بولعانىمەن, ۇشاق ساعات 14:30-دا باعىتىن جالعاستىرعان.
جانەل تولەۋبەكوۆا, ەۇۋ ستۋدەنتى