«اۋىل» پارتياسىنىڭ شيرەكعاسىرلىق بەلەسى

كونفەرەنتسيا جۇمىسىنا پرەمەر-ءمينيستردىڭ كەڭەسشىسى ەرالى توعجانوۆ, ماجىلىستەگى «اۋىل» پارتياسى فراكتسياسىنىڭ العاشقى جەتەكشىسى, اكادەميك ورازالى سابدەن, مەملەكەت جانە قوعام قايراتكەرى عاني قاسىموۆ, پارلامەنت دەپۋتاتتارى مەن ەلىمىزدەگى وزگە دە ساياسي پارتيالاردىڭ جەتەكشىلەرى, سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, سونداي-اق بىرقاتار مينيسترلىكتىڭ وكىلدەرى قاتىستى. سونداي-اق الما شۇكىجانوۆا, ەلمارا ترايسوۆا, الينا سولوۆەۆا سىندى قازاقستاننىڭ ەڭبەك ەرلەرى دە بولدى.

جيىن باسىندا پارتيانىڭ 25 جىلدىق مەرەيلى داتاسىنا ارنايى دايىندالعان «اۋىل – ەل بولاشاعى» اتتى شاعىن فيلم كورسەتىلدى. سونداي-اق «اۋىل» پارتياسىنىڭ قالىپتاسۋ كەزەڭىندە قىزمەت ەتكەن تانىمال قوعام قايراتكەرلەرى مەن پارتيا ارداگەرلەرىنىڭ باياندامالارى ارقىلى ەلىمىز­دەگى كوپپارتيالىق ساياسي جۇيەنىڭ قالىپتاسىپ, دامۋ كەزەڭدەرىنە شولۋ جاسالىپ, بەلگىلى ساياساتتانۋشى عالىمداردىڭ ساراپتامالىق زەرتتەۋلەرى تانىستىرىلدى.

كونفەرەنتسيا بارىسىندا پارتيا توراعاسى, ماجىلىستەگى اگرارلىق ماسەلەلەر كوميتەتىنىڭ توراعاسى سەرىك ەگىزباەۆ «اۋىل» پارتياسى: 25 جىل بەلەسى» تاقىرىبىندا بايانداما جاسادى. ءماجىلىس دەپۋتاتى پارتيانىڭ قۇرىلۋ تاريحىنان باستاپ, وسى كەزگە دەيىنگى ءجۇرىپ وتكەن جولىنا شولۋ جاساپ, بۇگىنگى باستامالارى مەن كەلەشەك جوسپارلارىنا توقتالدى.

– «اۋىل» پارتياسى اۋىلدىق وڭىرلەردىڭ مۇددەلەرىن قورعاۋ مەن دامىتۋ ماقساتىندا 2000 جىلدىڭ 29 ناۋرىزىندا شارۋالاردىڭ سوتسيال-دەموكراتيالىق پارتياسى بولىپ قۇرىلدى. پارتياعا ەلدەگى اۋىلعا جانى اشيتىن عالىمدار, جازۋشىلار جانە زيالى قاۋىم وكىلدەرىنىڭ باسىم بولىگى مۇشەلىككە كىردى. ءابدىجامىل نۇرپەيىسوۆ, شەرحان مۇرتازا, فاريزا وڭعارسىنوۆا, دۋلات يسابەكوۆ سياقتى ادەبيەتىمىزدىڭ كورنەكتى وكىلدەرى سول كەزدەگى «اۋىل» پارتياسىنىڭ ساياسي كەڭەسىنە سايلانىپ, نۇرعالي ءنۇسىپجانوۆ, التىنبەك قورازباەۆ جانە تاعى دا باسقا تانىمال مادەنيەت وكىلدەرى «اۋىل» پارتياسى مۇشەلەرىنىڭ قاتارىنان تابىلدى. «اۋىل» دەگەن اتاۋمەن جاڭا پارتيانىڭ قۇرىلۋى قازاق قوعامىندا ۇلكەن جاڭعىرىق تۋعىزدى, – دەدى س.ەگىزباەۆ.

ونىڭ ايتۋىنشا, پارتيا قۇرىلعان 2000 جىلى ونىڭ قۇرامىندا 5 مىڭ ادام بولسا, ەكى جىل ىشىندە مۇشەلەر سانى 12 ەسە ارتىپ, 2003 جىلى 60 مىڭنان اسىپتى.

– شيرەكعاسىرلىق تاريحىندا «اۋىل» پارتياسى ءوزىنىڭ نەگىزگى ساياسي, يدەولوگيالىق باعىتتارىنان ەشقاشان باس تارتقان ەمەس. پارتيامىز قاي كەزەڭدە بولسىن, اۋىلدىق ايماقتاردىڭ, اۋىل شارۋاشىلىعىنىڭ ما­سە­لەلەرىن كوتەرىپ, ولاردىڭ شەشىلۋى ءۇشىن ناقتى قادامدار جاسادى. تاريحقا جۇ­گىنسەك, پارتيا 2003–2005 جىلدارعا ار­نالعان 3 جىلدىق «اۋىل» مەملەكەتتىك باعدار­لاماسىنىڭ قابىل­دانۋىنا باستاماشى بولعان. جىل سايىن اۋىل شارۋاشىلىعى تاۋارىن وندىرۋشىلەرگە پايىزسىز قاراجاتتىڭ ءبولىنۋى دە ءبىزدىڭ پارتيامىزدىڭ باستاماسىمەن قولعا الىندى, «اۋىل شارۋاشىلىعى سەرىكتەستىكتەرى مەن قاۋىمداستىقتارى تۋرالى», «استىق تۋرالى», «قازاقستان رەسپۋبليكاسىندا اسىل تۇقىمدى مال شارۋاشىلىعىن دامىتۋ تۋرالى», «سۋ پايدالانۋ تۋرالى» جانە باسقا دا زاڭداردىڭ قابىل­دانۋىنا ىقپال ەتتى, – دەدى پارتيا توراعاسى.

س.ەگىزباەۆ پارتيانىڭ ەندىگى باستى مەجەسى ەلىمىزدى اگرارلىق دەرجاۆاعا اينالدىرۋ ەكەنىن اتاپ ءوتتى. ياعني قالا مەن اۋىلدىڭ دامۋ بارىسىن قۇستىڭ قوس قاناتىنداي تەڭ ۇستاۋ كەرەكتىگىن العا تارتتى. بۇل ماقسات پارتيا سايا­سي باعدارلاماسىنىڭ «ەكونوميكالىق ستراتەگيا» بولىمىندە كورىنىس تاپقان.

سونداي-اق مەرەيلى داتاعا وراي كونفەرەنتسيا اياسىندا ق.قۋانىشباەۆ اتىنداعى قازاق ۇلتتىق مۋزىكالىق-دراما تەاترىندا ش.ايتماتوۆتىڭ «قىزىل ورامالدى شىنارىم» اتتى سپەكتاكلى كورسەتىلدى. قويىلىمدى پارتيا توراعاسى سەرىك ەگىزباەۆ باستاعان ماجىلىستەگى «اۋىل» پارتياسى فراكتسياسىنىڭ دەپۋتاتتارى, پارتيا ارداگەرلەرى, قۇرمەتتى قوناقتار جانە ەلىمىزدىڭ بارلىق وڭىرىنەن كەلگەن دەلەگاتتار تاماشالادى.